2024 оны УИХ-ын сонгуулиар Хан-Уул дүүргээс нэр дэвших сонирхолтой, бас чин хүсэлтэй, одооноос тойргоо “услаж” байж мэдэх “горилогчид” болон Хан-Уул дүүргийн иргэдийг төлөөлж сонгогдсон гишүүд дахин эсэх асуудлыг таамаглаж “Айсуй сонгуулийн анир” буландаа тоймлон хүргэж байна.
Чинбатын Номин - Соёлын сайд тэрбээр “Манай нөхөр л хүнсээ цуглуулдаг. Төрийн ажилд зүтгээд, яг үнэндээ сүүлийн хоёр жил ер гэрийнхээ ажилд оролцохгүй байгаа” гэх үгийг хэлээд байгаа Соёлын сайд Чинбатын Номин энэ дүүрэгт ирэх сонгуульд хүч үзэхээр нэн горилж байгаа бололтой юм. Юун гэрээ санах, хүнсний юм цуглуулахаас мань сайд Хан-уул дүүргээр тойромтгой болсон гэж эх сурвалж бататган өгүүлж байна. Эл дүүргээр явамтгай, уулзалдамтгай, бөөгнүүлэмтгий болсоон гэж байна. Эндээс харвал Соёлын сайд бүсгүй Хан-Уулыг онилсон нь нэгэнт тодорхой байна.
Даваажанцангийн Сарангэрэл - УИХ-д гурав дахиа сууж, гурван удаа сайд хийсэн эл эмэгтэй мөн л дэвших сонирхол дүүрэн, дүүргийн иргэдтэй уулзалт хийгээд байгаа нь харагдаад л байгаа. Ул гэдэг үгээс олж, гурав дахиа сайд болоод гуч хонолгүй ойччихсоноос хойш намынхандаа гомдолтгой, эрх мэдлийнхээ сэнтийг хадгалах бодлогод нэн шамдуу нь хэн бүхэнд харагдах. Намын дарга нь эмэгтэйчүүдийн байгууллагын даргад эс дэмжсэн, ингэхэд нь дэмжигдсэн эмэгтэй эдүгээ Д.Сарангэрэлийн сүүлд хашсан сайдын сэнтийд залагдчихсан. УИХ, Засагт гурвантаа суусан хатагтай Д.Сарангэрэл Хан-Уулдаа дахин дэвших нэн хүсэлтэйг намын нь нөхөд болоод Хан-Уулчуудын хүсэл сэдэл мэдэх биз ээ.
Ганибалын Амартүвшин - Эл ганган залуу УИХ-д сууснаас хойш огт гангарч чадсангүй. Улс төрийн агуулгаараа шүү. Гучин гурван тэрбумын асуудлаар анхнаасаа ээрэгдсэн, хорин оноос хойш. Одоо ч Хөгжлийн банкны асуудлаар тайлбар өгөөд шүүх хуралд суугаастай байна. Эх сурвалжийн мэдээлж буйгаар мань эр ирэх сонгуульд нэр дэвшихгүй, ер нь цаашдаа улс төрөөс хол байх бодолтой гэж байгаа ч 33 тэрбумын энэ тэр асуудлаа хууль шүүхээс “зэмгүй” салахыг бодож байгаа бол улс төрөөс ч нэг их холдохгүй л болов уу. Гэхдээ тэр хаана ч нэр дэвшсэн хэдийнэ сонгогчдын хувьд хар маягийн тамгатай болчихсон байх аа даа.
