Коронавируст халдвар /ковид19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай нэг удаагийн хуулийн үйлчлэлийг 2022 оны 2 сард сунгаж, 2022 оны 12 сарын 31-ны өдөр хүртэл хүчин төгөлдөр үйлчлэхээр УИХ-аас баталсан.
Энэ хуулийн хүрээнд цар тахлын тухай хуулиар халхавчлан, сонгон шалтгаруулалтгүй, төрийн албаны ерөнхий болон тусгай шалгалтанд тэнцээгүй иргэдийг төрийн захиргааны байгууллагад Түр орлон гүйцэтгэгч нэрийн дор томилон ажилуулсан.
Тэгвэл энэ томилгооны хүчинтэй хугацаа 2022 оны 12-р сарын 31 өдөр буюу Коронавируст халдвар /ковид19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн хэрэгжилт зогсохтой зэрэгцэн дуусгавар болно.
Өөрөөр хэлбэл улс төрчдийн гар хөлийн үзүүрт зарагдаж, тэдний туслах зөвлөхөөр ажиллаж байсан, олны хэлж ярьдагаар “Цүнх” баригчид”-ын дарга байх хугацаа дуусаж байна гэсэн үг .
Засгийн газрын түвшинд гурван яамны төрийн нарийн бичгийн дарга, 17 агентлагийн дарга, 71 яам, агентлагийн хэлтэс, газрын дарга зэрэг 90 гаруй албан тушаалтнууд төрийн албаны ерөнхий болон тусгай шалгалтанд тэнцээгүй, сонгон шалгаруулалтад ороогүй боловч дээрх хуулийн дагуу албан тушаалд томилогдсон гэдгийг ч МАН-ын бүлгийн дарга Д.Тогтохсүрэн мэдээлж байсан.
Ямартай ч сонгон шалгаруулалтгүй томилогдсон Төрийн нарийн бичгийн дарга, агентлагийн даргыг Засгийн газрын тогтоолоор томилгоог хийдэг учир чөлөөлөх асуудлыг Засгийн газар өөрсдөө хийх ёстой болж байгаа юм. Хэрэв ирэх оны 1-р сарын 1 гэхэд сонгон шалгаруулалтгүй томилогдсон дарга нарын чөлөөлөхгүй бол томилсон удирдах албан тушаалтнуудад хариуцлага тооцох хүсэлтийг Төрийн албаны зөвлөлөөс хүргүүлнэ.
Үүнээс гадна цар тахлын тухай хуулийн хүрээнд томилогдсон албан тушаалтан 1100 орчим бий гэсэн судалгаа байдаг. Засгийн газрын харъяа байгууллагуудаас гадна Нийслэлийн Засаг даргын тамгын газар, нийслэлийн харъяа агентлаг, нийслэлийн өмчит үйлдвэрийн газрын удирдлагууд ч мөн энэ хуулийн дагуу сонгон шалгаруулалтгүйгээр томилогдон тухайн газрынхаа даргын үүргийг Түр орлон гүйцэтгэж байгаа. Нэгэнт энэ хууль сунгагдахгүй учир яам, тамгын газар, төрийн албаны бүх шатны байгууллагуудад томилогдсон Ковидын хуулийн дагуу томилогдон ажиллаж байсан албан тушаалтнууд оны эцсээр чөлөөлөгдөнө.
Харин эдгээр 1000 давсан хүнийг чөлөөлж, тэдний оронд төрийн албаны тусгай болон ерөнхий шалгалтанд тэнцсэн, сонгон шалгаруулалтанд өндөр оноо авсан, төрийн албаны зөвлөлийн нөөцөд бүртгэлтэй иргэд очих учиртай.
Мөн төрийн албан хаагчдыг чөлөөлснөөр төрийн албаны ажил хэрхэн зохицуулагдах, нөгөө талд нэг дор олон хүнийг чөлөөлөх нь төрийн үйлчилгээ доголдох вий гэдэгт Төрийн албаны зөвлөлийн гишүүн Д.Баатарсайхан хэлэхдээ "Нэг дор олон хүн чөлөөлсөн ч төрийн алба тасалдахгүй хэвээр үргэлжилнэ. Тухайн байгууллагад хуулийн дагуу томилогдсон төрийн жинхэнэ албан хаагч нар богино хугацаанд түр орлон гүйцэтгэгчээр ажиллана. Өөрөөр хэлбэл, тухайн албан тушаалын сул орон тооны сонгон шалгаруулалтаар нөхөгдөх хүртэл ажиллах эрхзүйн зохицуулалт нь хүртэл байгаа" гэв.
Цаашид төрийн албаны зөвлөл төрийн байгууллагуудын дарга удирдлага, албан хаагчдыг томилоход хуулийн дагуу хяналтаа тавьж, сонгон шалгаруулалтанд тэнцсэн иргэдийг төрийн захиргааны албан тушаалд томилуулах тал дээр анхаарч ажиллах нь зүйтэй биз.
