Амлалт.мн сайт УИХ-д гурав, түүнээс дээш сонгогдсон хүмүүсийг ирэх сонгуулиар халаагаа өгөх, эрх мэдлийн сэнтийгээсээ буухыг уриалсаар ирсэн. Нийгэмд үүнийг хэлэлцүүлэг болгон, тэдгээр эрх мэдэлтнүүдийг эрх мэдлээсээ азнахыг нийтээрээ зөвшин ойлгуулахыг эрмэлзэж байгаа.
Учир нь монгол эрчүүдийн дундаж наслалтын хугацааны зургааны, тавны нэгийг төрийн эрх барих дээд байгууллагад суусан эдгээр улс төрчид улс орноо дэвжээсэнгүй. Өөд татсангүй.
Нүхэн жорлонд нийслэлийн ихэнх суугаастай, утаа угаарт нийслэлээрээ баригдаастай. Гурав, түүнээс дээш сонгогдогсод тэргүүлэн улс төрчид нь нийгмийн бүх боломжоо тоносон. Эрх мэдэл, мэдээлэлд дөтийн боломжоороо бүх нийгмийн өнгөтэй өөдтэйг өөрсдөдөө наасан.
Улсаасаа баян атлаа улсдаа нэг ч станци барьдаггүй ийм л сайдууд, төрийн эрхийг он жил удаан эзэн суусан хүмүүсээр дүүрсэн. Үүнийг больё, илүү эх оронч, улсаа гэсэн, ердийн шуналгүй хүмүүсээр төрийг бариулах цаг нэгэнт болсон.
Амлалт.мн сайт улс төрийн бас нэгэн гажуудалд мэлмий хурц, үзэг цэцэн байх болно. Энэ бол Монголын төрийг үе дамжуулан эзэгнэх, барих хүсэлтнүүдийг болихыг, болиулахыг нийгэмд уриалж байгаа явдал.
Ардчилсан нам өчигдөр хуралдаж байна. Арван таван дэд даргатай болсоныг Ардын намын троллчид атгаалжин хар мангас гэж бичиж байна. Тэгж харагдахаар байх шиг байна.
Гэхдээ Монголын улс төр дэх жинхэнэ атгаалжин хар мангасууд бол үе дамжин төрийг эзлэгсэд.
Ганзоригийн Тэмүүлэн, Энхбаярын Батшугар, Нямдоржийн Анхбаяр, Батболдын Баттүшиг, Энхтүвшингийн Золбоо, Батхүүгийн Ганхөлөг, Пүрэвбаатарын Мөнхтулга, Гончигдоржийн Уянгахишиг, Батбаярын Жаргалан, Энхболдын Одмөнх, Энхболдын Анар, Ганбямбын Дөлгөөн, Сарангэрэлийн хүү Улам-Өрнөх, Цогзолмаагийн хүү Түвшинтөр, охин Баясгалан. Эдгээр нэрсийг харахад л парламентын тавны нэг болох хүмүүс харагдана.
Эдэнд юу дутсан гэж улс төр рүү дайрна вэ. Эцэг нарын нь Монголын төрийг зайдалж, дээж идэж, дээр суусан нь багадаа юу. Одоо болих хэрэгтэй шүү ээ. Монголын энэ уудам нутагт чинь бас өөр аавын хүү, ээжийн охид бий шүү дээ. Энэ л хүмүүс удам генийн оргил, ухаан санааны туйлтнууд огт бус. Дээр нь тэднийг үе улиран захир гэсэн “ултан ургийн улбаа” огт үгүй шүү дээ. Яагаад ингэж эрх мэдэлд шунан тэмүүлцгээнэ вэ.
Нямдоржийн Анхбаяр гэхэд Увсад дэвших юм уу, жагсаалтаар сонгогдох хүсэл улбаатай дуулдаж байна гэж Увсынхан ярьж байна. Канадад Элчин болох гээд эс чадсан учир одоо МАН-ы дарга нарыг ингэж шахах юм гэнээ гэж ярилцацгааж байна гэнэ.
Батбаярын Жаргалан гэдэг эмэгтэй Ардчилсан эмэгтэйчүүдийн холбоогоо толгойлоод УИХ-д орох юм байх.
Ганзорийг Тэмүүлэн гэдэг хүн Ж.Мөнхбат, Ё.Баатарбилэг хоёрынхоо араас болих хэрэгтэй шүү дээ. Тэр хоёроосоо илүү будилааныг эцэг эхийнхээ “тусламжтайгаар” өөртөө нааж, улсыг хохироосон биз дээ, Эрдэнэт үйлдвэр, ЖДҮ сангаас эхлээд.
Эцгүүд нь Монголын төрийг хориос гучин жил “унасан” атал одоо залгамжлагчид нь дахиад “унах” гээд тачаадацгаах. Одоо ухарцгаасан нь дээр байх. Ядаж, Монголын ард түмний амьдрал дээрдэж, угаараас салж, нүхэн жорлонгоосоо ангижирсан бол яая гэхэв.
Эцгүүд нь тийм гавьяа, тийм ээлт залгамжийг үлдээгүйгээр үл барам ихэнхдээ энэ улсаа тоносон байтал тэдний хойчис дахин төрийн сэнтий рүү авирцгаах нь шударга ёсонд огтоос нийцэхгүй. Намуудын дарга нар Л.Оюун-Эрдэнэ, Д.Амарбаясгалан, Т.Доржханд, Л.Гантөмөр нар эдгээр асуудлыг нэн няхуур үзэж, гурав болон түүнээс дээш УИХ-д суугсадыг, гучин жил УИХ, төр засагт эзлэн суугсадын үр хүүхдийг төрийн эрх барих дээд байгууллагын сонгуульд үл явуулах нь ононо.
Монголын төр, монголын ард түмэн, улс төрчдийн үр хойчис болсон хунтайж, ханхүү нарт ямар нэг өргүй бөгөөд тэднийг төрд ороход нь дамжлага, шат гишгүүр болох учиргүй.
Төр зөвхөн тэдэнд зориулагдаагүй бөгөөд тэдний үе улиран амьдрах арга нь байх ёсгүй.
Энэ удаад бид зөвхөн улс төрчдийн хүүхдүүдийг хамруулсан бол дараагийн удаад хамаатан садан, ах дүү, ураг садныг нь хамааруулах болно.
Б.БАЯР
Амлалт.мн
