Ерөнхий сайд, МАН-ын дарга Л.Оюун-Эрдэнийн томъёоллоор бий болсон сонгуулийн бүсчилсэн тойрог ямар үр дүн авчрахыг одоогоор таах аргагүй. Гэхдээ жижиг намуудад арчигдах аюул байгаа. ХҮН намд ч боломж бага. Эрх баригч нам УИХ-ын сонгуульд яаж орох бол гэсэн ажиглалт их байна.

Ерөнхий сайд, МАН-ын дарга Л.Оюун-Эрдэнийн бодлогыг хараад байхад намын эрх ашиг гэхээсээ илүүтэй улс орны эрх ашгийг урдаа тавьсан үйлдлүүдээр дүүрэн байна. Л.Оюун-Эрдэнэ дарга намынхаа жагсаалтыг тэргүүлж сонгуульд орохгүй, тойрогт нэр дэвшинэ гэдгээ бараг хэлчихсэн.

Генсекээ ч бас тойрогт өрсөлдөхийг шаардах нь тодорхой. Ялна гэдэгтээ итгэлтэй байгаагийнх нь шинж гэхээсээ намын жагсаалтыг угжны хурга шиг салдаггүй улс төрчдөөс хол байлгах гэхдээ өөрөө үлгэрлэж байж мэднэ.

Тэгвэл тойрогт увайгүй улс төрчид биш мэргэжлийн хүмүүсийг, нийгмийн давхаргын төлөөллийг оруулж болох юм. МАН хөгжлийн бэрхшээлтэй нэр дэвшигч гаргаж ирэхээ ч битүүхэн мэдэгдсэн. Бөх, дуучин арай МАН-ын жагсаалтанд ам аваад, ам бариад зогсож байхгүй байх. Улс төрчид нь урьдын гавъяагаа хэчнээн дуулж хуурдаад тэдэнд найдвар муу шон байхгүй.

Тэд үнэхээр улс төрийн “жанжнууд” юм бол жагсаалтанд багтах гэж “жагсаалын цэрэг” шиг царайлахгүйгээр томсгосон тойрогт очиж нэр дэвшиж, “тулааны талбарт” үзэж тарах нь зөв биз.

Эндээс Л.Оюун-Эрдэнийн улс төрчийнх нь тактик, түүнээс ургаж гарах стратегийг харж болохоор байгаа юм. Тойргийн шинэчлэл, нэр дэвшигчдийн шинэчлэл нь цаашдаа улс орны алсын эрх ашгийг бодсон том бодлого болж задрах шинж ч байна.

Түүний энэ жишиг АН-д ч нөлөөлнө. АН-ын дарга Л.Гантөмөр бол Сүхбаатар дүүргээс яаж ийж байгаад л гараад ирнэ. Сүхбаатар, Чингэлтэй дүүргүүдийг нэг тойрог болгосон. Чингэлтэйн хойшоох хорооллууд Л.Гантөмөрийн нутгийнхнаар дүүрэн. Л.Гантөмөр ч гэсэн намын жагсаалтанд толгой хоргодох гээд байх зовлон алга.

Т.Санаа

Амлалт.мн