Жишимгүй мэлзэх урлаг гэж байдаг бол үүнийг төгссөн эзэмшсэн хүн Ардын намын бүлгийг толгойлон удирдаж байна. Саяхан Зөвлөлдөх зөвлөл гэж их ярив даа. Мөнхүү Зөвлөлд эхлээд нэг ч эмэгтэй хүн оруулаагүй. Нийгмээр хэл ам, нэхэл хийж байж хоёр нэг хүн оруулах шиг болсон. Яагаад ингэж байгаа юм бэ, нийгмийнхээ тавин нэгэн хувь болсон эм хүйсийнхээ төлөөллийг юуны учир оруулаагүй юм бэ гэж асуухад, мань Д. Тогтохсүрэн журам нь тийм юмаа, дүн нь л ингээд гарчихлаа гээд, хээвнэг, жишимгүй мэлзэж зогссон.
Эрх баригч намын үнэмлэхүй олонхийн бүлгийг толгойлогч хүн иймэрхүү л жендерийн мэдрэмжтэй, нийгмийн баримжаатай байгаа юм. За тэгтэл, бас яасан бэ гэхээр, нүүрсний хулгай яригдаад, Ерөнхий сайд шүгэлдээд эхлэв ээ дээ.
Тэгсэн, Д.Тогтохсүрэн манай бүлэгт нүүрсний хулгайч байхгүй ээ гээд тод тодорхой жишимгүй мэлзэж зогссон.Үнэн бүлгийн даргыг маргааш нь л гүйцсэн.
Д.Тогтохсүрэн одоо мөнөөх хулгай байхгүй гэж хэлсэн амаараа, хулгайчдаа хэзээ чөлөөлөх, чөлөөлөхгүйг уруул давуулан хэлж сууна.
Мөн тэгээд, яасан бэ гэсэн, бүлгийн дарга Д.Тогтохсүрэн тойрогтоо очиж золголт хийсэн, дугтуйтай мөнгө бариад золгосон бололтой юм. Тэгээд нийгэм ингэж болохгүй шүү дээ гээд шуугитал аанай л мэлзээ маань мэндчилсэн юм аа гээд л жишимгүй мэлзээгээ хийж байгаа юм.
Бас тэгтэл, нийгэм сануулж байна, Австралид мань Тогтохоо очоод казинодсон зураг байдгийг сануулах. Тэр үед Тоогоогоос казинодоо юу гэж асуухад, жишимгүй мэлзээн сонгодог авьяасаараа ажиглаж байсан юм аа гэж жишимгүй сайхан мэлзэн хариулт өгсөн байдаг. За нэг иймэрхүү даргаар Ардын нам маань бүлгээ удирдуулж байгаа.
Нэгэнтээ Ардчилсан намын генсек И.Мөнхжаргал хэвлэлд ярьж. Өмнөх нэг сонгуулийн үед. Тогтохоо дарга шашин суртал бүхий шошгот бэлэг сэлт тараан, үдэшлэг цуглаан хийгээд байна аа, үүнийг хэлэхгүй бол болохгүй, Сонгуулийн хууль зөрчөөд байна гэж улс төрчийн хувиар ч, иргэний хувиар ч олон нийтэд ярьжээ.
Д.Тогтохсүрэн дарга ямархуу мэлзээ хийсэн юм байгаа юм, нэг мэх мэлзээ хийсэн биз ээ. Тогтохоо даргын лоосуу их ээ. Л.Мөнхбаясгалан ойрмог жилүүдэд, Өвөрхангайн нүүрсний мафизм гээд нэвтрүүлэг хийж байлаа. Картелийн түвшингийн шахуу сүлжээ байна гээд ярьж байлаа. Баянтээгийн уурхайг “тэслэгчид” гээд л. Тогтох дарга тов тодорхой тэр дотор “цохиж” л явсан. Одоо тэр “картелийн” хүмүүс бүгд УИХ, төр засгийн төгс албан тушаалуудыг эзэгнэн суужээ. Бүлгийн дарга, гишүүн, сайд гээд л.
