УИХ-ын гишүүн Гочоогийн Ганболд нүүрсний асуудлаар сонсгол хийх хөг өнгөрч байх шиг байна. Ямар ч л байсан энэ хүн Хөгжлийн банкны асуудлаар сонсгол явуулж, цаана нь гарсан Б.Энхбаяр шиг байж чадсангүй. Чадахгүй юм байна гэдэг нь тодорхой боллоо. Г.Ганболд нь жижигдээд байгаа юм уу, нүүрсчид нь томдоод байгаа юм уу гэдэг асуулт гарвал жижигдэж байгаа нь үнэнд дөхөх. Нүүрсний хулгайн асуудлыг шалгах ажил үндсэндээ зогсонги байдалд орлоо. Гурван гишүүн чөлөөлөгдсөн. Өөрөөр дэвшилгүй энэ асуудал ингээд бүдгэрээд Үндсэн хуулийн өөрчлөлт гэдэг сэдэв рүү далдарлаа.
Гочоогийн Ганболдыг спикер Г. Занданшатар хариуцлага хүлээ гэж мэдэгдсэн гэнээ гэж мэдээлэл гарч. Сонсголоо хийж чадахгүй байна аа, Түр хорооны даргаасаа болио гэсэн бололтой юм. Аль эрт л ингэх болсон. Г.Ганболд ч гэсэн барахааргүй, цаана нь гарч чадахааргүйгээ мэдсэн бол эртхэн би больё оо, миний дөнгөхгүй асуудал байна аа гээд больчих байсан нь өөрт нь нэр хочгүй байлаа.
Яах Вэ, Г.Ганболд бараагүй л дээ гэдэг л үгтэй үлдэх байсан. Одоо бол бүр олон асуудалтай боллоо. Хамгийн наанадаж энэ хэрэгт сэжиглэгдсэн УИХ дахь хүмүүс холбогдолгүй гэдэг бичигтэй болчихсон. Авлигатай тэмцэх газраас нэг нэг тийм бичиг аваад хавтаслаад олноо үзүүлж яваа. Гүтгэгдсэн хүмүүс ээ гээд. Б.Баттөмөр, Ц. Сэргэлэн нараас эхлээд. Ингэхээр чинь Г.Ганболдод хэлэх үг олдохгүй болоод, ингэж ээдэрч гацсаар, энэ хүрчихлээ.
Өчигдөр Г. Ганболдыг өөрчилж С.Ганбаатараар сонсголыг удирдуулахаар болсон мэдээлэл байна. Босоо Ганбаа Гочоогийн Ганболдоос мэдээж илүү ажиллана л даа. Шартай ч, хортой ч.
За, юутай ч Гочоогийн Ганболд гэдэг хүн ингээд нүүрсний сонсголыг удирдаж чадаагүйгээр, нүүрсний асуудал ард түмэнд хэчнээн их хилэн уурыг бий болголоо, яг тэр хэрээр л олноо олхиогүй Г.Ганболд гэж хэлэгдэхээр болчихлоо. УИХ-ын гишүүн байна гэдэг анхнаасаа амаргүйтэй тулж, үнэн шударгад суурилах учиртайн тул Г.Ганболд ч тангарга өргөөд л ороод ирсэн. Өвөрхангайн Засаг дарга нар байсан хүмүүс УИХ-д олон . Тэр жишгээр харайлгаад ороод ирсэн. Гишүүн байхынхаа аралд тэнцэнэ гэж амаргүй юм байдаг аа. Энэ эдүгээгийн олон гишүүнд байдаггүй нь Г.Ганболдоор тогтохгүй.
Тэр жил Л.Мөнхбаясгалан Баянтээгийн уурхай болоод Өвөрхангай дахь нүүрсчдийн асуудлаар цуврал сурвалжилга хийгээд, Г.Ганболд Засаг дээр ороод асуулт тавихаар мань эр “Яагаад болохгүй гэж...” гэх маягийн юм яриад суугаад байсныг ард түмэн санаж байгаа. Одоо бол сонсголоо яагаад хийж чадахгүй байна гэхээр “Яагаад болохгүй гэж ...” гэх байдлаар хээвнэгтэх ямар ч боломжгүй юм.
УИХ маань нэр хүндээр тун базаатай биш байна. Бүгд л харж байна. Эрх баригчид жаран хэд хэдээрээ дараалан УИХ-д суусан ч, олдохоороо өлдөхийн зовлонтой тун амаргүй байгаа билээ. Ийм үед гишүүн нэг бүр чансаагаа харуулж, ажлаараа нотолж байх учиртай юм. Тэгэхгүй байна.Тийм болохоор ард түмэн УИХ-ын талаар тааруу бодолтой байна гэх Д.Тогтохсүрэнгийн үг худалгүй байна.
Г.Ганболд бол Д. Тогтохсүрэнгийн замаар яг гэзэг даран явж , УИХ-ын гишүүн болсон. Д.Тогтохсүрэн Г.Ганболдыгоо “томруулж”, “тордож” чадахгүй энэ хүрч байгаа юм болов уу даа. УИХ-ын сонгууль болоход нэн ойртжээ. Г.Ганболд одоо гарааны зурхай дээр байна уу, барианы зурхай дээр байна уу гэдгийг олон түмэн хэлэх биз. Өвөрхангайнхан ч “сайхан” сонгох олон түмэн юм даа.
Б.БАЯР
Amlalt.mn
