Нэгэн цагт бүгдэд магтагдах, нөгөө цагт бүхэнд адлагдах...
Өнөөдөр “Эрдэнэс Таван толгой” ХК-ийн Гүйцэтгэх захирал Б.Ганхуяг, Таван толгой төмөр зам ХХК-ийн Гүйцэтгэх захирал Н.Удаанжаргал нарыг авлигачин, нүүрсний хулгайчаар зарлан, бүгд л тэднийг биеэ тоосон, ихтэй зантай, хэтэрхий шуналтай байсан гэцгээн буруутгаж байна.
Энэ бичвэрээр тэдний авлига албан тушаалын асуудлыг хаацаалах, өмгөөлөх гэсэнгүй, гагцхүү яаж яваад ийм асуудалд гүнзгий холбогдчихов гэдгийг багахан ч гэсэн тодруулахыг зорив.
Б.Ганхуяг оюутны холбооны дарга байхаасаа эхлэн оюутнуудыг нийтийн тээврээр хөнгөлттэй үнээр зорчуулахаас эхлээд олон ажлыг амжилттай хэрэгжүүлсэн. Мөн хожим МАН-ын дах буруу бодлого, албан тушаалтны авлигатай холбоотой асуудлыг Т.Аюурсайхан, Н.Удаанжаргал, Т.Сайнжаргал нарын хамтаар шүүмжилж, МАН-ын дэргэд “Шинэчлэлийн хороо”-г байгуулж, зохицуулагч, даргаар нь ажиллаж байсан төдийгүй 2014 онд Ерөнхий сайд Н.Алтанхуягийг огцрохыг шаардаж, Хэлмэгдэгсдийн хөшөөний дэргэд гэр барин тэмцлээ илэрхийлж байв.
Дараа нь Б.Ганхуяг “Эрдэнэс таван толгой” ХК-ийн Гүйцэтгэх захирал болж энэ байгууллагыг Монгол төдийгүй олон улсад хүлээн зөвшөөрөгдөх хэмжээнд хүргэж, ашигтай ажиллуулж, иргэдэд хувьцааны ашиг хүртээж, Засгийн газрын шийдвэрийн дагуу Ковид-19 цар тахлын үед иргэдэд санхүүгийн дэмжлэг үзүүлж байсан.
Б.Ганхуяг ажлаа хийж байхад "Эрдэнэс Тавантолгой” ХК нь 2018 оны "Шилдэг менежменттэй байгууллага”, 2021 онд “Эрдэнэс Тавантолгой” ХК нь МҮХАҮТ-аас онцлох топ ААН-ээр тодорч Гран при шагнал Алтан цом, 2022 онд Монгол Улсын Засгийн газар, Монголын Үндэсний Худалдаа Аж Үйлдвэрийн танхим хамтран нийгэм, эдийн засгийн хөгжилд бодитой хувь нэмэр оруулж буй “ТОП-100 аж ахуйн нэгж”-ийн ТОП-3 эрэмблэгдэх зэргээр тус тус шагнагдан, түүний нэр сайшаал магтуугийн оргилд хүрч байжээ.
Түүний журмын найз “Таван толгой төмөр зам” ХХК-ийн Гүйцэтгэх захирал Н.Удаанжаргал мөн богино хугацаанд Таван толгой-Гашуун сухайт чиглэлийн 233.6 км төмөр зам барих ажлыг амжилттай удирдан зохион байгуулж, ашиглалтанд оруулж чадсан. Анх ажилчдынхаа цалинг тавьж чадахгүй хэмжээнд байсан энэ компанийг эрхэлсэн ажилдаа уйгагүй зүтгэдэг, улайран ажилладаг байсан Н.Удаанжаргалаас өөр хүн удирдсан бол гурван жилийн хугацаанд 233 км төмөр замыг барьж амжихгүй байсан гэлцэх юм билээ.
Б.Ганхуяг, Н.Удаанжаргал нар бол МАН дах ирээдүйтэй шилдэг залуу боловсон хүчний нэг, сайн менежерүүд байв. Харамсалтай тэднийг зарим талаар тухайн үеийн ерөнхийлөгч, намын нөхөд нь баллачихав уу гэж бодогдох.
Монгол Улсын Ерөнхийлөгч асан Х.Баттулга “Эрдэнэс таван толгой” ХХК-ийн Гүйцэтгэх захирал Б.Ганхуягт 2020 оны 10 сард Монгол Улсын Гавьяат уурхайчин, “Таван толгой төмөр зам” ХХК-ийн Гүйцэтгэх захирал Н.Удаанжаргалд 2021 оны 6 сард “Хөдөлмөрийн баатар” тус тус хүртээсэн.
Өнөөдрөөс эргэн харвал Ерөнхийлөгчийн энэ цолны нэхэл хатуу байсан болов уу бодогдох. Ингэж хэлэх шалтгаан нь Б.Ганхуяг, Н.Удаанжаргал нарыг буруутгах үндэс болж байгаа “Бодь интернэшнл” ХХК-тай хийсэн төмөр замын оффтейк гэрээ болон ҮБАЗ-ийн халхлагдсан нууцын гэрээнүүд.
Нууцын зэрэгтэй гэрээг тэд санаачлагаараа нууцад оруулж батлуулья гээгүй л байлтай. Эндээс нь дээрх цол тэмдэгүүдийн араас нэхсэн нэхэл ойлгогдох учиртай болов уу. Үүний цаана Голомтын Д.Баясгалан гэж хамаг будлианы эзэн оролцоотой байх.
Мөн нүүрсний хулгайн хэрэгт өдгөө эрх баригч МАН-ын нөлөө бүхий улс төрчид, УИХ-ын гишүүд бас холбогдох биз. Тэдний дунд нэгэн цагт Б.Ганхуяг, Н.Удаанжаргал нартай нэг зорилгын төлөө хамтран зүтгэж байсан Т.Аюурсайхан, Д.Амарбаясгалан, Т.Сайнжаргал нарын нөхөд нь байх. Т.Аюурсайханыг МАН-ын шинэлчлэлийн хорооны дарга байхад дэргэд нь Б.Ганхуяг, Н.Удаанжаргал нар байсан.
Н.Удаанжаргал МАН-ын ЕНБД Д.Амарбаясгалангийн зөвлөхөөр ажиллаж байсан удаатай.
Эндээс тэд Б.Ганхуяг, Н.Удаанжаргал нарыг компаниа удирдаж байхад нь хэрхэн гуйж, аргадаж, загнаж, найзалж, архидаж, авлигадаж өөрийн хамаарал бүхий этгээдүүддээ гэрээ байгуулсан бол гэдгийг төсөөлж болох.
Харин өнөөдөр Б.Ганхуяг, Н.Удаанжаргал нарыг гэмт хэрэгт холбогдоход “би танихгүй” гээд сууж байгаа тэдний “хүний мөсгүйг” харахад ичмээр.
Нэгэнт нөхцөл байдал иймдээ тулж буй бол Б.Ганхуяг, Н.Удаанжаргал нар МАНай нам, тАНай нам гэлтгүй нүүрсний хулгайтай холбоотой байж болох бүх хүмүүс, албан тушаалтнуудын нэрийг зарлах, мөрдөн байцаалтанд хэлэх хэрэгтэй.
Ингэж байж улс оронд нүүрлэсэн цагаан захтай хулгайчууд, хүн чанаргүйчүүдийг нэг мөр олонд таниулж жигшүүлнэ. Тэд ингэх л хэрэгтэй. Ингэж байж шударга ёсны нэр нүүртэй үлдэнэ тэд.
Ц.Мөнх
Amlalt.mn
