Эрх баригч намын дарга Л.Оюун-Эрдэнэ гарцаагүй нэр цэвэр хүмүүсийг л УИХ-д дэвшүүлэхийг нэн чухалчилж байгааг маш их бичиж, мэдээлж байна. Энэ туйлын зөв.

Залуу дарга, хүний өөрийн намд үүрлэсэн авлигачидтай бишгүй тэмцэж байгаа. Хөгжлийн банк, ЖДҮ, Нүүрсний хэргийг өдөөгсөдтэй, идэж уугсадтай тэмцсээр байна.

Энэ хэрээр Монголын улс төр дэх голлох хүмүүс, ялангуяа өдгөөгийн УИХ-д нэр цэвэр, ямарваа нэг хууль бустай холбогдоогүй хүн хуруу дарам цөөн байна. Архангай аймгийг харъя л даа.

Ж.Мөнхбат гэж залуу гишүүн байв. Хэрэг эрхлэхийн сайд хүртэл хийсэн. Одоо энэ хүн нэгэнт УИХ-аас явжээ. Хуулийн байгууллагад шалгагдаж байгаа.

Боловсролын сайдаар ажиллаж байсан Ё.Баатарбилэг гэдэг хүн шүүхээс зургаан жилийн ял сонсчихоод байж байгаа. Ингээд Архангай аймгийн ард иргэдийн итгэл сэтгэлийг тээн УИХ-д ирсэн хоёр хүн тэднийг нэгэнт хууль тогтоох дээд байгууллагад төлөөлөхөө больсон.

Архангайчууд маань ийм л сонголт хийсэн. Одоо төлөөлж байгаа Ганзоригийн Тэмүүлэн гэж хэн болохыг ард түмэн, Архангайчууд мэдэх байх. Энэ хүн мөн асуудалтай. Эцэг нь Эрдэнэт үйлдвэрийн дарга байсан. Түүний захирал хийсэн он цагт болсон явдлаас улбаалж Эрдэнэт үйлдвэр өчнөөн төчнөөн өр төлбөрийг гадаад, дотоодод төлсөн.

Ч.Ганзориг гэдэг хүн маш удаан шалгагдаж, торгуулах ялтай салсан. Хоригдож ч байсан. Мөн түүний эхнэр хүүгийнхээ нэрд цөвтөх үйлд орооцоолдсон.

Жижиг дунд үйлдвэрийг дэмжих сангаас долоон зуун саяыг мөн авсан нь мэдээлэгдэж, энэ нь ард түмний оюун санаанд үлджээ.

Энэ мэт албан тушаал, мяндагаас үүдэлтэй олон асуудалтай уг гэр бүлийн гишүүн Г.Тэмүүлэнд зүй нь УИХ-ын гишүүн байх ёс суртахууны эрх үгүй юм. МАН харин түүнийг эдүгээ Төсвийн байнгын хороон дарга хийлгэж байгааг хэрхэн ойлгохыг ард түмэн тунгааж байгаа биз.

Үнэхээр л нэр цэвэр хүн дэвшүүлэх гэж байгаа нь МАН-ын удирдлагын үнэн бол Г.Тэмүүлэн тэдэнд сайн үлгэр болохгүй.

Бүсчилсэн тойргоор сонгууль болно. Архангай нэг тулгуур аймаг. Энэ аймгийнхан хоёр дараалан УИХ-д МАН-ын залуусыг сонгоод одоо байгаа үр дүн гэвэл ийм л харагдах.

Архангай аймагт одоо УИХ-д хамгийн их горилж байгаа хүн бол Батлан хамгаалахын сайд Г.Сайханбаяр. Энэ хүн эл аймгийг нэн их тордон усалж, Батлан хамгаалах яамын чиглэлээр олон эрх ашгийг энэ аймагт хандуулав. Сайдын зангаргаар Архангайг ихээхэн тойрлоо.

Энэ хүн бол нэг үгээр хэлбэл Ж.Мөнхбат, Ё.Баатарбилэг нарын орыг залгах гэж байгаа хүн. Архангайчууд ихээхэн бодох хэрэгтэй дээ. Архангайд одоо Засаг дарга Б.Цэрэннадмид нэр дэвших чиглэлтэй байх тун магадлалтай.

Мөн эртнээс амбицтай В.Мөнхбат. Эд бол тус аймгийн МАН-ын залуу, дунд үеийн төлөөллүүд. Нийгэмд төдийлөн танигдаагүй илтэд мэдэгдэх хүмүүс биш. МАН одоо Архангайд тун дорвитой хүн л дэвшүүлж байж санал авна. Ер нь хэцүү дээ.

Өмнө сонгогдсон хүмүүс нь ийм амаргүй өвт нөхцөл байдлыг бий болгочихлоо. Тэгээд ч бүсчилсэнээр Архангай, Баянхонгор хоёроос санал “зулгаах” хэрэгтэй болно. Тун амаргүй.

Тиймээс Ардчилсан нам харин гоочтой байж болох. Гэвч бас л хоорондоо таагүй байдалтай өмнө жилүүдэд аймгийг засагласан. Улсын цолтой Мишкагийн Батжаргал гэж бий. Аймгийн дарга зурвасхан хийсэн. Монголын улс төрд байгаа бөхчүүдийн л нэг төлөөлөл. Д.Золжаргал гэж тун дөмөг залуу байсан. Харамсалтай нь хорвоогоос буцсан. Энэ залуу амьд сэрүүн асан бол энэ аймгаас гарцаагүй санал авах байсан.

“Түмэн шувуут”-ын Ломбын Эрхэмбаяр байж болох нэр дэвшигч. Санхүүгээ шийдсэн, басхүү зөв хандлагатай хүн. Энэ хүн бол аж ахуй, бизнес, бүсчилсэн хөгжил ярьчихаж чадах л хүн дээ.

Мөн Пүрэвбаатарын Мөнхтулга байна. Залуу хүн гэхэд их эвлэг. Өмнө нэг дэвшээд ялагдсан. Бизнес, хөрөнгө оруулалт, өнөөгийн нийгмийн эрэлтийг ойлгосон, дэвшилтэт л хүн харагддаг.

Энэ залуу Өвөрхангай, Баянхонгорт санал авахаа зөв тооцвол, хангайн бүсийн энэ тойрогт хамгийн гоочтой, аятайхан улс төрч харагдаж байгаа юм. Батбаярын Жаргалан Архангайд санал авах л эмэгтэй. Гэвч энэ бүсгүй намын жагсаалтаар нэр дэвших байх аа даа.

Хангайн тойрогт, Ар, Өвөр хангай, Баянхонгорт Ардчилсан нам ялъя гэвэл Б.Жаргалан тойрох л хэрэгтэй болох байх даа. “Янзага” А.Адъяасүрэнгээ дэмжихээс эхлээд л.

ХҮН болоод бусад жижиг намаас нэр дэшигчид очих баараггүй. Гэхдээ одоодоо энэ гээд нэрлэчих хүн илтэд алга даа.

Т.ГАРЬД

Amlalt.mn