Цахиагийн Элбэгдорж надад одоо ямар ч гүтгэлэг наалдахаа байсан гэсэн байна лээ. Үнэн байх. Эл дол боллоо. Үүн шиг Монголын ард түмэнд наалддаггүй нэг үнэт өв байдаг.
Энэ нь Монгол улсын эрдэнэс, баялаг нь ард түмэндээ наалддаггүй явдал. Алтан дээр суусан гуйлгачид гэж хэлэгдээд удлаа бид.
Эцэг өвгөдийн үлдээсэн эх орны баялаг бол худалч хүнд дэлхий дуусахтай зэрэгцэж дуусахаар их байх шиг. Гэвч өнөөх нь ард түмэндээ наалддаггүй, амьдралыг нь тэтгэдэггүй, тус нэмэр болдоггүй.
Улс нь авлигажсан, нэг нам дангаар 8 жил төр барьсаар дөчин дөрвөн их наядын нүүрсний хулгайтай, тэр нь ганц хоригдогчид нялзаатай явж байгаа. Ийм л дүр зураг Монгол орныг эзлээд удлаа.
Гэвч энэ бусармаг байдлаас гарч, монгол хүн бүр баялагтаа эзэн байх боломж байна.
Гишүүн Одонгийн Цогтгэрэл “Тусгаар тогтнол, Үндэсний баялгийн сангийн хууль” гэгчийг өнгөрөгч онд спикер Гомбожавын Занданшатарт барьсан. Энэ хуулийг нэн яаралтай хэлэлцэж баталмаар байгаа юм даа. (ЭНД ДАРЖ ХУУЛИЙН ТӨСЛИЙН АГУУЛГАТАЙ ТАНИЛЦАНА УУ)
Тусгаар тогтнол гэдэг бол яг үнэндээ иргэдийн нь баян байх, хараат бус эдийн засгийн эрх чөлөө л юм шүү дээ. Үүнийг Баялагийн сангийн өгөөжөөр шийднэ. Өв болгосноор шийднэ.
Улс оронд удирдагчид өр бус өв үлдээх ёстой гээд О.Цогтгэрэл үглээд байх шиг байна. Яах аргагүй л зөв үг л дээ. Одоо бол өр л хуримтлуулаад байгаа. Энэ санг бүрдүүлээд эл хуулийг баталчихвал Норвеги лугаа хөгжих боломж Чингисийн монголчуудад үнэндээ бий юм сан.
Аль нэг нам төрийн эрх барихаас үл хамааран, нээлттэй, иргэн бүр хувьцаатай, орлого, ноогдол урт хугацаанд тогтвортой тодорхой байдаг ийм үндэсний компанийн загварчлалыг л О.Цогтгэрэл нар бий болгохыг зорьж байгааг үндэстнээрээ дэмжих хэрэгтэй.
Газрын хэвлийн баялаг ард түмний өмчөө гээд Үндсэн хуульд дурайх ч, ард түмэн энэ баялгаас хүртэхээ сонгуулийн өмнөх өөдөс бялуу, булан өрөм болгон хүртэж, эрх баригчдыг хишгийн даллага шиг хардаг байж болохгүй юм.
Одоо бол Эрдэнэс таван толгойгоос яг ийм байдлаар ард түмний өмчийн хишгээ хүртэх эрхийг додомдон хуурмаглаж байгаа.
Монголын өчнөөн төчнөөн төрийн өмчит эрдэнэс баялгийн компаниуд байна. Энэ бүхэн бол бүгдээрээ ард түмний өмч. Үүнийг бүгдийг нь нээлттэй хувьцаат компани болгон иргэн бүр эх орны хишгээ өв тэгш хүртдэг тогтолцоог мөнөөх Тусгаар тогтнол, Үндэсний баялгийн сангийн хууль олгох юм.
Үйлдвэржье, бүгдээр баяжъя гээд Нямтайширын Номтойбаяр улс төр хийж эхэллээ. Зөв шүү дээ. Үйлдвэржиж, үйлдвэр бүр нь иргэндээ наалддаг л утга учиртай тогтолцоог бүрдүүлэх нь чухамхүү жинхэнэ үндэсний эрх ашиг шүү дээ.
Хөшөө тийш очих ардын зам балрахгүй гэгчийн үлгэрээр манайхан Норвеги руу хангалттай явсаан. Үзсэн, дуулсан. Гагцхүү хийхгүй л байна. Энэ бол улс төрийн башир юм.
Хоёр том нам эрхбиш нэг юм хөдлөөд газрын тос тэргүүт баялгаараа тулгуурлан Баялагийн сан байгуулъя гэж тохирсон шиг байдаг. Үүнийгээ л түргэн хийгээч дээ. Төсөл нь бэлэн хуулиа батлаач дээ.
Бид хоёрын хэн нь эрх барих билээ, яаж ард түмний санал авах билээ гэж “эргүүтэхийн“ оронд зүгээр л Одонгийн Цогтгэрэлийн өргөн барьсан баялгийн хуулийг баталчих аа, хууль тогтоогчид оо!
Б.БАЯР
Amlalt.mn
