Өнөөдөр Монгол Улсын Ерөнхий сайд Л.Оюун-Эрдэнэд итгэл үзүүлэх эсэх асуудлыг УИХ хэлэлцэнэ. Энэ бол зөвхөн нэг хүний хувь заяа биш, улс орны ирээдүйн хөгжлийн чиглэлийг тодорхойлох чухал мөч юм.

Товчхондоо МАН-ын дарга, Ерөнхий сайд Л.Оюун-Эрдэнэ нөхөр, дайсанаа "таних" өдөр.

Л.Оюун-Эрдэнэ 5 жил Ерөнхий сайд хийх хугацаанд улс орны хөгжилд тээг тушаа болж ирсэн авлигыг багасгах, түмэн олны баялагийг "хулгайлагсадтай" тэмцэх, эргүүлэн төрд авах, үндэслэлгүй хөрөнгөжигсдийн хөрөнгийг хураах зэрэг ажлыг санаачлан эхлүүлсэн нь эргээд тэр өөртөө "дайснууд" бий болгож, өөрийгөө ноцуулах, улмаар хүүгийнхээ орлогыг нотолж чадахгүй байна гэх шалтгаанаар түүнийг огцоруулах үндэслэл болов.

Хүүгийнхээ тухайд тэрбээр хангалттай тайлбар хийсэн нь "дайснууд" нь үл тоож, олон нийтийг "турхирч" ийм байдалд хүргэв.

"Итгэл үзүүлэх эсэх санал хураалтаар УИХ-ын гишүүд зөвхөн Ерөнхий сайдын хувь заяа төдийгүй улс төр дэх авлигын эсрэг тэмцэлд хаашаа зогсохоо илэрхийлэх болно. Түүнийг дэмжигсэд бол баялгийг шударгаар хуваарилахыг дэмжигсэд бол харин эсэргүүцэгсэд нь эрх мэдэл, ашиг сонирхлын бүлэглэлийн төлөөлөл байж магадгүй гэдгийг олон нийт ажиглаж байна.

Тиймээс өнөөдөр УИХ-аар түүний "асуудал"-ыг хэлэлцэх үед Ерөнхий сайд Л.Оюун-Эрдэнэд итгэл үзүүлэхийг үл хүсэгчид хийгээд дэмжигчдийг дараах байдлаар "хялбархан" ойлгож болно гэж ажиглагчид хэлж байна.

Түүнийг огцруулахыг дэмжиж санал өгөгсөд бол Улс орны хөгжлийг хойш татагсад, Ерөнхий сайд болон сайдын албан тушаалд дурлагсад, Ухаа худаг зэрэг байгалийн баялагийг төрд буцаан авахыг эсэргүүцэгсэд, үндэслэлгүй баяжсан нь тогтоогдож хөрөнгөө хураалгаж болзошгүй улс төрчид, авлига хулгай нь илрэхээс эмээж айгсад, төрөөс тэндэр авч баяжигсад гэж хэлж болохоор...

Ганцхан Ухаа худагийн уурхайгаа төр авбал Монгол Улсын иргэн бүр жилдээ 570 мянган ам доллар хүртээх боломжтой гэдгийг нийтлэлч Баабар хэлжээ.

Харин нөгөө талд түүнийг дэмжигчид бол баялагийг нийгэмд тэгш хувиарлахыг зөвшөөрөгсөд, авлигатай тэмцэж үндэслэлгүй хөрөнгөжсөгчдийн хууль бус орлогыг хураахыг дэмжигсэд, улс орны хөгжилд хэрэгтэй томоохон төсөл хөтөлбөрийг явуулахыг зөв гэж үзэгсэд, байгалийн баялагийг эрх мэдэлд ойр байх өөрийн гар хөл бологсодоороо дамжуулан хэдхэн олигархиуд хууль бусаар эзэмших биш иргэд үр ашгийг нь хүртдэг байх ёстой гэдэгт итгэгсэд буюу нийт иргэдийн олонхийн хүсэл зоригийг илэрхийлж, тэдний талд орж чадах УИХ-ын гишүүд гэж хэлж болно.

Эцэст нь хэлэхэд, өнөөдөр УИХ-ын гишүүд зөвхөн Ерөнхий сайдын хувь тавиланг шийдэхгүй, харин улс орны хэтийн замыг ч тодорхойлох болно. Иргэд тэднийг анхааралтай ажиглаж байна. Хэн нь шударга ёсны талд зогсож, хэн нь өнгөрсөн түүхэнд үлдэхийг удахгүй бид харна

А.Галт

Amlalt.mn