Хүний амьдрал бол нүгэлгүй орлогоор л гэдсээ тэжээх явдал юм гэж Монголын сонгодог зохиолч Цэндийн Доржготов абугай хэлжээ.

Ухамсарт амьдрал, бичгийн бүхий л өвөө гагцхүү ард түмний оюун сэрэхүйг өгсүүлэх, дэвшитгэх эрэлд зориулсан эл хөлгөн зохиолчийн үг Монголын нийгэмд үнэнхүү өндөр сануулга болж байна.

Нэн ялангуяа улстөрчдөд. Эмгэнэлт инээдмийн өнгө аяс, хүүрнэн эсээчилж номлоод зөв амьдрах, оюун санааны хоосролоос ангид байхуйг өвгөн зохиолч насаараа урласан. Манай уран зохиол, соён гэгээрэлд үл балрах үнэт бүтээлүүдийг эрхэм зохиолч нэгэнт бүтээчихсэн. Ц.Доржготов гуайн сүүлийн жилүүдийн нийтлэлүүд бол бүхэлдээ нийгмээ эрүүлжүүлэхэд чиглэв. Наян насыг хэдийнээ зооглосон энэ зохиолчийн урлан бүтээх өдгөөгийн ямар ч дөмөг сэтгүүлчээс илүү, урлал ханасан байдаг нь гайхмаар.

Нийгмийг тонож байгаа, улс орноо уруудуулж байгаа бүхэнд энэ зохиолч үгээ хэлсэн. Харин өнөөдрийн хэлж байгаа, энэхүү нүгэлгүй орлогоор гэдсээ тэжээх явдал бол хүний амьдрал гэснээрээ Монголчуудыг, төр баригсдыг, улс төрчдийг нүгэлтэй орлогоор замнаад, идээд уугаад, шамшигдуулаад байгааг л хэлж байна.

Дөчин дөрвөн их наядаар нь нүүрс шамшигдуулж, Хөгжлийн банк, Боловсролын зээл сан, тендер, концесс, ЖДҮ гээд байж болох бүхнээр Монголын эрх мэдэлтүүд, улс төрчид улсаа тоносон. Дээрэмдсэн.

Энэ бүхэн бол Ц.Доржготов гуайн хэлээд байгаа нүгэлгүй орлого биш. Нүгэлжсэн орлогууд. Гэдсээ тэжээх явдал биш. Бирдийн шуналаа номхотгож чадахгүй байгаа явдал.

Төрийн алба бүхэлдээ авлигажсан сэтгэхүй, үйлдэлтэй болсон. Ямар сайндаа Цахим хөгжлийн сайд Н.Учрал төрийн алба дахь чихэр набор горьддог байдлыг хална. Хүнд суртлыг бууруулахын тулд цахим засаглалд гарцаагүй төгс шилжих хэрэгтэй гэж яриад байхав дээ.

Монголчууд, Монголын төрийн алба ингэтлээ доройтсон. Чихэр набор харж, ажлын гүйцэтгэлээ хэмжиж байгаа чинь ердөө л нүгэлтэй орлогоор өөрийгөө тэжээх өчүүхэн байдлыг л үгдрүүлээд байгаагаа мэдсэн ч, мэдэхийг хүсдэггүй нийгэмтэй бид болчхоод удаж байгаа.

Нүгэлгүй орлогоор гэдсээ тэжээх явдал бол итгэл үнэмшил, ур чадвар, эрүүл хүн байх дархлааг үргэлж тэтгэнэ. Үүний төлөө бүгд шамдах хэрэгтэй. Харамсалтай нь, эрх мэдэлтнүүд мэдээлэлд ойрын давуугаараа бүгдийг урьтаад хусдаг нь гачлантай.

Монголын эрх мэдэлтнүүд ээ, нүгэлгүй орлогоор гэдсээ тэжээ! Авлигын индекс алхам алхмаар л арагшлаад байна. Энэ бол нүгэлтэй орлого амь бөхтэй, бүр хавдаршин байгаагийн илэрхийлэл шүү.

Б.ДОРНО

Amlalt.mn