Жамбалдоржийн Тана гэдэг эмэгтэй Оюу толгойн ТУЗ-д очлоо. Нацагийн Багабандийн оронд очлоо. Засгийн газрын урилгаар гэж өөрөө тодотголоо. Боловсорсоны шошго лут л харагдах. Үзэгдэх шошго, үйлдэн хийх хоёр их зөрөөтэй. Цаг хугацаа харуулж дээ.
Юутай ч томилгоонууд залуужиж байна. Цэвэршээд байна уу даа гэж нийгэм харах. Ж.Танын үеийн бүсгүй байх. Ховдын Засаг дарга бүсгүй өчигдөр Ерөнхийлөгчтэй улаан хивсэн дээгүүр алхжээ. Хоёр эмэгтэй мөнөөх улаан хивсийг их угаажээ.
Тэднийг өрөвдсөн, Засаг даргийг шүүмжилсэн аяс нэвт шувт л явж харагдах. Итгэл хүлээж томилогдсон улс анхнаасаа л алдаагүй шиг ажиллаж байж улсын итгэлийг олно. Хамтран зүтгэгчдэдээ, намаа, засагаа үл түлнэ. Энийг идэр залуу, ихээ чухал албанд томилогдсон бүсгүйчүүд нэн чинад баримтлах хэрэгтэй. Жендерийн чигээр Сонгуулийн хууль машид чамбай болох нь шиг байна.
Наяад оны дарга нар нийгмийн баримжаатай ажиллаад байх шиг. Шударга ёсыг тогтоох, засаглалыг зөв болгох гээд овоо зүтгээд байх шиг. Энэ үед нам засгаас томилогдсон эрхтнүүд, ялангуяа наяад оныхонд алдах эрх огт үгүй. Дарханы Б.Азжаргал гэж чамбай Засаг дарга байх шиг байдаг. Чамбай болоогүйн шинж биз. Газрын албаны нь дарга хоригдсон бололтой, мань Засаг 461 тойроод яваад байна гэж мэдээлэгдэх. Энэ юу болов.
Б.Азжаргалын гүйлгээ ухаан, ажил зохион байгуулах чадвар овоо л гэж харагдсан. Одоо энэ гарч байгаа мэдээлэл олиггүй бол тэгээд л сэвтээд эхэлж байна. Завханы Засаг даргаар Хөдөлмөрийн яамны Төрийн нарийнаар олон жил ажилласан Гомбосүрэнгийн Өнөрбаярыг тавих бололтой юм. Ажлын дөр нот суусан, арга эвийг олсон, төрийн ажилд меритээр замнасан тун боломжийн товариш шиг байдаг.
Завханд тиймэрхүү дарга хэрэгтэй ээ. Хөгжлөөр үргэлж ул барисан, хоцорсон Хутагтуудын өлгий нутаг л байгаад байгаа. Тэнд шинэ оюун санаа, бодьтой хөрөнгө оруулалт, хөгжил хэрэгтэй байгаа. Тэлмэний станц, үйлдвэр технологийн паркаас эхлээд хийх ажил их.
Г.Өнөрбаяр дарга өөр ажиллах байх, ширхэгтэй ажиллах байх. Байгаа байхгүй нь мэдэгдэхгүй олон аймгийн дарга нар байна. Үйлс нь үзэгдэхгүй байна гэсэн үг. Аймгийн даргаар дорвитой ажиллаад гишүүн болчихсон хүн УИХ-аар дүүрэн байна. Тэд нь олигтой идеаль бас болж өгөхгүй байгаа юм байлгүй дээ.
Очирбатын Амгаланбаатар гэдэг нөхөр Говь-Алтайг хоёр дахиа засаглаж байх шиг байна. Хурдтай, мэдрэмжтэй менежер нь мэдэгдээд л байх. Алтайнхан, Алтайн малчид нэг зүйл дээр айхавтар төвлөрч нягтарч байгаа шиг байна лээ. Засаг нь залаад. Нэгдэж нийлээд, малаараа хөрөнгө оруулалтын сан бүрдүүлээд үйлдвэрлэлийг эхлүүлье гээд зөвшөөд, үр дүн гарч байгааг хүмүүс яриад байна.
Засаг дарга нь хотод аймгийнхаа хөгжлийн гарцыг нутаг нэгт эрдэмтэд хийгээд бусад дэвшилтэт үзэл сануутнуудаар хэлэлцүүлээд ажиллаад л байгаа нь тод харагдах. Говь-Алтайд үйлдвэрлэл технологийн амьд жинхэнэ, язгуураасаа нэгдмэл паркын суурь бодьтой тавигдаад байх шиг байна. Жалгаар нэг малын үнэт түүхий эдээ хаядаг, гадаадаас сүү зөөдөгөө болихын эхлэл шүү дээ. Бүгд дэмжих хэрэгтэй. Зуу дахин үржигдэх ашиг орлого угаасаа манай хөдөө аж ахуйд байж л байгаа, угаасаа бидний үндсэн хөрөнгө шүү дээ.
Засгийн газар өчигдөр Цахим яамны Төрийн нарийнаар Б.Батцэцэг гэдэг эмэгтэйг мөн томиллоо. Ням-Осорын Учрал сайд бүх мэдээлэл, бүх үйлчилгээг цахимд нэг мөр шилжүүлэх гээд л зүтгээд байх шиг байна. Үүнд нь энэ бүсгүй мэдээж онож туслах, хамтрах биз. Залуусын хөдөлгөөн, дэвшил өнгө өнгөөр ялгарч харагдаж байна.
Булганы Засаг дарга ажлаа өгч. Б.Ариун-Эрдэнэ орлогоо тайлбарлаж чадаагүй гэж мэдээлэгдэх. Баян-Өлгий аймаг Засаг ноёноо томилолгүй хэдэн сар болж байгаа юм билээ. Т.Аубакир гишүүн нь харин тун зөв ярьж байна лээ. Иргэдийн хурал нь ажлаа хийгээд, Засаг даргаа томилох хэрэгтэй. Энэ бол тэдний асуудал гээд зарчмын зөв байр суурь хэлж байна лээ.
Ерөнхий сайдын зүгээс эрдэм мэдлэгтэй, эрч хүчтэй, эх орноо гэх сэтгэлтэй залуусыг төрд ачаа үүрүүлж ажилд томилох цаг үеэ олсон зөв шийдвэр гэж олон нийт харж байна.
Улс оронд уруудах зүйл бага, ахих, өгсөх зүйл их баймаар байна. Асгатын мөнгөний ордыг хөдөлгөхөөр боллоо гээд аймгийн даргаа тавьж чадахгүй байгаа Баян-Өлгийгөөс сонгогдсон Т.Аубакир гишүүн мөн хэлж байна лээ. Асгатын мөнгөний ордыг хөдөлгөх ч жинхэнэ ажил мөн шүү. Ашиглах хэрэгтэй. Улс төрдэх аксакалиуд энэ ордын ашиглалыг хэтийдүүлэн өнгөрөөж өнөөг хүрсэн шүү. Т.Аубакир харин хөдөлгөөтөхөв бололтой.
З.БАЯР
amlalt.mn
