Нийгмийн даатгалын ерөнхий газраас “Нийгмийн даатгалын байгууллагын 80 жил-Хөгжил шинэчлэлийн алсын хараа” зөвлөгөөнийг өнөөдөр зохион байгууллаа.

Зөвлөгөөний үеэр Хөдөлмөр, нийгэм хамгааллын сайд Т.Аюурсайхан “Нийгмийн даатгалын байгууллага нь 80 жилийн хугацаанд Монгол Улсын нийгмийн хамгааллын бодлогыг тодорхойлж, 54 мянган аж ахуй нэгж, 1 сая 100 мянган орчим иргэнээс 3.3 их наяд төгрөгийг төвлөрүүлэн ажилласан байна.

Мөн 800 гаруй мянган иргэнд тэтгэвэр, тэтгэмжийг олгодог үндэсний хэмжээний байгууллага болсон. Бид 80 жилийнхээ хүрээнд ололт амжилтаа дүгнээд зогсохгүй ирээдүйн томоохон сорилтуудад бэлэн байхын тулд хууль эрх зүйн орчныг нь шинэчлэх томоохон ажлуудыг эхлүүлж байна.

Нийгмийн даатгалын хууль 1994 онд шинэчлэгдэн батлагдсан бөгөөд бид өнөөдрийг хүртэл орлогын хуваарилалтын тогтоолцоог хэрэгжүүлээд явж байна.

Гэвч энэхүү тогтолцоо нь Олон улсын жишиг хандлага, манай улсын нийгмийн даатгалын сангийн цаашид он удаан жил тогтвортой байх зорилтын хүрээнд удаан явах боломжгүй гэж харж байгаа. Тийм учраас бид хуваарилалтын тогтолцооноос хуримтлалын тогтолцоо руу шилжих зайлшгүй шаардлагатай.

Энэ нь бид бүхний ярьдаг нэрийн данс юм. Нэрийн дансыг бид бодитой орлоготой болгох хэрэгтэй. Ингэснээр олон давхаргат тэтгэврийн тогтолцоог давхар бүрдүүлэх шаардлага гарч ирж байгаа юм.

Өнөөдөр бидэнд хувийн нэмэлт тэтгэврийн сан зайлшгүй шаардлагатай байна. Өөрөөр хэлбэл, иргэд цаашдаа хэчнээн жил ажиллаж, хэчнээн хэмжээний шимтгэл төлсөн байна үүнтэйгээ нийцсэн тэтгэвэр тэтгэмжийг авдаг шударга тогтолцоонд шилжих шаардлагатай. Үүнийг бид үе шаттайгаар эхлүүлэх бөгөөд энэ намрын чуулганаар Нийгмийн даатгалын багц хуулийг хэлэлцүүлэхээр бэлтгэж байна.

Удахгүй Засгийн газарт танилцуулна. Энэ хүрээнд бид маш олон асуудлыг шийднэ. Тэтгэвэр тогтоохдоо 7 жилээр тооцох уу, 5 жилийн дунджаар тооцох уу гэдэг нь цаг хугацааны асуудал. Хүн ажил хөдөлмөр эрхэлсэн хугацаандаа хэдэн төгрөгийн шимтгэл төлсөн байна тэр нь нэрийн дансанд бодит тоо болон хуримтлал болж орж байдаг, үүн дээр нь зах зээлийн ханшаар хүү тооцдог, гэр бүлийн гишүүдэд тодорхой хэмжээгээр өвлөгддөг болох тогтолцоо руу орно.

Үүнийг хийхээр олон талын туршлагыг судалж, хоёр талт харилцаагаар зөвлөх үйлчилгээг авч байна. Хуримтлалын тогтолцоо руу шууд шилжих боломжгүй учир бид үе шаттайгаар хэрэгжүүлэхээр хуулийн төслөө боловсруулах болно” гэлээ.