Ерөнхий сайд Н.Учрал Япон Улсад хийсэн төрийн айлчлалаа эхлүүлэхтэй зэрэгцээд түүний эсрэг чиглэсэн шүүмжлэл, харлуулах оролдлого сошиал орчинд эрчимжив.

“МАН-ын дарга нарыг дагуулж явж зугааллаа”, “сэтгүүлчдийг эрхлүүлж олноор нь дагуулж явлаа”, “Засгийн газрын Хэвлэлийн алба сошиалын троллуудад мөнгө тарааж байна” гэх мэт мэдээлэл ар араасаа цацагдав.

Харин эдгээр мэдээллийн цаана бодит баримт байна уу, эсвэл улс төрийн зорилготой харлуулах ажиллагаа юу гэдгийг салгаж харах шаардлагатай.

Төрийн өндөр хэмжээний айлчлалын үеэр хэвлэл мэдээллийн байгууллагууд өөрсдийн редакцын шийдвэрээр сэтгүүлчдээ томилон ажиллуулах нь ердийн практик. Өөр өөр хэвлэл мэдээллийн хэрэгслүүд айлчлалын үйл явцыг өөр өөрийн өнцөг, редакцын бодлогоор сурвалжилж, олон нийтэд хүргэдэг. Тиймээс төрийн айлчлалд сэтгүүлчид оролцлоо гэдгийг дангаар нь “эрхлүүлсэн” гэх үндэслэл болгох нь учир дутагдалтай.

МАН-ын удирдлагуудын Япон Улсад хийсэн айлчлалын тухайд ч МАН-ын ЕНБД Я.Содбаатарын тайлбараас үзэхэд Японы Либерал Ардчилсан намтай харилцах, хамтын ажиллагааны хүрээнд мэдээлэл сонсох, сургалт авах зэрэг чиглэлтэй байсан гэх тайлбар бий.

Нэгэнт Ерөнхий сайдын төрийн айлчлалын хүрээнд тусгай үүргийн нислэг зохион байгуулагдсан нөхцөлд улс төрийн намын төлөөлөл хамт зорчсон нь тусдаа нислэг зохион байгуулахаас илүү зардал хэмнэсэн эсэхийг харин баримтаар тооцож үзэх хэрэгтэй. Үүнийг шууд “татвар төлөгчдийн мөнгөөр намын дарга нарыг зугаалгалаа” гэж дүгнэхээс өмнө зардлын тооцоо, нислэгийн зохион байгуулалтыг нийтэд ил болгох нь зөв.

Харин Засгийн газрын Хэвлэлийн алба сошиалын тролл багийг сар бүр 300 ам.доллараар санхүүжүүлдэг гэх мэдээлэл илүү ноцтой асуудал.

Гэвч Засгийн газрын Хэвлэлийн дарга Б.Төгсбаяр уг мэдээллийг няцааж, Засгийн газар хэнийг ч ийм байдлаар, ямар нэгэн зардлаар санхүүжүүлээгүй, уг мэдээлэл нь гүтгэлэг гэж мэдэгдсэн.

Тэгвэл асуулт эндээс эхэлнэ.

Яагаад яг энэ үед Ерөнхий сайд Н.Учрал руу чиглэсэн мэдээлэл, шүүмжлэл, харлуулах оролдлого ар араасаа гарах болов?

Энэ асуултад улс төрийн нөхцөл байдлыг нь харж байж хариулах хэрэгтэй.

Н.Учрал Ерөнхий сайд болсныхоо дараа Хууль зүй, дотоод хэргийн сайд С.Амарсайханыг чөлөөлж, оронд нь УИХ-ын гишүүн Г.Тэмүүлэнг томилсон. Шинэ сайд хууль, шүүхийн байгууллага хэнд ч ялгаваргүй, тэгш шударга үйлчлэх ёстой гэсэн байр суурийг илэрхийлсэн.

Үүнтэй зэрэгцэн өмнөх эрх баригчдын үеийн улс төрийн нэр нөлөө бүхий зарим албан тушаалтнуудтай холбоотой гэмт хэргийн шинжтэй асуудал сөхөгдөн хууль хяналтын байгууллагын анхаарлын төвд орж эхэлсэн гэх мэдээллүүд хэвлэлээр гарч эхэлсэн.

Л.Оюун-Эрдэнэ, Д.Амарбаясгалан, Х.Булгантуяа, Ч.Номин зэрэг өмнөх эрх баригчдын хүрээний улс төрчидтэй холбоотой асуудлууд дахин яригдах болсон нь МАН доторх улс төрийн харилцаанд ч нөлөөлөх нь ойлгомжтой.

