Бүсчилсэн тойргоор сонгууль явуулна гэж байгаа. Явуулах ч биз. Гэхдээ МАН-ынхан ингэж үзвэл л дахиад ялчих, үгүйдээ илүүрхчих тухай л юм бодож, энэ гаргалгааг хуульчилсан.
Гэвч МАН бүх түвшинд тун базаахгүй байгааг хүн бүр л ярьж байна. Үндсэн Хуулийн ЦЭЦ дээр нэг “асуудал” яваад байгаа. Бүсчилснийг “арай өөр” болгож мэдэх.
Мэдээж, тэр нь МАН-ынханд л тустайгаар шийдэхээр урьдчилсан тавьсан шатраар ойлгогдож байгааг улс төр мэдэх бүхэн тааж ядах юмгүй.
Бүсчилсэн тойргоор сонгууль явах нэг хэрэг. Бүсчилсэнд явна, өрсөлдөнө гэсэн улс олон байх шиг байна. Эхлээд аймгаасаа зөвшөөрөгдөнө гэж нэг юм бий л дээ.
Өмнөх сонгуулиар нэг аймгаас сонгогдчихоод, одоо дөрвөн аймагт хүч үзнэ, сонгогдоно гээд явахын өмнө ярих нэг зүйл гарцаагүй байна.
Энэ нь нэг аймагтаа, өмнөх тойрогтоо хэр хүлээн зөвшөөрөгдсөн вэ гэдэг асуудал.
Завхан аймгийг аваад үзье. Завханаасаа цаашаа давхих бололцоотой юу, одоогийн хоёр гишүүн, Ц.Цэрэнпунцаг, Б.Баярсайхан нар.
Яг одоогийн байдлаар, яг өнгөрсөн жилүүдийн үнэлгээгээр, амлаж ярьснаа биелүүлсэн эсэхийг нь аваад үзэхээр 2020 онд Завханаас сонгогдсон хоёр гишүүнд аймгийнхан бол шууд хасах оноо өгч байгаа юм билээ. Үйлдвэрлэл огт байхгүй. Улиастайн арын цагаан суваргуудаас өөрөөр үзэх юмгүй шахам, өрсөлдөх чадвар, өнгөлөх тулгуураар үргэлж араасаа тэргүүлэх шинжид нэгэнт дархлагдсан Завхан аймгийнхан хоёр гишүүндээ нэн тааруу үнэлгээтэй байгааг захын хүн хэлж байна лээ.
Б.Баярсайхан гишүүн гэхэд сургуулийн байруудыг боловсон жорлонтой болгоно гэсэн том амтай явсан. Энэ биелэл олоогүй. Ц.Цэрэнпунцаг нь ч үзүүлэх биет ажлаар үнэндээ гавьсангүй. Үнэндээ энэ хоёр хүн ард түмнийхээ сэтгэлд төрийн итгэлт түшээгээр уягдаж чадсангүй л дээ.
Одоо энэ хоёр хүн өрсөлдөнө гээд л сая баахан явав бололтой. Машин маниулдаад л. Гэвч Завханчууд Завханы хөгжлийг маниулдах шинэ эрэлд л гарч байгаа шиг билээ.
АН-аас Я.Санжмятав, Д.Батсайхан нар явж мэдэх нь. Энэ хоёр хүн бол хоёулаа одоогийнхоо хоёр гишүүний дэргэд аймгийнхаа дарга хийсэн, амьдрал, сайн муугаа мэдэх хүмүүс. Мятав бол гурав дөрвөн удаа сонгогдсон. Сайд, УИХ-ын дэд дарга хүртэл хийсэн хүн.
Даймаагийн Батсайхан ч муугүй эдийн засагч, гаргалгаатай толгой. Энэ хоёр хүн хослоод явахад Завханыхан итгэх л магадлалтай.
З.Нарантуяа гээд чамбай эмэгтэй энэ аймгаас сонгогдож байсан. Түүний нөлөөлөл эл аймагт бий.
Энэ аймагт одоо чухал хүн бол Г.Өнөрбаяр. Хөдөлмөрийн яамны Төрийн нарийн олон жил хийсэн.
Амьдрал, нийгмээ дориун мэдэх хүн дээ. Ардын нам Завхан талд суудал горилж байгаа бол Г.Өнөрбаяр Засаг даргаа тойглох нь онох байх. Нэр цэвэр, ёс зүйтэй, аятайхан залуу.
За, энэ аймагт Шинэнсамбуу гэдэг хүний хүүхдүүд байсхийгээд сонгуульддаг. Батсамбуу, Сайхансамбуу гээд л. Тэд яаж зүгээр байхав, энд тэндхийн намуудаасаа очих л байх.
Банзрагчийн Түвшин гээд Хан-Уулаас удаа дараа Нийслэлийн хуралд сонгогдож асан, санхүүч очих магадлалтай, Ардчилсан намаас. ХҮН-ын дарга Т. Доржханд Завханы юм билээ. Энэ нөхөр лавтайяа хоёр гурван залуу хөтлөөд очих л байх л даа.
Ингээд харахаар Завхан аймаг, түүнээс бүсчилсэн буюу том тойрогт хүч үзэгсэд эхлээд аймгаасаа зөвшөөрөгдөхийн тухайтад асуудал их байна.
Завханыхан бол Д.Оюунхорол, Я.Санжмятав нар шигээ “аваргуудыг” л том тойрогт аймгаа төлөөлж, бүсчилсэнд Улиастайгаа урагшлуулах “хөдөлгүүр” гэж итгэж, тийм түвшний хүн хайж байгаа.
Гэвч тийм зөвшөөрөгдсөн хүмүүсээс илүү сонирхогчид Завханыг тойрч шавсаар. Юу болдог юм бол доо, хөөрхий...
Б.ГАРЬД
Amlalt.mn