Жуковын Алдаржавхлан - Машид намуун, байгаа байхгүй нь эс мэдэгдэх шахуу тэрбээр сүүлийн үед энд тэнд сууж, телевизээр яриад байх болж. Нүүр нь шингэрээд, амаргүй мэс заслыг давсан дуулдсан. Эл залуу өмнө сонгуульд дэвшээд унасан, энэ удаа даагаа нэхэхээр зоримог шийдэлтэй байгаа нь харагдаж байна. Дүүргийн дарга хийсэн он жилүүдэд нэр алдар, сүр жавхлан нэг их үзүүлээгүй, ажлын хувьд ч, агуулга хэлбэрийн тухайтад ч дүүргээ сайн мэдэх хүн. Ирэх сонгуульд чамгүй хүчтэй өрсөлдөгч нэгэн байна байх. Гэхдээ намынхаа шугамаар дүүргийнхэнээ, тойрог хорооныхоо учир луужинг гаргасан болоод ингэж дэвших эрмэлзэл үзүүлэн яваа нь ойлгомжтой.
Тогтмолын Мөнхсайхан –Махны захын эзний хүү энэ залуу Хан-Уулын дэнж дэвсгээр морь хантайраатай байгаад, хачин зүтгүү байгааг хүмүүс мэдээлээд л байна. Эмч хүний хувьд дүүрэг хороогоор орж, иргэдэд үзлэг, эрүүл мэндийн зөвлөгөө өгөөд чухамхүү итгэлтэйгээр мэтгэж байгааг намын ажилтнууд, дүүрэг хорооныхон яриад л байна. “Хүчит шонхор” гээд малын махны маш том арилжааны, ченжийн уулзвар болсон газрын эзэн энэ залуу Эрүүл мэндийн сайдаар ажилласан, Ерөнхийлөгчийн зөвлөхөөр ажиллаж байгаа. Амбиц ихтэй, хадгаламж арвинтай, ханагар их бэл нь эрхгүй л УИХ-ын гишүүн болоо гээд түлхээд байгаа бололтой юм, янз нь. Д.Сарангэрэл сайдтайгаа сайнгүй л гэлцэгдэх, энэ хоёр хүн ингээд нэг тойрогт шагай наадаж яваа л байх даа.
Тогмидын Доржханд - Зүүн Ази чигийн зүстэй гээд л цахимаар хүмүүс гоочлох энэ залуу нэгэнт улс төрд чухал хүн болжээ. Хүн нам Үндсэн хуулийн өөрчлөлтийг дэмжинэ, 152 гишүүнтэй болох нь зүй гээд явж байгаа. Энэ хүн бол өөрийгөө УИХ-ын гишүүнээр дахин бат тооцсон, бүр бүлэгтэй болно гэж бодож яваа хүн. Оргүй ч биш байх. Нэг үгээр хэлбэл Хан-Уулын нэг суудал энэ хүнд “эчнээ” оччихсон юм байх аа даа. Гэвч цагийн юм цагтаа, амаргүй л дээ.
Банзрагчийн Түвшин - Хан-Уулаас хоёр ч билүү дээ, Нийслэлийн хуралд сонгогдоод, хорин онд УИХ-д үзээд бараагүй. Няхуур, санхүүчин энэ залуу даагаа нэхэх нь тодорхой биз. Хал бал багатай, намуухан товариш харагддаг. Банк бус болон санхүүгийн бизнестэй энэ хүн. Эдүгээ Ерөнхий сайд банк бусын хуулийг их ярьж байгаа, энэ чиглэлийнхэнд хатуулаг л байхаар харагдаад байгаа. Хан-Уулд энэ залуу УИХ-д АН-аас нэр дэвшихийг зорьж байгаа нь тодорхой биз.
Чадраабалын Өнөрбаяр - Ардчилсан намын генсек, муугүй хуульч гэгддэг энэ залуу дахин дэвших нь тодорхой байх аа. Улс төрийн үйл явдлуудад, зарчмын байр сууриудад маш идэвхтэй оролцож байна. С.Эрдэнэ талаа баримтлагч харагддаг. Ардчилсан нам дотроо шинэ хуваарлилт хийж эхлэх юм гэсэн. Ч.Өнөрбаяр АН-ын генсек дахин болох магадлалтай гэгдэж байгаа. Хан-уулд энэ хэрээр “үзэх” магадлал өндөрсөх болов уу.
Б.БАЯР
Амлалт.мн
