Таван залуу давхиж гарч ирээд л түүнийг буулгасан. Жаран таван суудалтай болгож ялуулсан намын даргаа өгсөн. УИХ-ын даргын албан тушаалаа ч өгсөн. Улмаар хорин онд дэвших эрх ч авсангүй. Гоншигнож, гонгиносонгүй.
Залгамжилсан намын дарга нь өнөөдөр Ерөнхийлөгч болсон. Наяад оны дүү нар нь өнөө намаа ч , засгаа ч толгойлж байна. Энэ л утгаараа тэрбээр намдаа үе солиулсан, найдлагыг залуустаа өгсөн, өөрөө ч нэг хэсэгтээ улс төрөөс завсарлан намба түвшин, ажин түжин яваа , ерөнхий агуулгаараа “том” яваа юм.
Хүний хуучин дээлийн шинэ гэж үг байдаг. Миеэгомбын Энхболдын өнөөдрийн цуурайг үзэж сонсохоор энэ үг эрхгүй санагдах.
Албан тушаалаас нь боорлон буулгаж асан залуусын хоёр нь өнөөдөр асуудал дүүрэн байна. Тэдэнтэй нийлж довтолсон үе тэнгийн нэг нөхөр Бельгид Элчингээр ажиллаж байна. Ерөнхий сайд, Хууль зүйн сайдыг хоёр нь хийж байна. Хорвоогийн өнгө. Ээлж дараа. М.Энхболдыг шүүмжлэн дайрч байсан залуус өнөөдөр М.Энхболдыг шалтаглаж аснаасаа хэд дахин их нодготой асуудалтай тулгараад мачийж байна. Арга ч үгүй юм, М.Энхболдыг унагалцаж явсан нөхөд нь нүүрс, Хөгжлийн банкны хэрэгт нилээд гүн хөл дүржээ.
Ийм ийм зүйл болж байна. М.Энхболд харин илүү өнгөтэй, өргөн дүнэгэр харагдаад байх шиг. Хакухогийн зодог тайлах ёслолд нэгэнтээ үзэгдэв, Японд. Төв аймгийнхаа холбогдолтой соёл, шашны ёслол, арга хэмжээнүүдэд хамбатантай суугаад ёс төгөлдөр яваад байгаа харагдах. Засаг төрийн үйл ажиллагааг заахын нит хэмжээнд хүн авч, энэ хугацаанд алив нэг хэвлэлээр шүүмжилсэн, магтсан алийг нь ч эс үзүүлэв.
Засгаа авсан улс мэдэж байгаа биз ээ гэх өнгөөр байх шиг байдаг. Хөшигийн хөндийн нисэх буудал ашиглалтад ороод, Б.Бат-Эрдэнэ сайдаас өгсүүлээд шавхай төдийг нь шүүмжилж гоочилж л байх шиг байна.
Хөшигийн хөндийд тэгэж хэлэгдэх олон улсын онгоцны буудал чинь хэрэг дээрээ мань М.Энхболдын тавьсан суурь, хөрөнгө оруулалт санагдана. Улс төрд ёс зүй, жудаг нэхмээр үйл явдал өдөр бүр л болж байна.
Андын тангараг, Монголын за андгай буй за гэдгийг эрхгүй өдөр бүр бодуулахаар цаг хугацаа үргэлжилж байна. Үндсэн хуулиндаа өөрчлөлт хийнэ, эс хийнэ гээд л байна. Хийх нь ч хийх нь шиг байна.
Дөчин их наядын хулгай луйвар, тээвэр ложистикийн хэрэг, Хөгжлийн банкны хэрэг гээд улс орны өмнө тулгарсан бэрхшээл машид их. Нэгэн цагт М.Энхболдыг Ерөнхий сайд болоход нь билүү дээ, Монголын эрх ашгийн өмнө таны толгой багадна гэж томорч байсан Лувсаннямын Гантөмөр өнөөдөр Ардчилсан намын дарга болов.
Өөрийнхөө толгойн том эсэхийг харуулах өдөр нь ирчихсэн байна. М.Энхболдыг тэгж хэлж аснаас хойш лавтайяа арван тав, зургаан жил өнгөрч.
М.Энхболдоосоо даруй арваад ах Ө.Энхтүвшин Элчин сайд хийгээд, Лүндээ спикерт зөвлөөд, Нямка Засгийн хэрэг эрхлэх хийгээд буучихсан, Төв аймагт дөрөө харшуулж явсан Нямаагийн Энхболд аанай л УИХ-д суугаастай.
Ингээд харахаар М.Энхболд гэдэг эр эрх мэдлийн уухайгаас завсарлага аваад, энэ бие, оюун санаандаа шинэ салхи оруулаад, эн тэнгийн багцааллаас сонжиход илүү том яваагаар эрхгүй анзаарагдах. Холч хараа, ноён нуруу гэдэг юм төрийн хүний үндсэн баялаг.
Төр улсдаа хөрөнгө оруулах, тэр тусмаа шуналгүй байх, сэтгэл тэнүүн, үзэл бодол уудам байхуйн хөрөнгө оруулалт гэдэг бол бүр ч эгнэшгүй зүйл. Мөн бас өсийг том бага гэлгүй эс үржүүлдэг байхуй гэж асар том ойлголт байна.
Энэ, энэ чанар, шинж төлөвийг М.Энхболдоос олж харах, эргүүлэн хүсэх урь нийгэмд байгаа нь тодхон л ажиглагдах. Эв бодож, хол харсан хүн хэзээд л хүндтэй байдаг даа.
Үлдээх, үйлдэж буй жишиг нь том болохоор аргагүй юм. Нэхэгдэлтэй.
З.БАЯРАА
АМЛАЛТ.МН
