Хоёрхон жилийн өмнө Баянзүрх дүүргийн Онцгой байдлын алба хаагч өндөр хүчдэлд цохиулж амь насаа алдсан. Шөнийн жижүүрт гарч үүрэгт ажлаа дуусгаад гэртээ харих гэж байсан алба хаагчийг дарга нь дуудаж өөр ажилд дайлчлан ажиллуулснаас болж ийн харамсалтай хэрэг гарсан. Энэ тухай энд дарж уншина уу
Үүнтэй холбогдуулан тухайн үед Шадар сайд С.Амарсайхан алба хаагчидтай уулзах үеэрээ Онцгой байдлын алба хаагчийг хувийн ажилд дайчилдаг, албан бус үүрэг даалгавар өгдөг зэрэг дүрэм журам зөрчсөн үйлдлийг даруй таслан зогсоож, ийм үйлдэл гаргасан газар, хэлстийн дарга нарт хатуу арга хэмжээ авч ажиллахыг Онцгой байдлын удирдлагуудад үүрэг болгосон.
Гэсэн хэдий өнөөдөр ч Онцгой байдлын зарим дарга нар доод албан тушаалтнууд, алба хаагчдаа хувь хувьсгалын ажилд дайчилдаг, өөрсдийн нь зөвшөөрөлгүй цалингаас нь мөнгө суутгадаг зэрэг зөрчлүүд байсаар байна.
Сэлэнгэ аймгийн Онцгой байдлын газрын дарга, хурандаа Г.Галбадрахын тухай ийм нэг мэдээлэл бидэнд ирсэн юм. Тэрбээр Онцгой байдлын алба хаагчдыг хувийн ажилдаа дайчилдаг, албаны машин засах сэлбэг үйлчилгээний зардлыг алба хаагчдын цалингаас нь хууль бусаар албадан суутгаж авдаг гэх зэрэг зөрчлийг удаа дараа гаргасан байна.
Түүний энэ хууль бус үйлдлээс болж алба хаагч эрүүл мэнд, амь насаараа хохирвол хэн хариуцлагыг нь хүлээх вэ гэдэг асуудал анхаарал татаж байна.
Мөн дээр нь ажлын ачаалалтай нь харьцуулвал авдаг цалин нь бага онцгойгийн алба хаагчдын цалингаас дарга нар нь ингэж дур мэдэн “дарамталж” зуу зуун мянган төгрөгөөр суутгал авдаг, албан бус үүрэг даалгавар өгч ажиллуулж болохгүй гэдгийг Сэлэнгэ аймгийн Онцгой байдлын газрын дарга, хурандаа Г.Галбадрах танд сануулах байна.
ОБЕГ-ын дарга, Хошууч генерал Г.Ариунбуян, ОБЕГ-ын Тэргүүн дэд бөгөөд штабын дарга, бригадын генерал Ж.Чүлтэмсүрэн нар энэ асуудлыг анхааралдаа авч, дотоод хяналтын багаа оруулж шалгуулна бизээ.
Бид үргэлжүүлэн Сэлэнгэ аймгийн Онцгой байдлын газрын дарга, хурандаа Г.Галбадрахын хууль бус үйл ажиллагаатай холбоотой мэдээллийг баримтаар хүргэх болно.
А.Галт
Амлалт.мн
