Сайд Х.Нямбаатар шарилж устгуулах тушаал гаргав. Хоригдлуудаар гүйцэтгүүлнэ, нийтэд тустай хөдөлмөрийн агуулгаар. Зөв байна. Ингэх ёстой. Ерөнхий сайд АНУ-д явж одсон. Хэрэг эрхлэхийн Д.Амарбаясгалан Хантайширын 100 тэмдэглэж яваа. Засгийг Х.Нямбаатар ахалж байх шиг байна, яг эдүгээ. Өчигдөр Оюутолгойн ажлын эрчимжүүллийн агуулгаар хуралдав бололтой. Буруу хараагүй бол Х.Нямбаатар Ерөнхий сайдынхаа суудалд суусан харагдана билээ. Б.Чойжилсүрэн, П.Сайнзориг нарыг зүүн баруундаа суулгасан үзэгдсэн. Ажилсаг хүн л дээ.
Ямартаа л бүх чухал ажлыг Х.Нямбаатар ахалдаг гэдэг дээ. Сайд саяхан Завханы Нөмрөгийн ойд яваа харагдсан. Тэгсхийгээд л ажлын өрөөндөө орж ирээд, идэвхийлээд, шаламгайлаад шарилж тасдуулахаас эхлээд эрмэлзэл төгс ажиллаж эхэллээ. Шарилж устгагсдыг цагийн бүртгэл, ажлын гүйцэтгэлээр хянах, амны хаалт , бээлий зэрэг хөдөлмөрийн аюулгүй байдлын зэвсэглэлээр хангаж ажиллахыг тушаалдаа нэн тодорхой дурдсаныг үг үсэггүй цахим сайтууд мэдээлж. Уул нь, Х.Нямбаатар сайд АТГ, Цагдаагаа цагийн бүртгэл , ажлын гүйцэтгэлийг нь нэн хянаж, ажилд нь хэрэгтэй зүйлээр илүү хангамаар байгаа юм. Энэ учрыг дөчин их наядын нүүрсний хулгайг шийдэх асуудлаар ард түмэн нэхэж хэлээд байна.
Энэтээ, тэнтээ 100 жилийн ойнууд шил шилээ даран болж, ард түмэн хорхог боодгоо идэхийн завсарт, амандаа ярьж байгаа юм нь нүүрсний дөчин их наядын хулгайн асуудал л байна гэж хол ойроос ирэгсэд өгүүлж байна. Ой болж, наадам хийвч, миний амьдралд, бидний боломжид юу нэмэгдэв, юу тэтгэв гээд амьдралын чанараа дүгнэдэг, цэгнэдэг болж байгаа юм байна, ард түмэн. Сайд дарга нар асрын голыг эзэлж, дээр суун, дээж идэвч бидний амьдралд, шударга ёсны тэнцэтгэлд ямар дээж барив аа гээд асууж, төв асрын тийш шазууртай хардаг болсон байна гэж Алтайн хөх харчууд, Хэнтий ханы эрс ярьдаг болцгоож. Энэ бол ард түмэн найр наадмын унтуулгаас, насны идэрт, амьдралын эхэнд шударга ёсыг үгүйлж, түүгээр цангаж байгаагийн илэрхийлэл мөнөөс мөн.
Өнөөдөр Хантайширын 100 жилийн ой өндөрлөнө. Засгийг ахалж байгаа Х.Нямбаатар сайд, Ерөнхий сайдаа ирэхэд нь Засгийн танхимаа бүтэн ирцтэй байлгаж, яам тамга, ер нь бүх түвшинд ажил хэрэгч төлөвтөө шилжих хэрэгтэйг эрхбиш ухаарч байгаа биз. Нүүрсний дөчин их наядын хулгайг шийдэх асуудал үндсэндээ бүх талаар, Засгаас ч, УИХ-аас ч, ард түмнээс ч ерөөсөө Х.Нямбаатар дээр ирээд зогссон. Х.Нямбаатар одоо үүнийг шийдэхгүй, алгуурлаад байвал ард түмэн илүү хилэгнэнэ. Ардын нам ирэх жил сонгуульд горьгүй болно. Дөчин их наядын хулгайгаа шийд ээ. Авсан хүн нэг тамтай, алдсан хүн арван тамтай гэж үг байдаг. Алдсан там аравтай ард түмэн үүний нэхлийг хэзээ ч тавихгүй байх шүү.
Нүүрсний хулгайн асуудлаа шийд, Х.Нямбаатар сайд аа. Улс төрийн шарилжуудаа устга, хариуцлага тооц, Х.Нямбаатар сайд аа. Өөрийн тань нэрийн эхний үетэй адил нэр бүхий нэгэн хүн хорин жил яг өөрийн чинь ажлыг хийгээд, эцсийн цамцаа урагдтал “тэмцсэн” ч энэ улсад хуулийн засаглалын сайн өв үлдээсэнгүй. Ийм учраас Х.Нямбаатар түүний араас орж, түүхий үлгэр домог болох гээгүй л юм бол дөчин их наядын нүүрсний хулгайчаа ол. Х.Нямбаатар сайд таныг ард түмэн хэрхэн ажиллаж дөчин наядын хулгайг яаж илрүүлэх нь вэ гэж өдөр бүр харж байна.
Б.БАЯР
Amlalt.mn
