Хөгжлийн банкны гэх асуудал эртнээс л сөхөгдсөн. Яригдсан. Газар авч “шалихгүй” хэсэг ч “баарсан”. Саяхнаас л харин “амь оров уу” гэмээр овоо үр дүнтэй байна.
УИХ-ын дарга Г.Занданшатарын шийдвэрээр Хөгжлийн банктай холбоотой нотлох баримтыг шинжлэн судлах нээлттэй сонсгол төрийн ордонд хэдэн өдөр боллоо. “Хар, цагаан” нь эхнээсээ ил болж байх шиг.
Холбоотой гэгддэг нөхөд нь ч ар араасаа ирж, гэрчээр оролцож байна. Хэн нь хэн бэ гэдгийг олноороо харлаа. Үзлээ.
Сүүлийн сонсголын гол фаворит нь тус сонсголд гэрчээр оролцсон экс ерөнхийлөгч Х.Баттулга байсан гэхэд хилсдэхгүй.
УИХ-ын гишүүн Т.Доржханд, Б.Энхбаяр нар хажууд нь “жижгэдэж” байна билээ. Баттулга ч зангарагаа харуулав. Мэдрүүлсэн.
Хөгжлийн банкийг Хянан шалгах Түр хорооны дарга УИХ-ын гишүүн Б.Энхбаяр уг нь эхний хэдэн сонсгол дээр нэлээн “ширүүн, дориун” араншинтай байгаа харагдсан. “Эрэл”-ийн Ж.Эрдэнэбат, УИХ-ын гишүүн асан М.Билэгт, Фортуна Д.Батбаяр тэргүүтэй хэд хэдэн хүн “уригдан заларсан” уг сонсголыг утгаар нь “удирдан залж” байлаа.
Гэтэл Женкогоор “удирдуулчих шиг” боллоо. “Жигтэйхэн аятай" л харьцаж байна билээ. Хүсвэл та хариулахгүй ч байсан болноо гээд “найр тавих”. "Ерөнхийлөгч Баттулгаа гээд хөл алдах”, “Амаа үдүүлчихсэн” аятай л “халгаж” хургаж” байх юм тэр. Хачин харагдсан даа ер нь. Цаад учир нь юунд байна вэ?
УИХ-ын гишүүн Б.Энхбаярын улс төрийн “эцэг” нь Сү.Батболд гэгддэг. Сү.Батболд бол “будлиан, бантангийн” жинхэнэ эзэн. Олон ч хэрэгт нэр холбогдож, шалгагдаж байгааг бултаараа мэдэх биз ээ. "Эцгээ харлуулах” хүсэл "үрд" байдаггүй.
Энэ жишгээр Х.Баттулгыг хэт оролдвол, Сү.Батболдын зарим нэг “булхайг” захаас нь авхуулаад дэлгэчихэж магадгүй гэж Б.Энхбаяр “сэрэмжилснийг” үгүйсгэхгүй.
Нөгөөтэйгүүр улс төрийн тавцнаас нэгэнт буусан ч Женко хөшигний цаана нөлөөтэй хэвээр. Тиймээс түүнтэй хамаагүй тэрсэлдэж болохгүй. “Араанд нь зуулгачихвал” аюултай гэдэг.
Одоо ажиллаж байгаа дээд шүүхийн 23 шүүгчийн 60 гаруй хувь нь ч Женкогийн томилсон хүмүүс гэгддэг. Тиймээс Женко "хүсэх л юм бол " Сү.Батболдыг төвөггүй "яллаж”, Б.Энхбаярыг “уйлуулж” чадна.
Баараггүй ирж мэдэх ийм аюулыг Түр хорооны дарга маань мэдэрч, улс төрийн эцгийнхээ “ирээдүйг өөрийнхтэйгөө “хамгаалсан” бололтой...
Ингэж л харж байна. Бас хардаж байна.
Тиймгүй л бол “харьсан” Х.Баттулгаас “ширвэх” үндэс “халгиж яваа” Б.Энхбаярт байхгүй л баймаарсан...
Д.Дамдин
Amlalt.mn
