УИХ-ын гишүүд гэж хуралдаа суудаггүй, ажлаа хийдэггүй хийцгүйрсэн хүмүүс байх юм. Уг нь тэд УИХ-ын гишүүнээр сонгогдохдоо ард түмний төлөө хоёргүй сэтгэлээр ажиллахаа амлаж, гишүүний ТАНГАРАГ өргөсөн байдаг. УИХ-ын гишүүний тангарагийг эргэн нэг САНУУЛЪЯ...
"Монгол Улсын Их хурлын гишүүн би ард түмнийхээ элчийн хувьд нийт иргэн улсын ашиг сонирхлыг эрхэмлэн төрт ёс, түүх соёлынхоо уламжлалыг хүндэтгэж, Монгол Улсын Үндсэн хуулийг дээдлэн сахиж, авлига ашиг сонирхлын зөрчлөөс ангид байж гишүүний үүргээ чин шударгаар биелүүлэхээ тангараглаж байна” хэмээн тэд төрийн сүлдний өмнө, төрийн туганд мэхийн ёсолж тангарагласан.
Гэтэл УИХ-ын гишүүн болчихоод хуралдаа сууж, оролцох гишүүний үндсэн үүргээ ч биелүүлэхгүй, тангарагаа ч зөрчдөг боллоо.
Аргаа барсан УИХ-ын дарга Д.Амарбаясгалан чуулгандаа тогтмол суудаг гишүүдийг “урагшаа суудаг байдлаар урамшуулна” гэж дэмжиж нэг үзээд, “хуралдаа суухгүй гишүүдэд сахилгын арга хэмжээ авна” гэж загнаж нэг үзээд тусыг эс олов.
УИХ-ын 126 гишүүнээс 23 нь Засгийн газрын гишүүн. Засгийн газрын гишүүдийг яамдын ажил ихтэй учир чуулганд тэр бүр сууж амждаггүй юм гэж “уучлахад” цаана нь байгаа 100 гаруй гишүүн хуралдаа суух ёстой. Харамсалтай нь УИХ-ын чуулган ирц хүрэхгүй, хүрсэн ч арай ядаж 50 хувийн ирц буюу 63 гишүүнтэй байх шиг.
Өнөөдөр УИХ-ын чуулганаар гурилын гаалийн татварыг сэргээх буюу үндэсний гурилын үйлдвэрүүд, тариалан эрхлэгчдийг дэмжсэн хууль 60 гишүүний дэмжлэг, 29 гишүүний татгалзсан саналаар уначихлаа.
Үүнд бухимдсан УИХ-ын гишүүн, ХХААХҮ-ийн сайд Ж.Энхбаяр ирц муу байсан шалтгаанаас болоод УИХ-ын гишүүдийн олонхийн нь дэмжсэн хуулийн төсөл чуулганы нэгдсэн хуралдаанаар хэлэлцэгдээд уначихлаа гээд мэдээлэл хийж байх юм.
Тиймээс цаашдаа УИХ-ын дарга Д.Амарбаясгалан та зангараг гаргаж хурлаа удирдан, ирцээ бүрдүүлж ажиллах шаардлагатай болж байна.
Үүний тулд хуульд УИХ-ын чуулганаа шалтгаангүй тасалсан гишүүдэд УИХ-ын дэг болон хөдөлмөрийн хуульд заасны дагуу сахилгын арга хэмжээ авах, цалинг нь үе шаттай хасах, гадаад дотоод томилолтын зардлыг нь танах, явуулах боломжийг нь хязгаарлах зэрэг байдлаар арга хэмжээ авахгүй бол УИХ ирц хүрдэггүй гэдэг шалтгаанаар хуралдахаа больж, олонхийн дэмжлэгийг авсан асуудлууд УИХ-ын чуулган дээр уначихдаг буруу жишиг тогтон, 126 гишүүнтэй УИХ-ын нэр хүнд “шалбаагт ” хутгалдах хэмжээнд хүрэх нь байна шүү гэдгийг УИХ-ын дарга Д.Амарбаясгалан танд сануулъя.
Ц.Мөнх
Amlalt.mn
