Он цагуудын өмнө Цахиагийн Элбэгдорж нүүх үү, үлдэх үү гээд л, улмаа Хархоринд нийслэлээ төвлүүлье хэмээснийг эдүгээн төр засаг албажуулаад байгаа. Ерөнхийлөгч санаачлан Засаг бодит үйл ажил болгоод явж байгаа. Ажлыг Засгийн гишүүн газрын Ц.Даваасүрэн удирдаж байгаа. Энэ үйлс болбоос туйлын зөв агаад тэртээ л Ээбээгээ дуугарч байхад нь улсаараа ажил хэрэг болгосон сон бол эдүгээ Улаанбаатар сая таван зуун хүнээрээ хотолзож, үерт автаж, бетонон ширэнгэ болохгүй байсаныг худлаа гэхнээ, үүнээс илүү дээр нөхцөл энэ хотод үлдэх байсанд хэн ч эргэлзэхгүй буй.
Нийслэл Улаанбаатар хот авлигын хорлол болж, газрын наймааны бай болж, эрх мэдэлтнүүдийн шунал тачаалын хордлогын суурь болохгүй байж болох байсан уу гэвэл болох л байсаныг түүх хэлээд өгч байна. Одоо хожимдсон ч илүү дордохгүйн тулд, Хархорум хотоо даруй барьж босгох ажилд иргэн бүр анхааран дэмжээсэй гэж үнэхээр чин итгэл үнэмшлээс уриалам.
Хот маань өнөөдөр үерийн усаар тарсан өтгөн шингэний шингүүр, иргэд нь аюулгүй, баталгаагүй, стандартгүй орчны туршцууд болоод удлаа. Эрх баригчид нь, албан тушаалын сэнтийд суугсад нь өөрсдийн эрх ямбыг л гагц бодон, шунал тачаалаа өндөрлөх суурийг эл хотоор бүх цаг үед тавьсныг энэ зуны үерийн үйл явцууд төгс харууллаа.
Авлига хороолол, Сэлбэд сэлсэн “S OUTLET” гэгчээс эхлээд сонгодгоор бидэнд ойлгууллаа. Одоо эрх мэдэлтнүүд эдгээр барилга, “хогийн ургамлуудыг” нураана, нураахгүй гээд л сууцгааж байна. Эзэмшигчид нь ер нь л салаавч үзүүлэх маягтай. Аргагүй л дээ. Авлига гэгчийг нь амаар нь гартал өгсөн биз. Тэрэндээ лаахайдаад манай хотын удирдлагуудыг хөдөлгөхгүй янзтай.
Ямар сайндаа л цахим шог контентуудад Д.Сумъяабазарыг “Түргэн өвөл болоосой” гэж хэлүүлж байхав. Нөгөө талд Б.Чойжилсүрэн “өвөл битгий болоосой” гэх маягийн залбиралтай сууж байгаа. Зуны цаг тул иргэншин буй нүүдэлчдийн маань ихэнх нь хээр талд одож. Одоохондоо хот арай сэлүүн байна. Ирэх сар гараад баахан удалгүй түгжрээ “хүрхэрч” эхэлнэ.
Түгжрэлийн Сүхээ сайд дээлэндээ багтахгүй хилэнтэй, дэргэдэх ард түмэн түүнээс ч илүү хилэнтэй цаг хугацаа мөдхөн айсуй. Манай улсын үнэн нүүр царай, манай хотын төгөлдөр илэрхийлэл ийм л буй бөлгөө. Хойт нутгаас татаж ард түмэндээ шахдаг Ц.Анандбазар, Б.Баттөмөр хоёрын шатахуун Улаанбаатарын зам дээр хөдөлгөөнгүй машинуудын хөдөлгүүрт шатаж, нийслэлийн маань тэнгэрт утаа угаар олгойдон, ард иргэдийн уур цухал амаараа хальж, машин зам, түгжрэл дунд гар зөрөлдөн заамдалцах нь үйлийн үр. Сая наадмын өмнөх хоёр гурван өдөр Улаанбаатар зүгээр л царцан зогссон.
Гадаадын дарга нарын айлчлал, мөн Хөрөнгө оруулалтын чуулган давхцаж, манай улс хөрөнгө урих бус, хүмүүсийг залхаагчдын орчин болохоо л илэрхийлсэн үйл явдал болж өнгөрсөн. Үүний буруутан хэн бэ. Төр засгийг удирдагчид. Он он жилүүдэд эрх мэдлийн халуун сэнтий эзлээд, хамаг ард түмнээ эдүгээн цухалд авчирагсад. Өөр хэн ч биш. Одоо тэд маань 76 байгаад, эдүгээ 126 болох хуулиа баталчихсан.
Г.Занданшатар дарга ирэх парламентын 126-г, ирэх онд Хархорумд дугуй том гэр бариад хуралдуулдаг болох хэрэгтэй. 126 гишүүн нь тэндээ ажиллаад, хотоо босгох хэрэгтэй. Засгаа хянаад. У.Хүрэлсүх Ерөнхийлөгч санаачилсан ажлаа газар дээр нь хянаад, Хархорум хотоо нэн даруй босгож, Засаг төрөө тэндээ төвлүүлэн Улаанбаатарыг чөлөөлөхгүй бол үнэхээр болохоо байгаад удлаа. Шагдарсүрэнгийн Гүрбазарын хэлээд байдаг дэлгэсэн тэрлэг шиг нутгийнхаа энгэрийн шилбийн утсын чинээ орчинд эх орны иргэдийн тал ингэж амьдрах ёсгүй. Хархорумаа нэн түргэн төвхнүүлье. Ц.Даваасүрэн сайд минь ажиллаж үзээч. Хархорумаа түргэл.
