Анхдагчдын өлгий гэгддэг Булган аймгаас сонгогдож, Булганчуудыг төлөөлж хоёронтоо УИХ-ын гишүүн болсон энэ эрхэмийг эцгийн овгоос нь илүү “Сахал” Бат-Эрдэнэ гэж хүмүүс нэрлэх нь бий. Мань эр нэгэн цагт БСШУЯ-ыг толгойлж байсан, нутгийн ах УИХ-ын гишүүн асан Ё.Отгонбаярыг лоббидож явсаар, төд удалгүй туслаж дэмжиж байсан Ё.Отгонбаяр ахынхаа тойргийг булааж хуншгүй загнасан гэж Булганыхан ярих юм билээ.
Ж.Бат-Эрдэнийг ЗТХ-ийн сайдаар ажиллаж байхад яаман дээр нь эрдэнэт хүний амь үрэгдсэн харамсалтай хэрэг гарсан. Уг гэмт хэрэг сайд Ж.Бат-Эрдэнийн өрөөнөөс эхлэлтэй архидалтаас үүдэлтэй, хохирогч талийгаачийг ажлаа өгөхийг сайд нь шаардснаас болсон гэдэг.
Сахал гишүүн үе үе хэвлэлийнхэний бай болчих гээд байдаг гэмтэй. 2020 оны УИХ-ын сонгуулийн үеэр С гэх эмэгтэйтэй холбогдсон тухай зураг хөрөг бүхий мэдээлэл сошиалаар нэг хөвөрсөн. Гэхдээ энэ бидний ярих сэдэв биш.
Энэ эрхэм 2020 онд Булган аймгаас УИХ-ын сонгуульд нэр дэвшихдээ өөрийнхөө намтараар ном бичиж, түүндээ өөрийгөө эгэл бор амьдралд дунд өссөн жирийн жолоочийн хүү гэсэн агуулгыг илэрхийлэхийг зорьсон байдаг.
Гэвч хоёронтоо УИХ-ын гишүүн болсон түүний амьдрал өдгөө эгэл бор амьдралаас хэдийнэ “тасарчихсан” бололтой. Түүнийг нотлох мэт 2019-2021 онуудад түүний хөрөнгө орлогийн мэдүүлэг дэх өөрийн орлого нь жил тутам өсжээ.
Саяхан мань эр УИХ-ын дарга Г.Занданшатарын “даалгавраар” иргэдийн дунд орж “судлах” зорилгоор явахдаа “би 7 хоногт хүнсэндээ 200 мянган төгрөг хэрэглэдэг” гэсэн нь олон нийтийн ярианы бай болов. Гайгүй ресторанд ганц удаа аятайхан хооллоход бараг 100 гаруй мянган төгрөг болчихсон, 1 кг үхрийн махны үнэ 20 мянган төгрөг давчихсан байхад иргэдийн амьдрал мэдэхгүй попорлоо гэх сошиал шүүмжлэл түүнийг дайрсан.
Сахал Бат-Эрдэнэ Булганчуудыг 7 жил төлөөлж УИХ-ын гишүүнээр ажиллахдаа “Булган аймгийг хэрхэн хөгжүүлэв, иргэдийн ажил амьдралыг сайжруулах чиглэлд ямар арга хэмжээ авав, улс орны хэмжээнд үр дүнгээ өгөхүйц ямар хууль санаачлан батлуулав, эсрэгээрээ Ж.Бат-Эрдэнэ хэрхэн хөлжив” гэдгийг Булганчууд түүнээс асуух цаг хэдийнэ болсон биз.
Булган аймаг бол аялал жуулчлал, газар тариалан, айраг цагаан идээ, төрөлжсөн мал аж ахуйг хөгжүүлж болох хамгийн боломжтой аймаг. Энэ чиглэлд зөв бодлого, оновчтой менежмент хэрэгжүүлж чадвал Булганчууд, цаашлаад монголчуудын ахуй амьдралд бодит хувь нэмэр бий болно.
Манай гишүүдийн нийтлэг жишгээр Сахал гишүүн ч гэсэн фэйсбүүкээ УИХ-ын чуулганд “оновчтой байж мэдэх” хэдэн үг хэлсэн, Булган аймаг, сумдуудаа очиж ажилласан, тэргүүний сайчууд, улсын аваргууддаа шагнал гардуулсан тухай фото зураг, дүрстэй мэдээгээр дүүргэжээ.
Гэсэн хэдий ч бодит байдал дээр харамсалтай нь Сахал Бат-Эрдэнэ гишүүний хөгжлийн тухай бодлого нь босгоноос давж чадахгүй байгаа нь тэр үү, угаасаа улс орны хөгжил урагшлахгүй байгаагийн илрэл үү Булганчуудын амьдрал мэдэгдэхүйц сайжирчихсан зүйл алга л байна.
Дээр нь МАН-ын, Ж.Бат-Эрдэнэ гишүүний Булган аймагт хийхээр амласан амлалтууд хэрхэн хэрэгжив гэдгийг та бүхэн нэг тунгааж үзээрэй.
Тиймээс дараа дараачийн сонгуулиар Булганчууд хоёр удаа сонгоод “хоосон хонохдоо” тулсан сахал Бат-Эрдэнэ гишүүнээ дахин сонгох эсэхээ эргэж нэг тунгаан бодно буй заа.
А.Галт
Амлалт.мн
