Нийслэлийн Баянзүрх дүүргийн Засаг дарга, НИТХ-ын төлөөлөгч Н.Баярмөнх дүүргийнхээ иргэдийн аж амьдралд нь тус нэмэр болох, аюулгүй, эрсдэлгүй орчинд амьдрах нөхцөл боломжийг хэрхэн хангаж ажиллаж байна вэ?
Тэрбээр өнгөрсөн оны наймдугаар сарын 9-нд болсон нийслэлийн Иргэдийн Төлөөлөгчдийн Хурлын ээлжит бус XIII хуралдааны үеэр зүй зохисгүй харилцаа, хандлага гаргасныхаа төлөө олон нийтийн эргэлзээ, дургүйцлийг төрүүлж байлаа. Сурч, боловсорсон сургуулийг нь харвал чамлахааргүй мэргэжил эзэмшсэн байдаг.
Гэвч Баянзүрх дүүргийн ИТХ-ын ээлжит ХI хуралдаанаар дүүргийн Засаг дарга Н.Баярмөнхийг огцруулах асуудал хурцхан яригдаж байв. Харин дүүргийн ИТХ-ын ээлжит хуралдаанд оролцсон төлөөлөгчид эрхэм Засаг даргад итгэл, найдвар хүлээлгэн, Засаг даргын албан үүргээ илүү эрч хүчтэй ажиллахыг хүсээд, огцруулах саналыг дэмжээгүй.
Энэ жилийн хувьд Засаг дарга Н.Баярмөнх нь эрч хүчтэй ажиллах амлалтаа хэрэгжүүлэхээр дүүргийнхээ иргэд, залуучуудтай тулж харилцан, амьдралын бодит нөхцөл байдлуудтай танилцан, дэмжиж, мөн дүүргийг 5 бүсэд хувааж бүс тус бүрийг хариуцах багийг томилсон.
Тэрбээр албан ёсны фейсбүүктээ Баянзүрх дүүргийн Засаг даргын хувьд хийж буй ажлуудаа бичиж, мөн шууд видеогоор олон нийтэд мэдээлжээ.
Түүний ажлуудаас жишээ татлаа:
3 өдөр ·
"Айл бүрийн хашаанд 10 мод" уриалгад нэгдэж мод тарьж эхэллээ.
Энэ жил бид 4000 айлын хашаанд 40мянган мод тарьж, ургуулна. Айлын хашаанд тарьж буй гол зорилго нь тарьсан модыг эзэнжүүлэх, тоосжилтын эсрэг, хотын өнгө үзэмжийг нэмэгдүүлэх, хүчилтөрөгч үйлдвэрлэх гэх мэт маш олон давуу талтай.
Харин байшин хорооллын зарим байршлуудад бичил цэцэрлэгт хүрээлэн байгуулахаар төлөвлөөд байна.
ЗАЛУУ ИНЖЕНЕР ТЭТГЭЛЭГТ ХӨТӨЛБӨРИЙГ ЗАРЛАЛАА
5-р сарын 1 өдрийн
Баянзүрх дүүрэгт дахин төлөвлөлтийн хүрээнд чөлөөлсөн газар олон байгаа. Компани санхүүгийн чадамжгүй болж, газар дээрээ үйл ажиллагаа явуулалгүй удсан. Эдгээр газруудад төлөвлөлт хийх, орон сууцжуулах хөтөлбөр боловсруулах саналыг НИТХ-ын ээлжит бус XIX хуралдааны үеэр гаргалаа. Хамгийн чухал нь төсөл хэрэгжүүлсэн тохиолдолд гүйцэтгэгч компани дээр хяналт тавьж ажиллах хэрэгтэй.
4-р сарын 23 өдрийн 20:34 цаг ·
Жижиг савлагаатай хямд архи борлуулж байгаа нь иргэдийг архины хамааралтай болгож, хөдөлмөр эрхлэх боломжийг хязгаарлах нэг хүчин зүйл болж байна.
Иймд шаардлагатай хууль тогтоомжид өөрчлөлт оруулах, аж ахуйн нэгжүүдийг жижиг савлагаатай, хямд үнэтэй архийг үйлдвэрлэхгүй, худалдан борлуулахгүй байхыг уриалж байна.
Баянзүрх дүүгийн Засаг дарга Н.Баярмөнх өөрийнхөө давуу ур чадвараа дүүргийнхээ хөгжилд эр зоригтой, шударгаар зориулж чадвал Монголын хөгжил тодорхой хувиар шат ахина. Засаг даргын чин шударга чармайлт, бодит ажил, үлгэр дуурайл таны амлалтын бас нэг том жигүүр нь болно гэдгээ мартах эрхгүй ажиллаарай.
Дүүргийн иргэдээ архинаас гаргаж, ажилтай орлоготой болгохын төлөө шинэлэг сэтгэлгээгээр ажиллаж яваа Засаг дарга аа! Тусламж, дэмжлэг хэрэгтэй байгаа хүнд хүрч очин, асуудлыг ялгаварлан гадуурхалгүй шийдээрэй!
Б.БАЯРМАА
