Манай масс Ерөнхий сайдынхаа толгойтой их ноцолдох юм. Хэлбэртэй нь. Хүний толгой ямар ч байж болно. Ойлон, данхар, зуйван, бүр гурвалжин байна уу, хэнд ч хамаагүй. Ер нь, манай олон нийт нэгнээ хэлбэр дүрсээр дайрдагаа машид түргэн больцгоох хэрэгтэй. Харин тэрэнд орвол агуулга руу, мэдлэг рүү нь, ухаан руу нь өнгийж ноцолдоцгоо.
Тэжээлтэй толгой юу, дэмгүй толгой юу гэдгийг ялгаж харах чухал. Хүний толгойн голыг, уураг тархийг үзэж, ухаан санаатай уулзаж сурах хэрэгтэй, манай ард түмэн. Ерөнхий сайд өчигдөр талархалтай үг олон хэллээ. Юуны өмнө, парламентын сонгодог засаглалыг дархлана гэж хэллээ. Маш зөв. Энэ санааг манай ард түмэн, төрийн сэнтийд суусан хэн боловч ямагт санаж яндашгүй хурайлж явах учиртай юм.
Авлигатай хийх тэмцлээсээ алхам ч ухрахгүй гэлээ. Сөөм байсан, хэдхэн өдрийн өмнө, одоо алхам болж байна. Тэлж байна. Сөөмөөр биш, алхам алхмаар л урагшилаад байх шиг сайхан юм хаана байна. Оюук хэллээ. Ард түмний төлөөлөл байх учиртай парламент анги давхаргын парламент болжээ гэж хэллээ. Хоёр том намд хамаардаггүй олон зөв бодолтонууд үргэлж өнцөгдөж, олигархиудыг үзэн ядаж байгааг хэллээ.
“Хоёр том намын гишүүнчлэлгүй нийгмийн сонирхлын төлөөллүүд, багш, эмч, инженер, техникийн ажилтнууд, сэхээтнүүд, малчин, тариаланчид, оюутан залуучууд, ахмад, дунд үеийнхэн, хөгжлийн бэрхшээлтэй иргэд, үйлдвэрчний эвлэл болон ажилчдын төлөөлөл, нийгмийн цөөнхийн төлөөлөл парламентад сонгогдох нь өдрийн од харах мэт ховор байсныг өнгөрсөн 30 жилийн түүх хангалттай нотлоно”. Оюун санаа, мэлмий хурц төгсөөр тэр ингэж хэллээ. Юутай үнэн билээ.
Манай нийгэмд эдүгээ цүнх баригч, гөбс долоогч, намын байраар эргэлдэгч нар л нийгийн өрмийг хамж, Ерөнхий сайдын хэлсэнчлэн Зайсангийн амаас Санзайн зуслан руу онгоц мэт машинаар хөлхөлддөг шударга бусын баялагтан олон болсоныг олон нийт үзээд, жигшил зэвүүцэл нь туйлдаа хүрээд байгаа билээ. Л.Оюун-Эрдэнэ бас хэллээ. Эдийн засаг 17 дахин тэлсэн ч энэ гучин жилд иргэдийн амьдралд дорвитой өөрчлөлт гарсангүй ээ гэж. Юу үнэн энэ үнэн билээ. Улсын баялаг хэдхэн хүний гарт төвлөрч, хэдхэн хүн тэнгэрээс энтэй баян болсон билээ. Цагаан гэдэг хүнийг цадигаа алдсан баян боллоо гэдэг үнэн. Эрдэнэтийн овоолго эх орны өмч, ард иргэдийн баялаг мөн шүү дээ.
Авлига бөхөөгүй цагт, авлигачид цээрлэгдээгүй цагт энэ улс хазгар доголон, эрэмдэг зэрэмдэг байсаар байхыг мөн Оюук Ерөнхий сайд хэллээ. Улс орныг туйлдуулж байгаа үндсэн оношуудыг ингэж тодорхой хэллээ. Одоо эмчилдэг цаг аа, эм тариа нь өөрийн тань үг, уураг тархи, үйлдэл, эр зориг юм. Үндсэн хуулиа үтэр түргэн өөрчилж, тогтолцоогоо төгөлдөржүүлэх нь цаг алдамгүй учрал. Холимог тогтолцоог бүрдүүл. Нийт ард түмний дөчхөн хувийн саналыг авсан нам жаран хэдэн суудалтай долоон жил засаг барихыг юу гэж үзэх билээ, даан ч харамсмаар. Сонгоогүй, үнэлээгүй хүмүүсээрээ удирдуулан сууна гэдэг дэндүү золгүй явдал. Ийм учраас сонгуулийн хуулиа сондгой хазайлтгүй өвч төгс гаргах хэрэгтэй.
