Ардын намын удирдлагууд нэг зүйлийг хэлээд байгаа. Тэр нь ирэх сонгуулиар үе солино шүү, нийт нэр дэвшигчдийн бараг ная , ерэн хувийг шинэ хүмүүсээс дэвшүүлнэ гэдгээ хэлээд байгаа. Үүнээс үүдээд юм уу Ардын намын хуучин хулгарууд, гурваас илүү сонгогдсон нөхдүүд тойрогт очиж хүчээ үзнэ, дүнгээ тавиулна гэх байдлаар “хүрхрэх” болсон байна лээ.
Энэ нь айлгаж байгаа юм уу, аархаж байгаа юм уу, нэг их сайн ойлгогдохгүй л байгаа юм. Бид дөрөв, тав дахиа сонгогдоно, бид өөрсдөө мэдэж байна гэж, намын дарга нартаа бас сонгогчдод л аархаад байгаа юм шиг харагдах. Энэ нэг хэрэг. Харин Ардын намын наяад оны дарга нараас өөр нэг сонин хүлээлт нийгэмд байна.
Тэр нь, Ардын намын боломж, ард түмний сонголтоор насаараа эрх мэдлийн хишиг буян хүртсэн нөхдийн, үе дамжсан, мөнөөх эдүгээ хэцүү нэртэд байгаа Д.Мөнх-Эрдэнийн хэлдэг шиг дабль стандартынхан.
Нямдоржийн Анхбаяр. Гадаад яамны Төрийн нарийн бичгийн дарга. Энхтүвшиний Золбоо. Барилгын яамны дэд сайд. Энхболдын Одмөнх. Төрийн ёслолын албаны дарга. Ганзоригийн Тэмүүлэн. УИХ-ын гишүүн. Энхбаярын Батшугар. УИХ-ын гишүүн. Ганбямбын Дөлгөөн. Монгол банкны тэргүүн дэд ерөнхийлөгч. Энхболдын Анар. Монгол банкны газрын дарга. Батболдын Баттүшиг. МҮОХ-ны ерөнхийлөгч.
Ингээд харвал МАН-ын ханагаруудын хүүхдүүд бүгд төрийн өндөр дээд албан тушаал эзлэн, үе дамжин төр засгийг эзэгнэн суусаар. Саяхан булхай нь илчлэгдсэн Боловсролын зээлийн сангийн санхүүгээс ихэнх нь эдгээр хүмүүсийн боловсролд зарцуулагдсаныг Монгол даяараа харлаа. Ерэн оноос хойш буюу лавтайяа, гуч гаруй жил эдгээр хүмүүс, эдгээр хүмүүсийн хүүхдүүд Монголын боломж дээр туйлж ирлээ гэвэл арай худлаа гэж хэлэхгүй байх.
Энэ хүмүүс, хүүхдүүдийн нь замыг харахаар туж өгсөн, дараа дараачийн албан тушаалуудаа залгамжлан өвлөсөөр. Монгол Ардын намын дарга нар нэг хууль УИХ дээр явуулаад байгаа. Тэр нь нэг айлаас нэг л хүн төрийн өндөр албан тушаалтан байж болохоор ойлгогдоод, нийгэм ч хүсэн хүлээн хараад удлаа. Батлагдах гээд л байх шиг байна.
Л.Оюун-Эрдэнэ , Д.Амарбаясгалан нар одоо эдгээр хүмүүсийг УИХ-д нэр дэвшүүлэх үү, үгүй юү гэдгийн хариулт ард түмэнд тун сонин байна. Дэвшүүлэх бөгөөс хэрхэн юу гэж тайлбарлах нь маш сонин. Үргэлжлүүлэн төр "өвлүүлэх" ажлыг хийлгэнэ ээ гэх юм уу, яг юу гэх юм, сонин. Үгүй ээ, дэвшүүлэхгүй гэвэл бас яг ямар тайлбар дагалдах нь хүлээлттэй.
За нэг зүйл бол тодорхой. Бүх боломж дээр лаахайдсан эдний дабль стандартыг цэглээсэй гэдэг монголчуудын хүсэл бол гарцаагүй байгааг бид өдөр бүр харж байгаа. Д.Амарбаясгалан гэдэг хүн төрд Засгийг ч, намыг ч дээд эрэмбээр удирдаж байна. Тиймээс мань дарга одоогоос, тэдэнд, мөнөөх дабль стандартынханд, УИХ-д нэр дэвшихгүй шүү гэдгийг эртнээс хэлэх хэрэгтэй.
Нэр дэвшүүлэх бол юугаар үндэслэл татаж шилэх гэж байгаагаа бас эрт хэлэх хэрэгтэй. Ард түмний хэлэлцүүлгээр орог, аль аль агуулга нь.
Л.Оюун-Эрдэнэ дарга шүүхийг харж байна гэж үг хэлсэн. Арга бараад л. Ард түмэн харин одоо дабль стандартынхны асуудлаар Д.Амарбаясгаланг харж байна. Энэ дарга ойрд сахал Д. Эрдэнэбилэг нарын асуудлаар маш тодорхой байр суурьтай байна.
Яг үүн лүгээ нэгэн адил дабль стандартад тодорхой байхыг ард түмний итгэл үнэмшил түүнээс хүсэж байгаа зайлшгүй.
З.БАЯР
Amlalt.mn
