Монгол Улсын Засгийн газрын ХЭГ-ын дарга бөгөөд МАН-ын Ерөнхий нарийн бичгийн дарга Д.Амарбаясгалан 2024 оны 03 сарын 18-ний өдөр мэдээллийн news.mn сайтад тодруулга өгөхдөө “МАН-ын дүрмээр авлига албан тушаалын гэмт хэрэгт холбогдоод шийтгүүлсэн этгээдийг нэр дэвшүүлэхгүй гэдэг ойлгомжтой заалт байгаа, мөн МАН аливаа шатны сонгуульд гишүүдээ нэр дэвшүүлэхдээ эхний шалгуур нь тухайн тойргийн дэмжлэг авах, мэргэжлийн байх гэдэг шалгуур тавьж ажиллаж байгаа.

Хоёрдугаарт, салбар сегментийн төлөөллийг жагсаалтаар болон тойрогт нэр дэвшүүлэх байдлаар төлөөллийг бүрэн хангадаг болъё гэдэг зорилго агуулж байгаа” хэмээн маш тодорхой хариулт өгчээ.

Түүний хэлснээр УИХ-ын сонгуульд МАН-аас нэр дэвшигчид энэ шалгуурт тэнцэх ёстой болно. Гэхдээ түүний хэлсэн үгээр бол авлига албан тушаалын гэмт хэрэгт нэр холбогдоод шүүхээр шийтгүүлсэн байх ёстой. Энэ шалгуураар буюу шүүхээр шийтгүүлсэн гэвэл УИХ дах МАН-ын гишүүдээс Т.Аюурсайхан, Б.Энх-Амгалан, Ё.Баатарбилэг нар тойрогт болон намын жагсаалтын алинд нь ч нэр дэвших эрхгүй болж байна гэсэн үг.

Гэвч авлига албан тушаалын гэмт хэрэг нэр холбогдсон ч шалгуулах явцдаа чимээ алдарсан, төрийн өндөр албан тушаал эрхэлж байхдаа эрх мэдлээ ашиглаж, мэдээлэлд ойр байдлаа давуу тал болгон өөрийн хамаарал бүхий этгээдүүдэд ЖДҮ-ийг дэмжих сангийн зээл, Боловсролын сангийн зээл, бусад сангийн зээл, Хөгжлийн банкны зээл олгуулсан, Нүүрсний хулгайн асуудалд нэр холбогдсон ч тэгсгээд нам дарагдсан нэр бүхий гишүүд, МАН-ын нөлөө бүхий албан тушаалтнууд, яам агентлагийн дарга нар удахгүй болох УИХ-ын сонгуульд НЭР ДЭВШИХ ЭРХТЭЙ үлдэж байгаа аж.

Тиймээс манай сайт авлига, албан тушаалын гэмт хэрэг, ЖДҮ, БСЗ, Хөгжлийн банкны хэрэг, нүүрсний хулгайн хэрэгт нэр ХОЛБОГДОЖ байсан МАН-ын гишүүдийг нэрийг манай сайт дараа дараагийн нийтлэлээрээ нэг бүрчлэн зарлах болно.

Харин тэднийг сонгох эсэх нь сонгогчдын бүрэн эрхийн асуудал.

А.Галт

Амлалт.мн