Утсанд донхийж орлогын мэдэгдэл ирэх их гоё байдаг л даа, хэнд ч. Урд оройноос эхлээд энэ улсын маань иргэд ийм мэдрэмжээр давлагаалж байх шиг байна. Эрдэнэс таван толгойн хувьцааны тань ноогдол гээд тайлбартай орж байгаа. Энэ бол сайн эхлэл, сайн жишиг. Монголынхоо баялгийг капитал болгон Баялагийн сандаа хуримтлуулан, ард иргэддээ ингэж ноогдол ашгийг тогтмол, удаан хугацаанд оноож байхын дархлааг ийнхүү эхлүүлж байх шиг байна.
УИХ-д суудалтай намуудын дарга нар, эрх баригч намын дарга Л.Оюун-Эрдэнэ оройлов. Баялагийнхаа үр өгөөжийг шууд хүртэх, иргэдийн нэрийн дансанд шууд хуримтлалыг үүсгэх Баялагийн санг хуульчлах асуудал ингэж Л. Оюун-Эрдэнэ, Л.Гантөмөр, Т.Доржханд нарыг нийтгэв.
Ингэхээр энэ асуудал нэн даруй хуульчлагдахаар болж байна. Том эрх ашиг ингэж л нэгтгэгдэн зангидагдах учиртай юм л даа.
Ард түмний эдийн засгийн чадамж л жинхэнэ удирдагчдын илэрхийлэл болох нь дамжиггүй. Тэгж хэмжигдэх ёстой. Энэ чиглэлд шинэ бодит эхлэл, дархлааны суурийг тавьж байгаагаараа энэ үйлс тун чухал. Л.Оюун-Эрдэнийн хэлсэн өөр нэг чухал үндэслэл бол төсвөөс давсан орлогыг тэгшитгэн хуваахгүйгээр, хөгжлийн том төслүүдэд шууд хөрөнгө оруулалт болгоно гэсэн нь юм.
Хамгийн зөв зүйтэй зүйл бол энэ. Орлогоо хөрөнгө оруулалт болгож, станц барьж, газрын тосоо боловсруулах үйлдвэр зэргээ эн тэргүүнд барих зэргээс эхлээд ажиллах нь эхний зорилт байх ёстой.
Үүнд Ерөнхий сайд чигч хандаж байгаад иргэд талархалтай хандана. Монголын ард түмэн эвэр хошуулах гэгчид таагүй ард түмэн.
Энэхэн мөнгийг шилжүүлж яанав, хөрөнгө оруулалтдаа зарцуулах нь чухал гээд янз бүрийн л өнцөг хандлагууд ажиглагдаж байна.
Гэхдээ, энэ дотроос хамгийн үнэ цэнтэй нэг месэж бол эзэн нь юмаа мэдэж, иргэд нь баялагаасаа хүртэж байгаагийн бодит жишиг гэдэг нь тод сонсогдож байгаа юм.
Өмчтэй хүн үр ашгаа хүртдэг нь жам. Эх орныхоо эрдэнэс баялгийн хишгийг хүртэж, ингэж чин мэдрэх эхлээд чухал. Тэртээ тэргүй Баялагийн хуулиа баталж, энэ асуудлыг улсын суурь дархлаа болгохыг эхлүүлчихлээ. Үүнд оройлж байгаа Ерөнхий сайд Л.Оюун-Эрдэнэд нэн талархууштай.
Б.БАЯР
