Хууль зүйн яам Төрийн нарийн бичгийн даргагүй байна. Б.Энхбаяр нь бодвол дэмжээд, Иргэн харьяатын газрын даргаар байгаа Н.Ууганбаяр гэдэг хүнийг томилуулах чиг яригдсан шиг байдаг.
Гэтэл Засгийн газрын Хэрэг эрхлэх газрын дарга Д.Амарбаясгалан дэмжихгүй байгаа гэх. Д.Сумъяабазартай садангийн холбоотой, Х.Тэмүүжинг мөрдөн чагнаж байсан гэх асуудлууд буйн тул Д.Амарбаясгалан даргын шалгуурт тэнцээгүй бололтой юм.
Б.Энхбаяр нүүрсний сонсголоос эхлээд ажил их, Төрийн нарийнтай болмоор байна гээд байгаа. Уг нь хот руу явдаг П.Сайнзориг шиг хүн байвал уг албан тушаалд зохих гээд байдаг. Тэр өрөмний өт шиг, муугүй ажил хэрэгч хүн харагддаг.
Үндсэн хуулийн цэцэд Э.Энхтуяа, Л.Өлзийсайхан гэж тун ч мэдлэг чадвартай хоёр эмэгтэйг томилохоор болж. Энэ хоёр бол аль аль нь хуулийн туршлагаар хатаагдсан, өндөр боловсролтой, туршлага нөр, нэр цэвэр, мөн чанарын соёл өндөр тогтсон эмэгтэйчүүд. Томилгоог, ажил үүргийн оноогдлыг иймэрхүү бодит, ажил хэрэгч, зарчимч эмэгтэйчүүдэд даалгаад байвал төрийн ажилд л тустай, урагштай нь дамжиггүй.
Л.Өлзийсайхан бол УИХ-ын Тамгын газрын анхны эмэгтэй дарга, УИХ-ын дарга Д.Дэмбэрэлд зөвлөж байсан, эрдэм шинжилгээний ажил, хууль тогтоохуйн эрдэмд нэн боловсорсон, Э.Энхтуяа нь Хууль зүйн яамны тэнхлэг болж ирсэн, шударга зарчим, ажлаа даах ухаанд нэвтэрсэн эмэгтэй юм. Төр улсын хариуцлагатай томилгоонууд ингэж хийгдвэл сайн л гэхээс өөр үггүй.
Ер нь, Хууль зүйн яамны Төрийн нарийнд Б.Энхбаяр сайд Л.Өлзийсайхан шиг, Э.Энхтуяа шиг ажил хэрэгч эмэгтэйчүүдийг олж томилох хэрэгтэй! Үйлс зохирно.
Эмэгтэй хүн шударга ёс хоёр нийлдэг шиг байдаг.
Б. БАЯР
Amlalt.mn
