Евразийн орнууд, тэр дундаа Монголд хөрөнгө оруулалт хийх сонирхолтой хөрөнгө оруулагчдад улс төрийн эрсдэлийн зөвлөх үйлчилгээ үзүүлэгч “Macro-Advisory” компанийн гүйцэтгэх захирал Крис Вифер манай улсын өнөөгийн нөхцөл байдлыг дүгнэжээ.
Тэрбээр “Нүүрсний хулгайн асуудалд төр өөрийгөө үр дүнтэй шалгах боломжгүй. Монголын ард түмний дунд олон жилийн турш бугшсан бухимдал оргил цэгтээ хүрсэн. Эрх баригч МАН нийгэм, эдийн засгийн реформ хийж, ард иргэдийн амьжиргааг дээшлүүлэх амлалт өгч, өнгөрсөн сонгуульд үнэмлэхүй ялалт байгуулсан. Гэвч тэд амлалтдаа төдийлөн хүрч чадаагүй.
Гэхдээ эрх баригчид амлалтаа биелүүлж чадаагүй нь дан ганц тэднээс шалтгаалаагүй гэдгийг хэлэх нь зүйтэй. Цар тахлын улмаас Монгол Улсын нийт экспортын 85 хувийг бүрдүүлдэг БНХАУ хилээ хаасан нь тус улсыг эдийн засгийн хүндрэлд оруулсан. Улмаар Засгийн газар амлалтаа биелүүлэх нөөцгүй болсон.
Монгол Улс байгалийн нөөц баялагтайгаас гадна газар зүйн байршлын хувьд Орос-Хятадын дунд маш чухал байршилд оршдог. Ялангуяа, эрчим хүчний салбарт нэн шаардлагатай газрын ховор элементийн төслүүдийг хөдөлгөх боломжтой байгаа. Гэхдээ Монгол Улсад үүссэн өнөөгийн нөхцөл байдал нь олон улсын гэхээсээ илүүтэй бүс нутгийн, тэр дундаа Хятадад хамаатай асуудал.
ОХУ, Япон, Өмнөд Солонгостой хийх Монголын худалдаа, хөрөнгө оруулалт тэлж байгаа ч БНХАУ-тай хийх хамтын ажиллагаа давамгайлсан хэвээр байгаа. Тиймээс Бээжин Монгол Улсад болж буй үйл явцыг хамгийн анхааралтай ажиглаж байгаа” хэмээсэн байна.
Эх сурвалж: IToim.mn