Намуудын санхүүжилтийг ив ил, шив шилэн болго оо. Өнөөдөр намыг тань дүүрэн нүүрсчид авлигаар торложээ. Эмэгтэйчүүддээ итгэл өг. Өөд нь тат. Их хуралд олон оруул. Эдийн засгийнхаа өмнө эрх муур мэт байгтун. Монголоор дүүрэн хийе бүтээе гэсэн, төсөл хөтөлбөр төгөлдөржүүлье гэсэн залуус сульдсан Засаг, авлигажсан улс төрчдөөс болоод нэг ч төслөө явуулж чадахгүй байна. Засаг баталгаа гаргаж чаддаггүй. Олон улсад эрэмбэгүй. Хөгжлийн банкыг нь мөнөөх олигархиуд нэгмөсөн өвчөөд залгисан. Харин ч Оюун-Эрдэнийн Засгийн газар өрийг барагдуулж, цохилох судасны амьтай болгож байгааг шууд зөвшөөрөх хэрэгтэй. Энэ улс чинь эрчим хүчгүйгээр сөөм ч урагшлахгүй. Эрчим хүчээ тэтгэ. Хөгжлийн үндэс бол эрчим хүч. Эх орны хүч бол иргэний чадал. Ерөнхий сайд Л. Оюун-Эрдэнэ одоо эх орныг өөд татах төсөл бүр дээр өөрөө гардан гардан ажилла. Хардаж сэрдээд, хулгайн дондоо автсан улс төрчдөд харуул. АТГ, Цагдаагийн дарга, Шүүх, Прокурор, хөндлөнгийн шинжээч, өөр хэн нь байдаг юм байлцуулаад, нээлттэй олон нийтэд харуулаад, Эдийн засгийн хөгжлийн сайдаа дэргэдээ суулгаад ярь.
Эх орныг үнэхээр өөд нь татах макро микро төсөлчдийг дууд. Энэ төсөл чинь яаж хөгжих юм, ямар дэмжлэг байна, ажлын байр хэдийг гаргах юм, хэдий хэрийн татвар улсад төвлөрүүлэх юм, хэтийн үнэ цэн нь юу юм гээд ярь. Гэдэс доторгүй, том жижиггүй ярь. Тэр Багануур чинь, тэр Бөөрөлжүүт чинь хөдөлж байна уу, хэн саад болж байна гээд асуу. Би яаж туслах вэ, Засаг төр чинь яаж дэмжих вэ гээд ив.
Тэлмэний дулааны станц гээд олон жил яригдлаа. Яг баригдах гэж байхад нь Хөвсгөлийн улстөрчид зогсоосон юм гэх чинь билээ. Тэр төслийн удирдагчийг дуудаад асуу. Яагаад төсөл чинь явахгүй байна гээд. Тэгээд өөрөө гардаад, туслаад гэрэл гарга аа, Ерөнхий сайд аа. Ингэж олон олон төслийнхөнтэй тулж ажиллавал туг болно, өөрөө. Ингэж байж л эх орон улс чинь улс шиг улс, төр шиг төр болно. Өмчийг үргэлж тэтгэ Ерөнхий сайд аа. Өмчтэй хүн, өмчтэй улс хүчирхэг байдаг. Дэлхийн түүх энэ. Улны зон олшироод байвал улс унана.
Хэнд ч ойлгомжтой. Гуталтай нь гуталгүйгээсээ айна гэж үг бай. Айхтар үг шүү. Ордноор дүүрэн алтан шаахай өмссөн хүмүүс Долоон буудлаас цааших доголон амьдралтай, сайран хөлтүүдээс айх хэрэгтэй. Ерөнхий сайд тэднийг тэнцвэр төгс, хөл нандин болгох үүрэгтэй. Ерөнхий сайддаа амжилт хүсье. Ер бусын реформ хийгээч. Ерөнхий сайд танд алтан үе тохиож байна. Ард түмэн чинь ч дэмжих төлөвтэй.
З. Баяраа
Амлалт.мн
