Батлан хамгаалахын сайд Гүрсэдийн Сайханбаяр галт зэвсэг үйлдвэрлэх тухай ярьж байна. Тун итгэлгүй, нонж ярих юм. Эрхбиш буу хийх гэж байгаа улсын Батлангийн сайд байна даа, бараг угсарч үзүүлээд, эрэмгий, түрэмгий эрвэлзэж байх ёстой бус уу. Мань эр тэгэхгүй юм. Нэг л нэг тийм гэмшсэн царайтай дэслэгч генерал байх. Цол нь багадаагүй байлтай. Хэдхэн дэслэгч генерал байдаг шиг. Нэг нь болчихсон хүн шүү дээ.

Сайханбаяр нэртэй, сайхан ч эр л дээ уг нь. Харин ажил үйлс, ая төрх нь харин нэг тиймхэн байгаад байх юм. Энэ зун цэргийн наадмыг Архангайд зохион байгууллаа. Болох л доо. Гэхдээ мань эрийг тэнд нэр дэвших агуулгын урьдчилгаа болоод байх нь тиймхэн. За даа, тэгээд ер нь л бүгдийг Архангай тийш заламтгай, гүймтгий болсон байдал их харагдаад байна л гэлцээд байна.

Батлангийнхан ямар нэг байдлаар Архангай тийш явах зам үл балрах болсон бөгөөд тийш чиглэсэн жим зам болтлоо тодорсон, жижүүрлээстэй шахуу л тэдний албан тушаалтан аанай л сонгуулийн урь залсан аятай Цэцэрлэг хотыг тойронхон байдаг болсоныг энэ олон шуугиад л байх юм. Олны ам ортой л гэдэг.

Гурилын хулгай хэзээд үл балрах баримт зам үлдээдэг гэдэг үг байдаг. Батлангийнханыг Архангай тийш үнэхээр тэгж их хөлхөлдөөд байна уу гэдгийг гурилын хулгайн баримтын мөшгөлөөр нэг шиншилчихэд гэмгүй л юм шиг байна.

Гүрсэдийн Сайханбаярын удирдсан салбарт Үндэсний батлан хамгаалахын их сургууль гэж бий. Нэр төр, бэлтгэгдэх боловсон хүчин гээд аль ч талаасаа улс орны тэргүүн эрх ашгийн сургууль байх ёстой байх. П.Жаргалан гэдэг генерал удирддаг юм билээ. Энэ сургууль урагшаа гишгэхээ байжээ.

Саяхан их дээд сургуулиудын чанарын эрэмбэ гээд мэдээлэгдэх шиг боллоо. Гэтэл Г.Сайханбаярын томилсон П.Жаргалангийн удирдсан эл сургууль хэдэд гэв дээ, тээ тэр хойно 33-д эрэмблэгдэж. Оточ манрамбын сургууль гэхэд Үндэсний батлан хамгаалахын их сургуулийн дэргэд аваргын эрэмбэтэй, зүүний магнай талд ихээхэн дээгүүр байх жишээний.

Магнайдаа тоосгүй явж байх учиртай сургууль манан тоосон дунд яваа бололтой юм. Ерөөсөө энэ сургууль Г.Сайханбаяр, П.Жаргалан хоёрын үед урьд өмнө байгаагүйгээр шалан дээр ойчиж. Архангай их явцгаагаад байхаар ингэдэг юм уу, яадаг юм, ийм л юм болоод байгааг салбарынхан нь шогширцгоож байгааг үгүйсгэх боломжгүй гэлцэнэ.

Урагшгүй албат П.Жаргаланг мулталж орхиё гэвч, угзраанд орохгүй нэг “тоног” байгаа шиг байна. Г.Сайханбаяр сайн мэдэж буй байх. Г.Сайханбаяр сайд аа, Үндэсний батлан хамгаалахын их сургуулиа өөд татахгүй бол болшгүй нь шүү.

Хэний, ямар даргын хүн байхаас эс хамааран удирдсан салбартаа мөн чанар төгс, нэр төр том байх л чухал шүү. Дээд эрэмбийн анд чинь тавиад л өгсөн, арын нь асуудал таных биз дээ. Зөв буруу эргээд байдаг торгон цэргүүдийн бичлэг бий шиг билээ. Саяханы.

Энэ салбарын, Г.Сайханбаярын маань л салбарын асуудал мөн шүү дээ. Салбараа өөд татаж, сайдын ажлаа олигтой хийж чадаагүй байж, Архангайд нэр дэвшин, УИХ-ын гишүүн болох мөрөөдөл тээн гүйж явааг эрхбиш Архангайчууд харж, таньж байгаа бизээ...

Б.ДОРНО

Амлалт.мн