Гэхдээ энд нэг зүйлийг тодорхой хэлэх хэрэгтэй. Хэн нэгэн гэм буруутай эсэхийг сошиалын пост, улс төрийн тайлбар, хэвлэлийн нийтлэлээр тогтоохгүй. Хууль хяналтын байгууллага шалгаж, прокурор хянаж, шүүх эцэслэн шийдвэрлэнэ.

Харин улс төрийн хувьд бол нэг зүйл тодорхой харагдаж байна.

Эрх мэдэл солигдохын хэрээр өмнө нь нэг хүрээнд төвлөрч байсан ашиг сонирхол, нөлөөллийн сүлжээнүүд хөдөлгөөнд ордог. Тиймээс Ерөнхий сайд Н.Учралын засаглалын эхний саруудад гарч буй үйл явдлыг зөвхөн нэг нэгээр нь биш, хоорондын уялдаатай нь харах шаардлагатай.

Төрийн ажил хэвийн явагдаж, хууль хяналтын байгууллагаас өмнөх эрх мэдэлтнүүдтэй холбоотой асуудлуудыг шалгаж эхлэх бүрд сошиал орчинд эрх баригчдын эсрэг мэдээллийн давалгаа үүсдэг бол энэ нь өөрөө анхаарах ёстой үзэгдэл.

Өнөөдөр төв замыг хааж, шатахуун түлшний нөхцөл байдлыг эсэргүүцсэн “машинтай жагсаал” зохион байгуулагдсан гэх мэдээлэл ч байна.

Жагсаалд оролцсон нэг хүний өмссөн малгай хувцас зэргийг улс төрийн хүрээлэлтэй холбон хардаж болох ч зөвхөн үүгээр жагсаалыг хэн нэгэн зохион байгуулсан гэж шууд дүгнэх боломжгүй.

Гэхдээ улс төрийн үйл явдлууд давхцаж, нэг талд Засгийн газрыг тогтворгүй, чадваргүй мэт харагдуулах мэдээллүүд тархаж, нөгөө талд гудамжны эсэргүүцэл зэрэгцэн өрнөж байгаа нөхцөлд олон нийт “Энэ бүхний цаана хэн байна вэ?” гэж асуух нь зүйн хэрэг.

Монголын улс төрд нэг муухай зуршил бий.

Эрх мэдлээ алдах дөхөхөөрөө өөрсдийгөө хамгаалах хамгийн хямд зэвсэг болох сошиалын хар PR-ыг ашигладаг.

Гэхдээ иргэд сошиалын мэдээлэлд шууд итгэлгүй, мэдээллийг нэг талаас нь биш, олон талаас нь харьцуулж харж чаддаг болсон нь сайшаалтай.

Хэн хэнийгээ хэзээ, ямар асуудлаар шүүмжилж эхэлсэн, үүний өмнө ямар шийдвэр гарсан, дараа нь ямар мэдээлэл цацагдсан гэдгийг холбож харж чаддаг хэрсүү иргэд олон болсон.

Тиймээс Ерөнхий сайд Н.Учрал руу чиглэсэн мэдээллийн дайралт зохион байгуулалттай байж болзүшгүй гэсэн хардлага энд төрж байна.

Хэрэв төрийн ажил зөв явагдаж, хууль хяналтын байгууллага хараат бусаар ажиллаж, өмнөх эрх мэдэлтнүүдтэй холбоотой асуудлыг шалгах явцад улс төрийн дарамт, сошиалын хар PR зэрэгцэн нэмэгдэж байгаа бол энэ нь төрийн ажил хөдөлж эхлэхээр ашиг сонирхлын сүлжээ сошиалыг хөдөлдөг зүй тогтолын илрэл гэж хэлж болохоор байна.

Тэгэхлээр эндээс нэг асуулт урган гарч байна. Ерөнхий сайд Н.Учрал руу ингэтлээ эрчимтэй дайрах болсон нь түүний хийж буй ажлын үр дагавар уу, эсвэл өмнөх эрх мэдлийн хүрээ өөрийгөө хамгаалах оролдлого юу?

Засгийн газрын тэргүүнийг шүүмжлэх нь ардчилсан нийгэмд хэвийн үзэгдэл боловч шүүмжлэл нэрийн дор худал мэдээлэл тарааж, олон нийтийг төөрөгдүүлж, асуудлыг өөр тийш нь эргүүлэх оролдлого хийж байгаа бол түүнд Ерөнхий сайд баримтанд тулгуурласан бодитой хариу тайлбар өгөх нь зүйтэй.

А.Галт

Amlalt.mn