Монголын сонгогчдын үнэмлэхүй хувь залуучууд. Тэд бол энэ орны ихэнх хувь, гол түүчээлэгч. Өмнөх сонгуулиудад ихээхэн учир дутагдалтай саналаа өгдөг хэсэг. Нэг үгээр хэлбэл залуучуудын саналаас үл хамаарч, намын хатуу баримтлалтангууд, настайчууд, харьцангуй хуучинсаг хүмүүсийн саналаар л монголчууд төрд төлүүлэх эрхээ агуулгаар нь хумиж ирсэн юм.

Эдүгээ цаг үе өөрчлөгджээ. Залуус энэ удаагийн сонгуульд үнэмлэхүй идэвхтэйгээр оролцох ул суурь, нийгмийн шинж бодьтой бүрдсэн байна. Тэд хэний дэмээр амжилтад хүрдэг, хэрхэн яаж төр улсад төлүүлэх эрхээ эдлэхийн учир шалтгааныг ойлгодог болсон байна.

Монголын амьдрал тэднийг хэрсүүжүүлж байгаа нь лавтай. Адаглаад, цахилгаан нь хязгаарлагддаггүй Монголыг хэн бүтээх ёстойг ухамсартайгаар эргэцүүлдэг болж. Энэ ч үүднээсээ, өнөө жилийн сонгуульд намыг бус, хүнийг бус, ердөө бодлогыг сонгох эрмэлзэлд бүрэн хөтлөгдөж байгааг судлаачид хэлж байгаа юм байна.

Энэ маш зүйтэй, амьдралд нь юу тустайг, ямар бодлого хөгжихөд нь дэмтэйг шилж чаддаг болно гэдэг л дэвшил юм. Нам бус, хүн бус бодлого шүү. Энэ л чухал юм. Хүн төрөлхтөн ямар шалгарлаар урагшилж байгааг залуучууд бүрмөсөн ойлгосон. Нээлттэй мэдээлэл, технологийн хөгжил үүнийг нь олгож байгаа.

Дарга юу ч хийхгүй байгааг, нам халамжаар тэнэгтүүлж байгааг тэд ойлгосон. Нам нийгмийг хэрхэн сүрэгжүүлж байгааг ч тэд ухамсарласан. Бодлого сонгоно гэдэг бол сайн бодлого дэвшүүлсэн нам, түүний нэр дэвшигчид сонгогдоно гэсэн үг билээ.

Швейцарийн ард түмэн Хүнсний сайдаа л маш сайн мэдэж байх ёстой гэдэг юм билээ. Монголчууд Швейцарь лугаа хөгжинө гэж эртнээс ярьсан. Гэвч хэрэгжүүлээгүй. Солийн Данзангийн энэ үгийг Н.Номтойбаяр эдүгээ утгачлан дэвшүүлж байна.

Хүнсний сайдаа л мэддэг, бусад нь төдийлөн танигдах албагүй хэмжээнд улс орон хөгжихсөн, иргэн нь тийм бядлаг болохсон...

Б.БАЯР

AMLALT.MN