Манай улсад нэг иймэрхүү л дүр төрх ноёлсоор. Д.Тогтохсүрэн дарга одоо энэ их нүүрс, нүүрсний хулгай, хулгайчийг ярьж байгаа үед, сэдвээ дамнуулаад, Баянтээгийн уурхайд Д.Тогтохсүрэн миний бие ямар ч холбоо сүлбээ, эрх ашиг үгүй ээ, уурын зуухын түвшингийн эрх ашиг надад үгүй гээд тов тодорхой мэлзэлгүйгээр хариулчих хэрэгтэй л байгаа юм. Хэт нь аюулгүй.
И.Мөнхжаргал ч энэ талаар бодьтой судлаад асуух хэрэгтэй. Саяхан бас МҮОНРТ гурил бартердсан бололтой юм. Мөнөөх гурил Өвөрхангайн замаар тээгдсэн бололтой гэж хүмүүс ярих юм. Д.Тогтохсүрэнгийн замаар явчихав уу даа гээд нэг хэсэг нь хардах. Тоогоо дарга хариулах биз. Тиймгүй ээ гээд. Тэгтэл гурил хамгийн их мөр улбаатай байдаг л гэлцэх. Мэдэхгүй юм даа.
МҮОНРТ гэснээс энэ байгууллагын удирдлагыг Д.Тогтохсүрэн даргын хүн гэх бөгөөд энэ даргаараа түрий бариад төрийн дээд удирдлагуудыг бүгдийг нь базсан шахуу хүн байдаг гэлцээд л ордон хавийн гал тогоо, тамхины цэгээр цуурч байна л гэлцэх. Хэн мэдлээ.
Л.Оюун-Эрдэнэ, Д.Амарбаясгалан нар чухал нэгэн хуулийг батлуулна гэсэн. Тэр бол төрийн дээд байгууллагад ажилтай гэр бүлээс, ах дүү нар дотроос нэг л хүн төрийн дээд алба ажил хашнаа гэсэн агуулгатай. Үүнийг ард түмэн маш их дэмжиж байгаа.
Маш зөв, Ардын намаар дүүрэн аав хүү сайдууд, эхнэр нөхөр, хүргэн хүүхэн дарга нар хаа сайгүй шивээлсэн. Ургийн мод гээд манай хангайд ургахааргүй өтгөн ургийн модны зангилаатай, сүлжээтэй зураг хөрөг нийгмээр нэг гараад, шуугидаг. Дандаа Ардын намын эрх мэдэлтнүүд байдаг. О, А дарга нар маш зөв юм хийх гэж байгаа. Наяад оны дарга нар. Жараад оны Тогтохоо дарга ч бас уран нүүж байх шиг байна, энэ хуулийг тосгуулаад.
Саяхан хүргэн гэгдэх Байгаль орчны яамны Төрийн нарийн бичгийн дарга Э.Баттулыг хэрэг дээрээ мань Д.Тогтохсүрэн даргыг чөлөөлүүллээ гэж ярих хэсэг байна. Намын дарга нарынхаа хуулийг “ирж явааг” мэдээд ингэчихэж байгаа юм гэх хүмүүс олон байна, нам хавийн.
Ингээд харахаар Д.Тогтохсүрэн дарга мэлзэгч биш, асуудлын гогцоог угтаж шийддэг ч юм шиг. Ингэж ширхэглэг хандвал эрх баригчдын хүсээд байгаа Үндсэн хуулийн өөрчлөлт, сонгуулийн хууль, намуудын хуульд Д.Тогтохсүрэн дарга уран бодлого бодсон байж тун мэдэх.
Төрийн нарийн хүргэнээ хэл амнаас, хууль төрөхөөс түрүүлээд чөлөөлүүлнэ гэдэг чинь “хүүхэнээ” бодсон хэрэг биз дээ. Ингээд харахаар жендерийн эрх ашгийг бас алсуураа тооцдог байдал ажиглагдах.
Товчхон хэлэхэд, Д.Тогтохсүрэн даргад хийх ажил маш их байна. Мэлзэлгүй л, үнэн хийх хэрэгтэй. Бүлгийн дарга нарын идеалиуд Ардын намд зөндөө. Н.Энхбаяр, Д.Дэмбэрэл, Ө.Энхтүвшин гээд л. Зангарагтай байлаа шүү дээ.
Тэднээс зангарга сур, Д.Тогтохсүрээн. Мэлзээг биш шүү, мэлзээг одоо энэ цагаас зүгээр орхичих. Дэмий. Үнэгүйдүүлээд байна.
З.БАЯРАА
Амлалт.мн
