Иргэн Х.Янжингаажидын мэдэгдэл, нийтлэл, үг үйлдлийг нийгэм тод анзаарч байгаа. Өөрөө ч аливаа юмны үндэслэл, учир шалтгааныг гойд олдог бүсгүй байна. Монголын баян бизнесмэнтэй амьдарч байгаад салсан энэ эмэгтэйд хань болж байсан хүн нь тун тоогүй нөхцөл байдлуудыг бий болгосоноос үүдэлтэй олон зүйлийг Х.Янжингаажид илчилсэн. Өнгөц харахад, нэг гэр бүлийн салж сарнисан дүр зураг харагдавч, энэ салалтыг тойрсон үйл явдлууд, Монголын нийгэм дэх ихээхэн ужиг, бусармаг, байж боломгүй үйл явдлуудыг дэлгэн үзүүлж байгаагаараа чухал юм. Юутай ч Х.Янжингаажид Монголын бүртгэлийн байгууллагын бурангуй явдлыг өөрийн жишээн дээр илрүүлж, олон түмэнд ойлгуулсан. Одоо тэрбээр, шинээр нэг үйл явдлыг мэдээлж байна. Х.Янжингаажидын эзэмшил бүхий машиныг нөхөр асан хүн нь ханилж явсан бүсгүйдээ өгөхгүй байхыг хангах үйл явц шүүх дээр явж байгаа юм байна. Х.Янжингаажидын хэлж буйгаар хулгайлсан гэдэг үндэслэл хэлж байна. Ингэж хулгайлагдахад нь шүүх хуулийнхан туслаад байгаа бололтой байна. Зүйл бүрийн шалтгаанаар шүүх хурлыг хийхгүй, бултуулан, иргэн Х.Гаажидын эдэлбэр болох машиныг хууль ёсны эзэнд нь хангаж олгохгүй байгаа явдал хоёр жил болоод явж байгаа юм байна. Одоо энэ иргэн хурлыг явуулахгүй байгаа, хохироож байгаа шүүгчдийг ил тод зарлана гэж байна. Ингэхдээ яагаад хурлыг хийхгүй байгаа учир шалтгааныг, учир зүйг бичих нь шиг байна. Энд л нөгөө шүүхийн хараат бус , нөлөөлөлгүй байх дархлаа алдагдсан байдал яригдах нь тодорхой аж. Х.Янжингаажид гэдэг эмэгтэйг хэрхэн хохирч явааг тэртээ тэргүй ард түмэн хараад ойлгочихсон. Шүүх яагаад ажиллахгүй байгааг ч ойлгож байна. Шүүхийг харж байна гээд Ерөнхий сайд Л.Оюун-Эрдэнэ ээрэгдэн асуудалд ороод байгаа. Энэ мэт гажуудал нүүрлэснийг мэдээд хараад байгаа гэж хэлээд байгаа юм билээ. Шүүх засаглал шударгаар ажиллахгүй, хаус, машин, мөнгө төгрөгөөр хараат бусаа, нөлөөлөлгүй байх ёстойгоо арилжаад байхаар энэ улс оронд юу болох вэ. Ойлгомжтой шүү дээ. Бүх дампуурал л нэрвэнэ. Нэрвэчихсэн ч байгаа. Хамгийн тодорхой илэрхийлэл нь дөчин их наядын хулгай шүү дээ, нүүрсний. Энэ хэргийг шүүх, хууль, хүчнийхэн одоогоор яагаа ч үгүй хараад л сууцгааж байх шиг байна. Энэ хэргийнг ингэж илрүүлье, эзэн холбогдогчийг олъё, ийм ,ийм учир шалтгаантай байна гэж ярьж байгаа нэг ч хуулийн хүн харагдахгүй байгаа биз дээ. Тийм илэрхийлэлгүй байгаа биз дээ. Ийм болохоор л Ерөнхий сайд Л.Оюун-Эрдэнэ шүүхийг харж байна гэдэг үгээ хэлээд, Х.Нямбаатартайгаа Шүүхийн дээд эрхийнхний хуралдайд “огцруулагдах” хэмжээний асуудалд орсон нь хэвлэл мэдээллээр гарсан шүү дээ. Иргэн Х.Янжингаажид өөрийнхөө төлөө, иргэнийхээ хувьд хохирлоо барагдуулахаар эх оронд үлгэр болохуйц тэмцлийг явуулж байна. Ийм тэмцлийг нүүрсний дөчин их наядыг алдсан, боломж бүрээ тонуулсан, Хөгжлийн банк, ЖДҮ, концесс, Боловсролын зээлийн сан тэргүүт бүх сангуудад эрх мэдэл, мэдээлэлд ойроор нь идүүлсэн хулгай дээрмийг таслан зогсоохыг ард түмэн нэхэж хийх ёстой. Ийм учраас л Ерөнхий сайд Л.Оюун-Эрдэнэ ард түмнээсээ тусламж хүснэ гэсэн гэж ойлгогдож байгаа нь маргаангүй. Нийгмийн бүх баялагийг эрх мэдэлтнүүд тонож, идэж уусан нь бүх ард түмний өчүүхэнээс өчүүхэн, маш бага хэсэг, хэдхэн хүн. Энэ бусармагуудыг хуулийнхан, шударга шүүх цээрлүүлэн , эрх тэгшийг нийгэмд дархлаах ёстой атал тэднээс шударга ёсны өчүүхэн хэлтэрхий гарахгүй, гарах "сонирхолгүй" байгаа нь шүүх засаглалд бүхэлд нь салхи оруулах цаг болсныг илтгэж байна.
