Монголчууд бид зуны сарыг найр наадмын улирал байлгадгаа болимоор байна. Ажил хэргийн , амьдралаа өөд татах улирал болгодог болохгүй бол үнэхээр болохоо байлаа.
Захгүй эх нутгийнхаа жалга судаг болгонд очоод, Балдуугийн Шаравын “Монголын нэг өдөр”-т зурагдсанаараа тарвалзаж байдгаасаа арай өөр түвшинд очихгүй бол нэн ядарч, ядуурсаар байх нь. Бүх талаар.
Наадам хийж, хорхог ханхлуулан, морь ачиж наадам хэссэн уяачид, асар хэсэж хүндлэл, сонгуулийн горь хүлээсэн улс төрчидтэй энэ нийгэм урагшлахгүй. Яг одоо монголчууд хорхогны халуун мах, цагаан архи, хойчоо үл бодох мартагналаар зуны сарыг жаргааж байна. Эмгэнэлтэй. Ингэж хорхог хордотлоо идэж, хойт хэтээ үл бодон, шимийн болоод цагаан архи , айргаар мансуурч явахын оронд нийгмийнхээ сайн сайхны тусын тулд, алдагдсан боломжуудаа нөхөж, хариуцлага ярьж, сахилга бат тооцож явах нь өлзийтэй баймаар.
Одоо монголчууд энэ өвөлжин, хаваржин ярьсан нүүрсний дөчин их наядын хулгайг хэн нь ч ярихгүй байгаа биз. Тэр талаар хэн ч санаа зовохгүй байгаа биз. Хэн ч тэрийг ярих санаачлагыг хийхгүй байгаа биз. Бид иймэрхүү л хачин ард түмэн. Орон гэрийг нь тоноод, оочих аяга, авдрын ёроолд дахь алт эрдэнэсийг нь аваад явчихсан байхад ингээд мартахын далайд “цэнгэж”, санахгүйн мунхагт автах нь аймшигтай.
Гишүүн Гочоогийн Ганболд өнгөрөгч чуулганы хаалтын хурал дээр хэлсэн үгнүүд бий. Тэр юуны өмнө УИХ-ын дарга Г.Занданшатарт дуугүй яваад байхаар дээрэлхэж байна гэж гомдоллосон. Тэр нь цаанаа, нүүрсний хулгайг шалгасан Түр хорооны ахлагчийн хувиар сонсголоо хийе гэхнээ нь УИХ-ын удирдлага хийлгээгүй шүү дээ гэсэн гомдлын агуулгыг нэвт үнэртүүлсэн. Тэгж уурлаж байгаад юутай ч Түр хорооны тайлангаа тавих шиг болсон.
Гочоогийн Ганбоод зүв зүгээр байгаагүй, бас ч юм хийсэн гэж хэлээд тайлан тавьж байгаа юм. Гочоогийн Ганболдод зовлон байсан шиг байна аа. Ямар зовлон байсан гэхээр намаас нь шахаад сонсголыг хийлгэхгүй байсан байх бүрэн үндэслэлт хардалтууд байгаа. Юу гэхээр, ерөөсөө нүүрсийг цөлмөсөн он цагийг эрхшээгч, эрхийг баригчид тэр чигээрээ Ардын намынхны он цаг байгаа. Ардчилсан намынханых ч байгаа. Тэгэхээр жаран хэдэн суудалтай намаараа Засгийг найман жил зайдагнасан Ардын намынхан нүүрсний дөчин их наядын хулгайн сонсголыг хийлгэсэнгүйеэ дээ гэдгийг ард түмэн тов тодорхой мэдэж байна.
Анх хулгайд АТГ-ээс зарлагдсан А. Анандбазар, Б.Баттөмөр, Ц. Сэргэлэн нараа мөн байгууллага төдхөн холбогдолгүй ээ гээд бичиг цохолтоор илэрхийлчихсэн. Ийм л учир шалтгааны улмаас Гочоогийн Ганболд гишүүн сонсголоо хийж чадаагүй нь мөнөөх дуугүй яваад байхаар УИХ-ын удирдлага дэндүү дээрэлхэж байна гэдэг гомдлоор нь нэв шувт ойлгогдож байгаа юм.
Одоо нүүрсний хулгайн хариуцлагын асуудал бүрхэгдүү боллоо. Засаг, төрийн бүх ажлыг гардагч Хууль зүйн сайд Х.Нямбаатарт л хамаарах төлөвтэй, тийм чигтэй байгаагаар нийгэм ойлгож байгаа.
Х.Нямбаатар одоо энэ асуудлыг жинхэнэ утгаар нь яримаар байна. Халтал нь, нийгэм сэртэл ярьж , буруутнуудыг гэсгээж, хохирлыг төлүүлэх, хариуцлагыг хүлээлгэх ажлыг хиймээр байна.
Г.Занданшатартай уулзаад яагаад энэ асуудал Гочоогийн Ганболдын үед олигтой яваагүйг асууж, тодруулж, мухарлаж бас эргээд Г.Ганболдтойгоо уулзаж, юу тээг түвэг болсоныг тогтоож, нийгэмд зарламаар байна.
Хишгээгийн Нямбаатар ажилламаар байна. Монгол улс дөчин их наядын хулгайгаа тоохоо байтлаа баяжаагүй, баяжаагүйгээр үл барам авлигын үертээ урсаад, усны үерээс халгаатай болсоныг Х.Нямбаатар мэдэж байгаа.
Б.БАЯР
Amlalt.mn
