МАН-ын 2020 оны УИХ-ын сонгуулийн мөрийн хөтөлбөрийн ХӨГЖИЛД ХӨТЛӨХ МЕГА ТӨСЛҮҮД дэд бүлэгт “Газрын тос боловсруулах цогцолборыг ашиглалтад оруулж, нефть-химийн үйлдвэрийн суурийг тавина” хэмээн заасан.
Энэтхэгийн Засгийн газраас олгосон нэг тэрбум ам.долларын хөнгөлттэй зээлээр барих тус нефтийн үйлдвэрийн шав тавих ёслолын арга хэмжээ 2018 оны 06 сарын 22-ны өдөр Дорноговь аймгийн Алтанширээ сумын нутагт болсон.
Тус ёслолын арга хэмжээнд Энэтхэг улсаас Дотоод хэргийн сайд Ражна Сингх биечлэн оролцсон байдаг. Шав тавих ёслолд оролцсон тухайн үеийн Ерөнхий сайд У.Хүрэлсүх хэлсэн үгэндээ “Энэ үйлдвэр бол Монголын ард түмнийг шатахуунаар хангах хамгийн том үйлдвэр гэж би хувьдаа ойлгож байгаа. Өөрөөр хэлбэл, Монгол Улсын эдийн засгийг хөл дээр нь босгоход тус үйлдвэр бидэнд хамгийн чухал нөлөөлнө. Жил ирэх тусам шатахууны үнэ нэмэгдэж, Засгийн газар үнээ барьж чадахгүй байна гэж ард иргэд маань шүүмжилдэг. Бид одоо асуудалд цаг зуурын байдлаар хандаж бие биенээ хуурахаа болъё. Нефтийн үйлдвэрээ хурдан баръя. Тус үйлдвэрийг ашиглалтад оруулснаар дэлхийн зах зээлийн давалгаан дээр явагдаж байгаа нефтийн үнээс бид эх орноо хамгаална. Би үүнд итгэлтэй байна. Үйлдвэр 2022 онд ашиглалтанд орно” хэмээсэн.
Энэ цагаас хойш 2 жилийн дараа буюу МАН-ын 2020 оны УИХ-ын сонгуулийн мөрийн хөтөлбөрт нефьтийн үйлдвэрийг 2024 онд ашиглалтанд оруулна гэж тусгасан.
Өнөөдөр 2023 оны 5 сарын 11-ний өдөр. Гэтэл...
Салбар хариуцсан УУХҮ-ийн сайд Ж.Ганбаатар болон холбогдох албаны хүмүүс энэ үйлдвэрийг 2026, 2027 онд л ашиглалтанд орж магадгүй хэмээн өөрөөсөө холдуулсан назгай хариулт, хандлагатай сууж байх.
Тиймээс нефтийн үйлдвэрийн шавийг тавихад оролцон, энэ үйлдвэрийг байгуулах ёстой гэсэн чин сэтгэлээр хандаж, зүтгэж байсан Ерөнхийлөгч У.Хүрэлсүх та энэ асуудалд бичлэн анхаарахгүй бол ажил нь урагшлахгүй, амжилт нь харагдахгүй болоод удаж байна.
Эл үйлдвэрийн шав тавигдаад 7 жил, 2020 оны сонгуулийн мөрийн хөтөлбөрт тусаад 3 жил болсон ч өнөөдөр үйлдвэр баригдах бүү хэл тэндэхийн бүтээн байгуулалтад оролцсон хувийн хэвшлийнхэн оруулсан хөрөнгө мөнгөө ч авч чадахгүйд хүрч, банкны зээлд баригдан, хууль шүүхийн хаалга татахдаа тулаад байгаа аж.
“Ухаангүй ноёнд урагшгүй албат” гэгчийн үлгэрээр “Монголын газрын тос боловсруулах үйлдвэр” ТӨХХК-ийн гүйцэтгэх захирал Д.Алтанцэцэг гэдэг хүн дээшээ сайд дарга нарт ташаа мэдээлэл хүргэж, доошоо гүйцэтгэгч компаниудаа дээрэлхэж, ажлаа урагшлуулахгүй гацаасаар нефтийн үйлдвэрийн ашиглалтанд орох хугацаа хойшилсоор байна.
Зүй нь бол Д.Алтанцэцэг гэдэг хүнээс өөр зарчимч, ажил хэрэгч, шударга, сайн менежер хүнээр энэ үйлдвэрийн төслийг удирдуулсан бол өнөөдөр Засгийн газар ард олонд хэлэх үгтэй, хийгдсэн ажилтай, бүтээн байгуулалт нь урагштай, МАН ч мөрийн хөтөлбөр нь тэдэн хувийн биелэлттэй гэж ам бардам хэлээд сууж байх санж.
Нэмж хэлэхэд “Монголын газрын тос боловсруулах үйлдвэр” ТӨХХК-ийн гүйцэтгэх захирал Д.Алтанцэцэг гэдэг хүн юм бол “Би Ерөнхийлөгч У.Хүрэлсүхийн хүн, миний ард Ерөнхийлөгч байдаг” гэсэн хандлагаар сайд дарга нар, албан тушаалтнуудад хандаж “даам” гарсаар удаж байгаа гэнэ.
Тиймээс Ерөнхийлөгч У.Хүрэлсүх та өөрийн эхлүүлсэн нефтийн үйлдвэрийн ажлыг урагшлуулья гэж бодож байгаа бол энэ хүнийг даруй албан тушаалаас нь өөрчлөх ёстой гэдгийг эрхбиш нэг тунгаана буй за...
А.Галт
Амлалт.мн
