Хуулийн салбарынханаас иргэд олон нийт шударга ёс нэхэж байгаа. Гэвч тэнд бас бодох, эргэн харах зүйл байна. Нэг хэсэг шүүгчдийг авлигад автуулахгүй, хараат бусаар шийдвэр гаргуулахын тулд бүх шатны шүүгчдийн цалинг нэмсэн.
Гэтэл шүүхэд хэргийг “боож” оруулдаг прокурорын цалин гавьтай нэмэгдээгүй. Хамгийн сүүлд нэмэгдсэнээс хойш 9 жил өнгөрчээ. Өнөөдөр улсын хэмжээнд 450 гаруй прокурор үүрэг гүйцэтгэн, улсын нэрийн өмнөөс гэмт хэрэгтнүүдэд ял төлөвлөн ажилладаг байна. Тэдний ажлын ачаалал үнэхээр их байдаг гэнэ. Хамгийн бага шатны сум дундын хяналтын прокурор л гэхэд 1.5 сая төгрөгийн цалинтай. Аймаг нийслэлийн прокурор ойролцоогоор 2.0 сая орчим төгрөгийн цалин авдаг аж.
Тийм атал нэг прокурорт оногдох ажлын ачаалал нь гэвэл 7 хоногийн ажлын 40 цагт хамгийн багадаа 10 гаруй Эрүүгийн хэргийг хянана, дээр нь бичиг төлөвлөнө, хэргийн газрын үзлэгт явна гээд ажлын ачаалал нь асар өндөр байдаг учраас хоногтоо л гэр орондоо очдог. Тогтмол шахуу гэртээ эрт харьлаа гэхэд үдшийн 21:00 цагаас хойш ажлаасаа буудаг.
Тийм атал УИХ-ын Тамгын газрын энгийн ажилтан, ЗГХЭГ-ын нэг шинжээч багадаа 3.0 сая төгрөгөөс доошгүй цалин авдаг атлаа 7 хоногтоо 3-5 бичиг төлөвлөж, хариу өгөх төдий зав зайтай ажилладаг.
Ажлын ачалаалтай нь харьцуулахад цалин багатай учраас цаашид прокуророор ажиллах сонирхол хуульчидад төрөхгүйд хүрч, ажиллаж байгаа нь нэг нь ажлаасаа шантарч чөлөөлөгдөх хүсэлтээ өгөх нь их болжээ.
Ийм нөхцөл байдал бодитой байгаа учраас УИХ-ын чуулган дээр 2024 оны төсөв хэлэлцэж байгаа энэ цаг үед прокурорын байгууллагын алба хаагчдын цалинг нэмэгдүүлэх асуудлыг ярих нь зүйтэй.
Цалин цаваг нь амьдрал ахуйд нь илтэд хүрэлцдэггүй юмаа гэхэд ядаж амьдралын наад захын хэрэгцээг нь хангах хэмжээнд хүрчихвэл тэд ар гэртээ санаа зовох нь багасч, ажилдаа анхаарлаа хандуулах боломж нэмэгдэнэ.
Тиймээс УИХ-аас энэ асуудалд анхаарч, прокурорын цалинг нэмэх асуудлын төсвийн төсөлд тусгаж оруулах нь зүйтэй. Тэдний цалинг 1 сая төгрөгөө нэмэхэд жилдээ Төмөр замын Батдөлийн гэрээс гарсан авлигын мөнгөнөөс бага мөнгө шаардлагатай аж.
Amlalt.mn
