Даншиг наадам болж, наадмын үеэр бороо их орж, үерийн улмаас дөрвөн хүний амь эндэв. Хотоор нэг машин урсаж, лаг шавар, өтгөн шингэн тарж, үүний ланчгийг ард иргэдээрээ үүрээстэй.
Өнөө жилийн цуутай найр наадмууд өндөрлөх төлөвтэй байх шиг байна. Одоо тэгээсэй билээ. Хотын дарга үерт үйгсдэд байр сууц, гэр орон өгч нийгмийнхээ сэтгэл зүйг “аргадаж” сууна.
Гэсэн ч аргадагдахаасаа өнгөрсөн дөө. Энэ улсад ажил хийж, хариуцлага үүрч, ард түмэн, эх орныхоо төлөө гэх чин хүний эрэлд бүх ард түмнээрээ гарсан байна.
Гэтэл гурваас дээш удаа Их хуралд суугсад аанай л дахин суух гээд зунжин “ажиллаж”, бэлэг сэлт тараан, бэлчээр дамнан хөдөө хотгүй явж байна.
Сая Хэнтийн наадамд Б.Наранхүү том жийп гурвыг лавтайяа өгч, тэнд бөх морь байллаа гэж хэвлэл мэдээллээр зөндөө мэдээллээ. Тэдгээр жийпний нэг нь таван зуун сая төгрөг байх. Нийлээд тэрбум илүү төгрөг гэсэн үг. Тэр мөнгөөрөө Б.Наранхүү үерийн голомтод байгаа хүмүүст тусалсан бол жинхэнэ буян болох байв.
Тэгэхгүй юм л даа. Зорилго нь их өөр учраас. Дундговийн Наранхүү яахаараа Хэнтийд тэгж өгөөмөрлөдөг нь тааж ядах юмгүй ээ гэж хүмүүс ярьж байна. Эрх мэдлийг эрхшээж буй Хэнтийнхэн эдүгээ Монголын бүхий алба дээдийг хашин буйн учир тэгж байгаа юм гэж байна. Мөн өөрийгөө ингэж инжлэн даатгаж байгаа хэрэг гэх.
Бас эгч Б.Саранчимэгээ ирэх сонгуульд дэвшүүлж өгөөрэй гэж яваа юмаа гэж хэлж байна, энэ олон түмэн. Үүнийг нь батлах мэт Н.Саранчимэг Дэлгэрхангайн наадамнаа тайзан дээр Сү.Батболдтой ханалаад, энэ нутгаа үргэлж санан, үргэлж дээдэлж явдаг, удахгүй би сонгогдохоор ирнэ ээ гэсэн утга бүхий үгийг хэлээд зогсож байна.
Үер болоод байгаа Баянзүрхээс хоёр сонгогдсон хүн л дээ, уг нь. Манайхны, манай улс төрийнхний өгөө аваа, өрөөл бодол нэг иймэрхүү л явж байна. Өнөө зуны энэ их найр наадамд зориулсан мөнгийг, үерийн бүсэд хотоо аврах, хотоо дархлаажуулах ажилд зарцуулсан сан бол мөн ихийг бүтээх байсан даа гэж эрхгүй бодогдом.
Архангайнхан сайхан наадлаа л гэсэн. Адаг эцэст төрийн далбаа тугийг хөсөр хаян байгаа нь цацагдаж, бас л олны эгдүү зэвүүг хүргэв.
Төв аймгийн наадамд улсын заан Б.Батмөнх гэдэг хүн үзүүр түрүүнд уурлаад л, унаад л, газар нудраад л байх юм. Тугаа ч аятайхан тойрчихгүй. Ер нь энэ бөхчүүдийг сонин сонин авираа зас аа, та нар болохоо байлаа гээд баахан зүйл бичсэн Довдонгийн Данзангийн зөв шүү дээ.
Улсаараа, хаа хаанаа этик моральтай байхгүй бол үнэндээ бид зутарч байна шүү дээ. Говь-Алтай харин гэмгүй наадчихав уу даа. Элдэв юм яригдсангүй. Түрүү бөхөд 10 сая төгрөг өгч байна лээ. Хэнтийн ойд түрүүлж жийп авсан О.Хангай аварга Алтайд дахин түрүүлж энэ арвыг нь авсан.
Арван сая болж байгаа юм. Энэ ард түмнийхээ амьдралын эн чанар, үнэн байдалтай дүйцээд зөв үнэлгээ юм. Ингэж үнэнд ойр, амьдралын бодитод дөхүү баймаар байгаа юм.
Ард түмнийхээ наадамд түрүүлсэн О.Хангай арван саяын байтай байхад, авлига хахуулийн идлэг уулга нь дөчин наядаар хэмжигдэнэ. Даажинтай нийгэм шүү. Наадамлаж дууссан бол, дөчин их наядын хулгайчийг олуул, ард түмэн минь. Ингэж байж л жинхэнэ үнэн амьдрал шударга ёстой хамт урагшилна.
Б.БАЯР
Amlalt.mn
