Засгийн газрын гишүүд, агентлаг, төрийн өмчийн компаниуд, төрийн нарийнууд, Засаг дарга нар, Тамгын газрын дарга нар, ер нь төрөөс санхүүждэг бүх нэгжийн удирдлагад “Таван Ш” ажиллагааны хүрээнд мэдэгдэл чиглэл хүргүүлжээ.
Арван нэгэн үндэслэл заалт бүхий эл чиглэл “Шүүрдэх” үйл ажиллагааны хүрээнд үйлчилж байгаа байна. Д.Амарбаясгалан дарга нэрээ бичээд, тамгаа даржээ. Төрд нүүрлэсэн аливаа авлигач, хийдүүлэн шимэгч, хууль дүрэм завхруулагч, ашиг сонирхолтнууд, ёс зүйгүйчүүдийг шүүрдэн олж, Засгийн газрын хэрэг эрхлэх газарт шийдвэр дүнг ирүүлэхийг үүрэгдсэн байна. Ирүүлээгүй албан тушаалтанд хариуцлага тооцох нь.
Хууль дүрэмд харш ямар нэг үйлдэл гаргасан хэнийг ч болов дөрөвдүгээр сарын зургааны дотор чөлөөлөхийг хатуу сануулж. Ирэх сарын 10 гэхэд энэ үйл ажиллагаа бүрэн дуусгавар болох цагийн хязгаартай байна.
Энэ цагаа олсон ажил. Ерөнхий сайд Л.Оюун-Эрдэнэ нийгэмд шударга ёс тогтоохын тулд бүхий л хэлбэрээр идэвхтэй ажиллаж байгаагийн эрчимжил энэ гэж ойлгогдож байна. Ингэж нийгэмдээ, төрдөө сорил ажиллагааг байнга явуулж цэвэршүүлж байх ёстой. Ирэх хоногууд авлигач, хууль үйлчилдэггүй нөхдөд хуулийг мэдрүүлэх, төрийн сэнтий зайдлан бусармагаар хоол хороогчдод цээрлэл болсон хоногууд байх нь.
Ард түмэн үүнийг дэмжих нь гарцаагүй. Түүгээр үл барам Засгийн газрынхаа энэ санаачлагад нэгдэн, шүгэлдэж, илрүүлж хамтран ажиллах нь дамжиггүй. Ерөнхий сайд намаа ч, төрөө ч авлигаас ангижруулж цэвэрлэхийн тулд Таван Ш ажиллагааг эхлүүлсэн. Чуулган сая нээгдлээ.
Бүрэн эрхээс нь түдгэлзүүлэх, чөлөөлөх хэд хэдэн гишүүн байна. Үүнийг хангуулж ажиллах нь гарцаагүй. Парламент Ерөнхий сайдын, ард түмний энэ хоймсон эрх ашиг, шударга ёсны төлөөх эрмэлзлийг хангаж ажиллавал өөрсдийнхөө нэр хүндийг жаахан ч гэсэн өргөнө.
Ерөнхий сайд авлигачдыг цээрлүүлэх ажиллагаандаа тууштай ажиллаж байгаа байдал анзаарагдаад л байна. Дөнгөж саяхан Эрдэнэт үйлдвэрийн арваад албан тушаалтныг барьж хорьсон. Тэдгээр хүмүүсээс тав зургаан тэрбумын авлигын мөнгийг АТГ-ынхан хураасан байна билээ.
Улсын баялагийн ингэж шамшигдуулан авлига, хээл хахуулийг өөхшүүлэгч болгон шударга ёсны эрмэлзэл, соргог хяналтад өртсөөр байна. Ард иргэд, бүх хүмүүс төрөө, нийгмээ цэвэршүүлэх үйлсэд ам сайтай байгаа нь илтэд мэдэгдэж байна. Хорь гучин жил дүлий мэт байж, хяналт, ил тод байдлыг “дээгүүр нь “ хаасан нийгмийн бурангуй энэ үед ихээхэн өөрөөр хувьсан цэвэршиж, ард түмэн, Засаг төр нийгмийнхээ сайн сайхны төлөө нэгдэн буй байдлыг бид үзэж байна.
Соён гийгүүлэгч нар, нийтлэлчид ч эл сэдвээр дуу нэгтээ хүч түрж байгаа нь нэгийг хэлээд л. Шинэ сэргэлт гэдэг үг бүх түвшинд сонсогдох. Сэргэх үнэхээр болсон доо. Засгийн газар Хөдөөгийн сэргэлт чуулганыг саяхан хийв. Хөдөө очиж ажилласан хүмүүсийг, аж ахуйн нэгжийг дэмжих, зээлийн боломжуудыг таван зуун сая хүртэл байлгаж, хүү багатайгаар олгохоо мэдэгдсэн.
Энэ бол бодит боломж. Бид тэнүүн улсаараа дэлхэж, тархан амьдрах хэрэгтэй. Засаг дэмжиж байна. Үндсэн хуулийн өөрчлөлтийг хийж, ниймгмээ илүү цэвэр тунгалаг болгох, засаглалын гажуудлыг засах алхамуудад Ерөнхий сайд нээлттэй, иргэдийнхээ үгийг сонсож, улс төрийн намуудын зөвшил, нэгдэн нийлж шийдвэр оноох боломжоор хангаж байгаа нь үлгэртэй л хэрэг.
Хүйсийн тэгш харьцааг шийдвэр гаргах түвшинд оноож, сонгуулийн холимог тогтолцоог биежүүлэн, сонгогчдын төлөөллийг бүрэн хангах үүднээс гишүүдийн тоог нэмэх гээд олон асуудал энэ хаврын улс төрийн гол сэдэв байх нь.
Ерөнхий сайд Л.Оюун-Эрдэнэ энэ бүхэнд голчийг олж, асуудлуудыг эрэмбэ дараатай шийдэх такиктай байгаа нь харагдах. Оюу толгойн далд уурхай нээгдлээ. Ерөнхий сайд очив. Сайн мэдээ нь эдийн засаг үнэмлэхүй тэлж, бидний орлого үлэмж нэмэгдэхийг дуулгалаа. Монголчууд гэрч нь. Монголын талд өрөөр бичигдэж байсан их тоог тэглэн, Оюу толгойн төсөл Монголд илүү ашигтай байх санаачлагыг тал бүрээр эрмэлзэн хичээж ажиллаж байгаа нь Засгийн газрын бодит үйл ажиллагааны илрэл.
Монголчууд зөвийн төлөө нэгдээд, шударга ёсыг тунхаглан, авлига хээл хахуулийг арилган, нийтээр сайн аж төрж болох чиг аяс мэдрэгдээд л байна. Үүний тулд бүгд ажиллах хэрэгтэй. Засгийн газрынхаа шүгэл үлээх тэргүүтэн “Таван Ш” ажлыг дэмжих замаар.
З.БАЯРАА
Амлалт.мн
