Намууд битгий яларх л даа. Үндсэн хуулиа өөрчлөх нь гарцаагүй гэчихээд, манай намд бол онцын таашаалтай биш байна, гэхдээ хиймээр л байна шүү дээ, манай намын залуус тойрогтоо бэлдээгүй байна, үгүй яахав дээ, тэгээд хүсэхгүй байгаа бол дүрмээр нь л тоглоё л доо гэх маягийн үгс битгий унага л даа. Ийм маягийн үг хандлага чинь энэ ард түмэнд, засаглалын завхрал, хулгай тонуулын лайд гайтсан төр улсад чинь хэтэрхий хээнцэрдэж байна шүү дээ.
Өчигдөр , бүх намууд нэг юм том асуудал дээрээ, тодруулбал Үндсэн хуулиа өөрчлөх нь зөв гэдэг дээрээ нэгдэх шиг боллоо. Эрх баригч намын Бүлгийн дарга Д.Тогтохсүрэн өөрчлөлтийг зургадугаар сарын 20 гэхэд хийчихнэ гэж олонд сонордуулж.
Ардчилсан нам гэж учраа, мутраа үл олсон нам дөнгөж сая нэг юм эмхрэв. Эмхрүүт л ардчилалгүйн илэрхийллээр дуугарч эхлэх шиг. Л.Гантөмөр дарга Үндсэн хуулийн өөрчлөлтийг дэмжиж байгаагаа нотлоод, гишүүний тоон дээр зуугаас дээш гэсэн юм хэлж байна. Манай намын залуус тойрогт бэлдээгүй гэсэн жижиг юм хэлж.
Хүн намын Т.Доржханд Үндсэн хуулийн өөрчлөлтийг дэмжиж, мөн 152 гишүүнтэй болохыг мөн дэмжиж дуугарчээ. Ингээд парламентэд суудалтай намууд нэг дуутай болж байх шиг байна. Одоо тэгээд цаг алдалгүй ажиллацгаа л даа. Ихэрхэл догирхол, энэ жижиг, энэ том нам гэдэг өнгөнөөс хандаж пээдийцгээхээ болиод ажлаа хийцгээ л дээ.
Ардчилсан нам алингаа алдан энэ он жилүүдийг үдлээ. Лувсаннямын Гантөмөр гэж дарга нь үнэн утгаараа мөн сая нотлогдлоо. Сөрөг хүчнийхээ үүргээ гүйцэтгэсэн шиг гүйцэтгэж ажиллах хэрэгтэй байна. Монголын тулгуур хоёр намын нэгийг толгойлогчийн хувиар. Манай нам олонхи болж чадах болов уу, эс чадах болов уу гэх жижигхэн эрх ашгаар харалгүй, гучин жилийн системийн алдааг засах, төрийн тогтолцоог гацаанаас гаргах ажил дээр манлайлал үзүүлж ажиллах нь чухамдаа жинхэнэ ононо. Ингэж байж л алдсан нэр хүндээ, алдуурсан намынханаа эмхэтгэх учиртай байх.
Зуун тавин хоёр гэдэг тоо бол төлөөллийг бүрэн хангах үндэслэлтэй тоо гэдэгт судлаачид нэгэнт хөдөлбөргүй дүгнэлттэй юм билээ. Парламентын гишүүдийг хуйвалдаан, алив бурангуй лоббид үл автуулахад 120 гэдэг тоо баталгаа өгдөг бол, төлөөллийг бүрэн хангахад 150-151 гишүүн байх ёстойг олон судалгаа давхар баталгаажуулжээ. Өөрчлөлтийг хийхэд 76 гишүүний 57-гийн саналаар шийднэ. МАН дангаараа ч шийдэх бүрэн эрхтэй. Боломжтой.
Харин тэд 152 гишүүнтэй парламентыг бусад намын дэмжлэгтэйгээр байгуулна гээд хэлээд байна. Энэ уриалга хандлагыг Ардчилсан нам болоод бусад намууд нэн чамбай үзэж, асуудлыг даруй шийдвэрлэх хэрэгтэйг Д.Тогтохсүрэнгийн үг сануулаад байна. Хуулийн хугацаа, цаг хугацааны хайч тэгэж шаардаж байна.
Одоо намууд, намын дарга Л.Оюун-Эрдэнэ, Л.Гантөмөр, Т. Доржханд, бусад намууд Монголын ард түмний үнэн эрх ашгийн төлөө ажлаа асар түргэн хийцгээ. Эл бүх дэвшүүлсэн хуулийн зорилтуудаа ханган, нэг мөр даруй шийдэж, зохиролт цагт шилжих нь Монголын эрх ашиг байна.
Монголын ард түмэн парламентын ардчиллаар төрөө сонгож, удирдуулж энэ хүрсэн. Энэ он жилүүдийн алдаа завхралууд гаарснааар дэлхийд тэргүүн баялагтай Монголчууд дэлхийн сүүлд хөгжингүй явна. Энэ бол асар чамлалттай, байж боломгүй, зөвшөөрөмгүй хоцрогдлоор нотлогдож байгааг парламентын гишүүд нэн тодорхой ойлгож ажлаа шамдан хийцгээ.
Ээлт төр, эрхэмсэг ард түмэн болох зорилт мөрөөдлийн төлөө шилний цаанаас чихэр долоолгодог цаг хугацаа нэгэнт дууссан.
Манай нам хэдэн суудал авах бол гэж хуулийн гаргалгаанд санаашрахаа тас азнаад, хойшид Монгол улсад өлзийтэй юм гэдэг мөнхийн гаргалгаар ажиллацгаа.
Б.БАЯР
Amlalt.mn
