Лайвчин Даваагийн Мөнх-Эрдэнийг дахин нэг сар хорихоор болжээ. Хууль бөх хэрэглэгдэж байна. Баагаагийн Баттөмөр нүүрсний хэрэгт хамааралгүй гэж зарлагдлаа. Цэдэвийн Сэргэлэн нүүрсний хэрэгт хамааралгүй байна аа гээд АТГ-ын эрхтэн гарын үсгээ зурсаныг мөнхүү гишүүн өндөр дээд дуугаар, бат нот болгон нийгмийн сүлжээнд тавилаа. Цаашид нүүрсний хэрэгт холбогдогсод энэ өнгөөр “ялгүй” болох цуурай дуулдана.
Таван гишүүнийг АТГ-аас зарласан, нүүрсний холбогдогчид гээд. Одоо тус байгууллага өөрөө холбогдолгүй ээ гээд зарлаж байна. Хууль хэрхэн хэрэглэгдэж байгааг олон нийт үл ойлгох. Авлигатай тэмцэхийн З.Дашдаваа Цагдаагийн дарга болох гэнэ. Цагдаагийн генерал Ж.Болд Солонгост суух консулаар явах гэнэ. Р.Чингис АТГ-ын даргаар томилогдох гэнэ гэсэн мэдээлэл мөн зэрэгцээд гарлаа. Үгүйсгэгдсэнгүй. Тэгэхээр үнэн шиг байна.
Даваагийн Мөнх-Эрдэнийн дахин хорьж байна. Дарга нар дэвшин ажиллах нь.
Д.Мөнх-Эрдэнэ нүүрс хулгайлаагүй. Концесс, тендер, ЖДҮ, Хөгжлийн банк, Төмөр зам, тээвэр ложистикийн хэрэгт холбогдоогүй. Тэр нийгмийн бузар булхайн туйл болсон хэргүүдээс ангид. Тэр тэрүүхэндээ танхайн шинж, бүдүүлэгийн авирлал үзүүлсэн хүн. Хэлбэр нь тийм боловч хэрэг дээрээ шударга ёсны төлөө тэмцсэн.
Туркийн яруу найрагч Назим Хикмет эртээ, хэрвээ би шатахгүй аваас, хэрвээ би гэрэлтэхгүй аваас хэн энэ харанхуйг чинь гэрэлтүүлэх юм бэ гэж хэлсэн. Турк өнөөдөр ямар байгааг та бүхэн мэдэж байгаа. Хикмет эртээс эрт эх орноо бодооч гээд хэлээд л байсан байна.
Даваагийн Мөнх-Эрдэнэ “бүдүүлгээр” шатсан, танхайгаар “гэрэлтүүлсэн”, бас гэрэлтүүлж байсан энэ нийгмийг, яагаад гэвэл түүнийг нийгэм бүхэлдээ дэмжиж байсан.
Тэнэглэл, танхайрлыг нь орхин шударга юм ярьж байгааг нь сонсон, алга ташиж байсан. Энэ үнэн. Тэр дабль стандартыг ярьсан, эрхтнүүдийн увайгүйг хэлсэн, ард түмэн ядарч байгааг хэлсэн, хууль ёс завхарсаныг хэлж байсан, тэр эх орон ямар үнэ цэнтэйг хэлж байсан, тэр эх орны дээр дураар авирлагсдыг хэлж байсан, тэр бүгдийг эрс шүүмжилж байсан. Байгаа онож байсан. Ард түмэн дэмжиж байсан.
Өнөөдөр Д.Мөнх-Эрдэнэд найман жилийн ял төлөвлөснийг мэдээлсэн. Мөн аймаар шүү. Шударгын төлөө дуугарсан хүнд ингэж хандаад, дөчин их наядын нүүрсний хулгайн асуудалд холбогдогсод хамааралгүйн мэдээ зэрэгцэн түгээд л. Дарга нар дэвшээд л. Энэ нийгэмд одоо тэгээд хэн гэрэлтүүлэг, шударга ёсны бамбар барих юм бэ.
Хэвлэл мэдээллийнхэн ажиллаач ээ, хүний эрхийг хангаад, хүний төлөө дуугараад, энэ нийгмээ гэрэлтүүлээч ээ. Бүгд нуухин нүдлээд дарга нарын үүд сахина. Халаглан харамсмаар.
Д.Мөнх-Эрдэнэ зарга Өнөрөө гээд сэтгүүлч Н.Өнөрцэцэгийг өчнөөн доромжилсон. Гэтэл өнөөдөр Өнөрөө доромжлуулах тусам долоон бурхан адил гэрэлтэхийн үлгэрээр Д.Мөнх-Эрдэнийг өмөөрч, битгий хориоч ээ гээд байр сууриа илэрхийлжээ.
Том байна шүү дээ. Нинжин, энэрэнгүй, энтэй байна шүү дээ. Нийгмийн бузар булайг ойлгосон, үнэн болоод худал, үйлс болоод тэнэгрэлийн ялгааг ойлгочихсон хүн ингэж дуугардаг байна.
Нийгмийн шударга ёсны төлөө Өнөрөө, Мөнх-эрдэнэ хоёр нэг армийнх. Тэрийг Өнөрөө түвэггүй мэдэж, тэрийгээ тунхаглаж байна. Сэтгүүлч Н.Өнөрцэцэг шиг байцгаая л даа, бүгдээрээ. Тэгвэл л нийгэм гэрэлтэнэ шүү дээ. Ноёнтой өстэй хүн хонгогүй гэж нийгмийн сүлжээгээр бичицгээж байна.
Д.Мөнх-Эрдэнэ Ц.Нямдоржийнхонтой тэмцсэн. Тэгээд энэ болов гэж бичиж байна. Худлаа гэх боломжгүй. Нямдоржийн Анхбаяр одоо Мөнх-Эрдэнийг суллаач гэж байр сууриа илэрхийлэх хэрэгтэй.
Тэр өөрөө ч нийгмийн шударга бусад ундууцан лайв хийж байсан. Санаа алдаж байсан. Энэ агуулгаараа Д.Мөнх-Эрдэнэ тэр хоёр мөн адил тэмцэгч. Одоо Н.Анхбаяр Мөнх-Эрдэнийг сулла гэвэл ямар гоё харагдана гээч. Том харагдана. Өнөрөө дуугарчихаад байна шүү дээ.
Эр хүн уг нь бүсгүй хүнээс жаахан дээшхэн харна гэдэг дээ. Ирэх туулай жилийнхээ бэлгийг, бошгийг шударга ёс мандсан жил болоосой,
Ирэх туулай жилд Өнөрөө, Мөнх-Эрдэнэ, Анхбаяр нар маань илүү тэмцсэн жил байгаасай гэж ерөөм.
Мартах нь, манай шударга “У балын”-ын Лодойсамбуу, коммент Билэгээ нар магад Мөнх-Эрдэнийг сулла аа гэж хэлэх байх аа. Шударга хүмүүс шүү дээ. Нэг армийнхан.
З.Баяраа
Амлалт.мн
