Улс төрийн аль ч намын сонгуулийн мөрийн хөтөлбөр гэдэг ялсан тохиолдолд яг таг биелүүлэх ёстой үүрэг амлалтынх нь жагсаалт юм. МАН-ын 2020 оны сонгуулийн мөрийн хөтөлбөр биелсэн бол иргэд бид өнөөдөр бараг л “диваажин”-д амьдрах байж.

2020 оны УИХ-ын сонгуулиар МАН-ын дэвшүүлсэн мөрийн хөтөлбөрийн иргэд рүү хандсан амлалтууд уншихаар үнэхээр хоёр гараа өргөөд дэмжмээр. Тийм ч учраас МАН-ыг мөрийн хөтөлбөрөө биелүүлнэ гэж итгээд сонгогчид УИХ-ын 76 суудлын 62-ыг нь МАН-д өгч дэмжсэн биз.

Ганцхан жишээг дурьдахад, МАН-ын мөрийн хөтөлбөрт туссан “Зээлийн хүүг бууруулж, сарын 1 хувиас хэтрүүлэхгүй болгоно” гэсэн заалт дөрвөн жилийн өмнө иргэдэд ямар их найдвар төрүүлсэн бол.

Тэдний амлалт өгсөн хугацаанаас хойш 4 жил өнгөрч, сонгууль ойртлоо. Өнөөдөр банкны зээлийн хүү хэд байгаа билээ.

Саяхнаас л Эдийн засгийн Хөгжлийн сайд Ч.Хүрэлбаатар гадаадын банкыг оруулж ирж, банкны зээлийн хүүг бууруулах боломжтой талаар тэр дуугарч эхлэв. Иргэдийг өрийн дарамт, зээлийн хүүгийн өндөр эрсдлээс хамгаалахын тулд үүнээс өөр арга байхгүй гэв. Түүний энэ үг эрхэм сайдын сэтгэл зүрхнээсээ хэлсэн үг гэхээсээ илүү, намынхаа мөрийн хөтөлбөр биелүүлэх гэж буй “дүр зураг” гэж харагдаж байна.

Ер нь МАН-ын өмнөх сонгуулийн энэ амлалтыг хэн ч асуусангүй, хэн ч хөндсөнгүй, энэ мэт биелээгүй амлалтууд олон ч МАН дараагийн сонгуульд дахин “худал” амлалтуудаа үргэлжлүүлэн өгөөд орно байх.

Өнгөрсөн дөрвөн жилийн хугацаанд МАН амлалтаа хэрэгжүүлэх тухайд хичээсэнгүй, ажилласангүй, зүтгэсэнгүй. Харин МАН-ын нөлөө бүхий эрх мэдэлтнүүд л нүүрсний хулгай, Хөгжлийн банкны булхайгаар нэлээд хөлжих шиг боллоо.

Сонгууль дөхөөд ирэхлээр МАН-ынхан өмнөх амлалтаа хэрэгжүүлээгүй, түүнийгээ таг мартчихсан атлаа шинэ мөрийн хөтөлбөр, биелэгдэшгүй сайхан амлалтуудаар сонгогчдын чихэн дээр “цэцэг ургуулж”, тэднийг уярааж, өөрсөддөө санал өгүүлэх уянгын халилаа үргэлжлүүлээд эхлэх байх даа...

Т.Баян

Амлалт.мн