Билгийн тооллын XVII жарны “Сүрээр дарагч” хэмээх гал морин жилийн сар шинийн баярт зориулсан цуврал ахмад болон өсвөр бөхийн барилдаанаар өчигдөр эхэллээ.

Ахмад бөхийн барилдаанд 50-иас дээш настай 24 бөх зодоглосноос Төв аймгийн Сэргэлэн сумын харьяат, “Ээлт хан” галын бөх, Монгол Улсын гавьяат тамирчин, Дархан аварга А.Сүхбат түрүүлж, Архангай аймгийн Эрдэнэмандал сумын харьяат, “Бөхбилэгт” дэвжээний бөх, аймгийн арслан Ч.Эрдэнэчулуун үзүүрлэв.

А.Сүхбат аварга 2006 оноос хойш 20 жилийн дараа дахин бөхийн өргөөнд зодоглосон нь энэ бөгөөд 54 насандаа 56 дахиа түрүүллээ.

Түүний хувьд энэ сарын 16-нд эхлэх Сар шинийн баярт зориулсан улс, аймаг, цэрэг, сумын цолтой 256 бөхийн барилдаанд зодоглохоо илэрхийлээд байгаа юм.

Их шөвөгт Говь-Алтай аймгийн Жаргалан сумын харьяат, “Хантайшир” дэвжээний бөх, аймгийн начин Б.Пүрэвсүрэн, дунд шөвөгт улсын начин Д.Цогзолдорж, аймгийн арслан Ц.Жамсран, начин О.Одсүрэн нар шалгарав.

Энэхүү барилдааны хамгийн ахмад нь Увс аймгийн Тэс сумын харьяат улсын начин Л.Цэвээн байлаа. Түүний хувьд 71 насандаа Монгол бөхийн өргөөний зүлэг ногоон дэвжээнд гарч барилдсан юм.

Тэгвэл өсвөрийн барилдааны гурван насны ангилалд 500 орчим хүүхэд бүртгүүлэн барилдсанаас бага буюу 11-12 насны ангилалд Сэлэнгэ аймгийн Мандал сумын харьяат, Х.Мөнхбаатар түрүүлж, нийслэлийн Багануур дүүргийн залуу бөх Г.Номтойхүү үзүүрлэжээ. Энэ насанд “Уран гараа дэвээтэй бөх”-ийн шагналыг Э.Мөнхбат, Уран барилдааны шагналыг А.Билгүүнтамирт гардуулсан байна.

13-14 насны ангилалд нийслэлийн Сонгинохайрхан дүүргийн харьяат, 74-р сургуулийн бөх Г.Түвшинтогтох түрүүлж, Баянзүрх дүүргийн 44-р сургуулийн залуу бөх Г.Шаравжанцан үзүүрлэлээ. Г.Түвшинтогтохын хувьд сар шинийн өсвөрийн барилдаанд гурван жил дараалан түрүүлснээс гадна “Хуурнин шуугигч” барилдаанд 55, УАШТ-д зургаан удаа түрүүлсэн байна. “Уран гараа дэвээтэй бөх”-ийн шагналыг М.Мөнхтамир, Уран барилдааны шагналыг Б.Бямбадорж хүртлээ.

Харин 15-16 насанд Увс аймгийн Тэс сумын харьяат, “Бас аварга” дэвжээний бөх А.Баяржавхлан түрүүлж, Завхан аймгийн Завханмандал сумын харьяат, “Эв Монгол” клубын бөх Г.Энхтамир үзүүрлэв. “Уран гараа дэвээтэй бөх”-ийн шагналыг О.Мухулай, Уран барилдааны шагналыг Д.Ренчинд гардуулсан юм.

Тарвалин хийдийн нэрэмжит, Сар шинийн баярт зориулсан сумын цолтон болон залуу бөхчүүдийн уламжлалт барилдаан хоёрдугаар сарын 10-ны 12:00 цагаас Монгол бөхийн өргөөнд болно. Энэхүү барилдааныг 16 дахь жилдээ уламжлал болгон зохион байгуулж байгаа юм. Түүнчлэн Монгол бөхийн өргөөнд зохион байгуулсан 133 дахь удаагийн барилдаан аж.

Эх сурвалж: Montsame.mn