Энэ он бол монголчууд нэн хариуцлагатай сонголт хийх жил. Бид улс орноо үнэхээр авч явах хүмүүсээ нэн шинэчилж, нэн онож сонгох ёстой, зургаахан сарын дараа.
Эрчүүд давамгайлсан Монголын улс төрд хулгай, худал үнэхээр нүүрлэснийг бид бүх талаар харж мэдэрлээ. Дөчин их наядын нүүрсний хулгайн авторууд эрчүүд. Ерөөсөө Монголын улс төрд байгаа гажиг бүхэн эрчүүдээс болж байгаа. Өөрсдөө ч үүнийгээ мэдэж байгаа.
Г.Занданшатарын парламентаас эрчүүд л илүү их асуудалд орооцолдож, эдүгээ нийт гишүүний бараг арван хувьд хүрэх эрэгтэй гишүүд нэгэнт УИХ-ын суудлаасаа цаг нь болоогүй байхад, гэмт хэрэг, зохисгүй зөрчлийн улмаас бууж одлоо.
Энэ парламентын нэг чухал ололт бол хүйсийн харьцааг тэгш тийш болгоход боломжийн өөрчлөлт хийж эхэлснээрээ овоо юм. Дэвшил болсон юм. Ирэх сонгуульд монголчууд зөв хүмүүс, тэр тусмаа зөв эмэгтэйчүүдийг УИХ-д илүү олон сонгож, төр улсаа цэвэршүүлэх, тунгалаг болоход бултаараа анхаарах нь үндэстний тэргүүн эрх ашиг байна. Энэ тэргүүн эрх ашгийн сонголтод “Амлалт.мн” сайт ард түмэнтэйгээ цуг байж, нийтлэл контентоороо сайн засаглалд залалцахад идэвхтэй ажиллана.
Гадаад харилцааны сайдаар Батмөнхийн Батцэцэг ажиллаад хэдэн жил болж байна. Хий зай багатай, харьцангуй чамбай эмэгтэй. Монгол улсын гадаад харилцаа ойрын жилүүдэд тун дорвитой байгааг олон талаар харж болно. Ромын пап айлчиллаа. Франц, Польшийн Ерөнхийлөгчид ирлээ, Монголын Ерөнхийлөгч У.Хүрэлсүхийн гадаад айлчлалууд нэр хүндтэй, зохист үр дүн дагууллаа.
Энэ бүгдийн тэргүүнд Б.Батцэцэг сайдын үйл хэрэг оройлсонд эргэлзээ үгүй юм. С.Лавров, Ван И хэмээх хоёр хөршийн аварга сайдуудтай эн зэрэгцүү, дөмөг тод ажиллаж, гадаад харилцаа хэмээх амаргүй бодлогын орон зайд Б.Батцэцэг муугүй ажиллаж байгааг зөвшөөрөх хэрэгтэй. Харьцангуй нэр цэвэр, алдаа мадаг багатай ажиллаж ирлээ.
Хуульч Тайванхүүгийн Алтангэрэл гэж эмэгтэй бий. Хууль зүйн яаманд газрын даргаар ажиллаж байсан. Мэдлэг боловсрол жигдэрсэн, хөгжсөн нийгмийн зураглалыг бүрмөсөн ойлгосон эмэгтэй дээ. Арбитрын шүүхэд “Алтан дорнод Монгол” гэдэг компани улсыг сөхрүүлэх гэж байхад, Т.Алтангэрэл аваад гарч байв. Ялж байв. Улс орныг ихээхэн түйтгэрт шийдвэрээс хамгаалж чадаж байв. Даруухнаар, хууль зүйн ажлаа хийгээд явдаг. Хууль тогтоох, шийдвэр гаргах түвшинд чухам ийм л эмэгтэй, ийм ёс суртахуун, боловсрол магад гарсан эмэгтэй байж баймаар байгаа юм.
Ийм цэвэр, өндөр боловсролтой, хөгжлийн түүчээ залах ухамсарт сэхээтнүүдийг ирэх сонгуулиар шийдвэр гаргах хууль тогтоогчид залаасай.
Сангийн дэд сайдаар Санжаагийн Мөнгөнчимэг хэмээх бүсгүй дөрөв дэх жилдээ ажиллаж байна. Хөдөлмөрийн яамны дэд сайдаар мөн дөрвөн жил ажилласан. Няхуур, даасан ажилдаа дөмөг тэнцсэн, попрол, дүр исгэгчдээс ангид цөөхөн хүүхнүүдийн нэг, энэ төрд байгаа. Улс орон бол хүний нөөц, санхүү хоёроосоо босдог.
Хөдөлмөр нийгмийн хамгааллаа, санхүүтэй нь холбож нийгмээ бүрэн ухамсарласан, нэр цэвэр, үйлс зохист ийм хүн хууль тогтоох түвшинд ажиллах нь зохино. Саяхан Үндсэн Хуулийн Цэцийн гишүүнээр Л.Өлзийсайхан, Э.Энхтуяа гэж хоёр эмэгтэйг томилсон.
Энэ хоёр бол хууль тогтоох байгууллагад бүрнээ шилэгдэн бэлтгэгдсэн байв. Тэднийг Цэцэд илгээсэн нь оносон. Иймэрхүү бүсгүйчүүдээр УИХ-аа сэлбэмээр байна. Тордмоор байна.
Эмэгтэйчүүд шийдвэр гаргах түвшинд голлоод, тэнцвэржээд ирэхээр авлига, хулгай худал нь буурч, нийгмийн эрүүл мэнд, идэвх сэргэдэг зүй тогтолтой юм билээ шүү, Монголчууд аа! Тиймээс Б.Батцэцэг, Т.Алтангэрэл, С.Мөнгөнчимэг шиг эмэгтэйчүүдийг хууль тогтоох дээд байгууллагад сонгоё!
З.БАЯР
