За, ийм аргачлалд Монголын улс төрийнхөн шилжив бололтой. Бүгдээрээ хар нь ч үнэн шиг байна. Нүүрсний хулгайд сэрдэгдэн нэрлэгдсэн таван гишүүн ер маш их мэдээлэлтэй байгаа бололтой. Нэг нэгээр нь зарлах олон баримт байгаа гэсэн. Үүнийг яг ажил хэрэг болгоод хар цагаанаа ялгах хэрэгтэй байна.
Б.Баттөмөр гишүүн тун саяхан алтны салбарт асуудал мөн чиг их байна даа гээд, цааш нь ярих уу, яах уу гээд зогссон. Одоо тэрийгээ ярьдаг цаг аа. Монгол улс валютын нөөц хомсдоод хэцүү байгаа биз дээ. Валют олж улсын эдийн засгийн амийг барьдаг салбарын нэг бол алт. Дэлхийд ийм. Тэгвэл тэр амь бологч алтны салбарт чинь арай нүүрснийх шиг зуд нүүрлэчихсэн юм биш биз. Үүнийг Б.Баттөмөр гишүүн минь яриа аа.
Х.Баттулгыг зугатаачихлаа гэж Ч.Хүрэлбаатар шүгэлдэв. Өнөөх нь өвчнөө анагаах гэж явсан тухай мэдээлэгдэж. Цул булчин, нуль яргай эр сэн. Юугаа эмчлүүлэх гэж байгаа юм бол. Удаанжаргалтай уулзаж, учир байдлаа ярих гэж байгаа юм болов уу гээд энд тэнд бичсэн л харагдах. Х.Баттулга гэснээс түүнтэй “Монгол тулгатан” хөтөлдөг П.Анужин бас нүүрстэй холбоотой тухай нүүрсний хулгайд нэрлэгдсэн Зикагийн улс төрд оруулсан гэх И.Мөнхжаргал гэж Генсек мөн шүгэлдэв. Мөнөөх нь тиймгүй ээ, шүүхдэнэ л гэж байх шиг байна, ер нь энэ улс төрчид нэгнийгээ бүгд л нүүрсчид гэж харж, хардаж байх шиг байна.
Хар болгохын төлөө бүгдийгээ хар болгон хардаж байх шиг байна. Хардахгүй юм гэж алга. Аргагүй юм, жинхэнэ хар нүүрсчид нь, хулгайчид нь илрэхгүй байгаа болохоор тэр биз.
Ш.Раднаасэд нүүрсний хулгайг илрүүлэх лобби бүлэг байгуулсанаа зарлав. Нилээд олон гишүүн нэгдсэн бололтой. Одоо тэгээд зүтгэх хэрэгтэй. Хэн нь нүүрсний хар, хэн нь үнэн цагааныг нотлох хэрэгтэй. Т.Аюурсайханы Б.Ганхуягтай авахуулсан зургууд, нийтийн сүлжээгээр нэг элбэг. Тэр хоёр нүүрсэн дээр үнэхээр нүүгэлтэж үү, үгүй юү гэдгийг баримтаар нотол.
Энд анзаарахад Б. Ганхуягийг би огт мэдэхгүй, нэг тийм нөхөр явдаг байсан, нэг удаа л мэнд мэдсэн, таарсан гэх үгийг олон хүн, Ардын намын олон хүн хэлж байна. Тэр нөхөр нь ямар мундаг юм, Ардын намынхаа толгой олонтой тийм шадар биш атлаа тийм том компанийн захирлаар томилогдож л байдаг. Т.Аюурсайхан хэлэх хэрэгтэй. Түүнтэй хэрхэн нөхөрлөдөг өө Д.Амарбаясгалан ч хэлэх хэрэгтэй. Нүүрсний гэрээний нэг хоёр долларын тухай ярилцаж байсан уу, үгүй юү хэлэх л хэрэгтэй дээ. Хүн чанар гэж нэг юм байдаг даа. Энэ мэтээр ингээд бүгдээрээ хар, эс бол бүгдээрээ цагаанаа тунгаачих хэрэгтэй юм.
Хав хар нь дийлэнх мэдэгдээд байгаа. Хэрэв тийм бол өчүүхэн жаахан цагаанаа Ерөнхий сайд Л.Оюун-Эрдэнэ болон намын дайчин шударга хэсэг дэмнээд, ирэх сонгуульд элдвийн, нүүрсний, концессийн, хөгжлийн банкны, алтны, ер нь бизнесийн хулгайч, олигархиудаа бүгдийг нь УИХ-д бүү дэвшүүл. Намаа ч, төрөө ч нэгмөсөн цэвэрлээд авахыг өндөр буянт хариуцлага гэж хандах ёстой. Тэд одоо нүглээ наминчилж, тогтолцооны өөрчлөлт дээр намын даргаа дэмжээд учраа олох хэрэгтэй.
Улны хэсгийн түмнээ угжиж болох төсөл босгоцгоо. Нөгөө газарт орчихгүй шиг бол. Салдангийн Одонтуяа гишүүн ирэх оныг хулгайтай тэмцэх жил болгон зарлая гэжээ. Буруу алга. Гэхдээ, юуны өмнө, хулгайчийг дэвшүүлэхгүй, хулгайч төрд гардаггүй, өөрчлөлтийн сонгуулийг л хийх хэрэгтэй юм аа. Монголын төр хулгайчийн оромж биш. Монголын хүн ард хулгайчаар төр жолоодуулахыг огтоос тэвчихгүй.
Б.Баяр
Aмлалт.мн
