Монголын иргэд муу биш байна. Харин ч өнгөтэй байна. Утга учиртай байна. Уул эзэлж, Эверестэд гарч, номоо бичиж туурвисаар эцсийн мөч хүртлээ хавдартай тэмцэж эндэж байна. Утга учиртай амьдарч байна. Жүдогийн охин дэлхийн аварга болж байна. Сагсчин залуус олимпын эрх авахаар, дэлхийн тэргүүлэгч гүрнүүдийн багийг хожиж байна. Жирийн хөвүүн унадаг дугуй унаж, дэлхий тойрч мөрөөдлөө биелүүлж байна. Гагцхүү, Монголын улс төрчид л хамгийн хөгийн байна. Нүхэн жорлонгоос нийслэлээ чөлөөлж чадахгүй, цахилгааны хязгаарлалттай улсаа өвөлжүүлж байна.
Одоо сонгуульд нэр дэвшиж, аанай л улсаа хөгжүүлнэ гээд өдөр шөнөгүй давхицгаах тэдний нэр өнөөдөр тодрох юм байх. Улс яг одоо л хөгжүүлнэ гэж ярьсан, нэгнээ л баахан гөвсөн, араа ухсан улс байх.
Монголын улс төрчид өө, намууд аа, ингэж салбар бүрт манлайлагч залуусынхаа төлөөлөл, үлгэрлэл болсон хүмүүсийн итгэл үнэмшил, санал бодол дээр тулгуурлаж, улсаа уруудуулахгүй, ичиж айдаг, зөв, ёс зүйтэй хүмүүс дэвшүүлээч ээ.
Дуугарсан хүмүүс ээ, бариад хорьчихдог, эрх баригчид даа.
Сэтгүүлч Нарангийн Өнөрцэцэг Ардчилсан намаас нэр дэвших бололтой. Энэ бол шууд нэг суудал авчирна. Үүнийг эрх баригчид зөвшөөрөх үү.
Нэгэнтээ Н.Номтойбаяр, Ж.Эрдэнэбат нарыг барьсан шигээ болгож, хаах юм болов уу.
Энүүхэндээ гэхэд, Монголын иргэд том байна, улс төрчид нь харин өчүүхэн байна.
Б.БАЯР
AMLALT.MN
