Цэвэршиж эхлэх гэж байгаа нийгэм нэг ийм шинж үзүүлдэг болов уу гэмээр төлөв байдал ажиглагдаж байх шиг. Дөчин их наядаар нь, төрийн өндөр албан тушаалтанууд нь үргэлж улсаа тоносоны тул ард иргэдийн итгэл, уур бухимдал хэдийнэ дээд цэгтээ хүрч, амьдрал тартагтаа тулаад удсан.
Сүүлийн хоёр гурван жил Цагаан сарын уламжлалт баяраа ард түмэн олигтой тэмдэглэсэнгүй. Ард түмний нүдэнд өчүүхэн итгэлийн оч сүүмэлзэж байна уу гэмээр байна эдүгээ.
Хэдий амьдрал нь амаргүй байгаа ч, эвэр хошуулалгүй баяраа тэмдэглэх гээд “үзээд” байх шиг байна. Хамгийн гол нь, улс оронд минь мэх цэгц, шударга ёсны жаахан ч атугай гэрэл гарах нь үү дээ гэдэг итгэлийн сүүмэлзэл байгааг, хүмүүсээс анзаарч болохоор байна.
Энэ нь улсыг тоносон хулгайч луйварчидтай Засгийн газрын тэмцэж байгаа байдал, хулгайч луйварчдад гэсгээл очиж эхэлж байгаагаас үүдэлтэй байх шиг байна.
Хэргүүд түрүүчээсээ шийдэгдэж эхлэж байна. Хэрэг хийгсэд эрх тушаалаасаа өөрсдөө огцрох өргөдлүүдээ дараалан гаргаж байна. Хөгжлийн банкны хэргийн эздэд зохих шийтгэлийг оноогоод эхэлж.
Ерөнхий сайд шүүхийг харж байна гэж удаа дараа хэлсэн. Харж байна гэж халуу дүүгтэл хэлээд байсан учир түрүүчээсээ асуудлууд шийдэгдэж байна. Сайн хэрэг. Маш сайн.
“Эрэл”-ийн Б. Эрдэнэбат тэргүүтэнд ялыг нь оноож. Хөгжлийн банкны нэхэмжлэлийг хангаад, 171 тэрбумыг төлүүлэхээр болж. Шүүхийнхэн тангарагтай улс заавал харж байна, ерөөж байна гэж хэлүүлэлгүй ингээд шийдээд шийдээд явчих ёстой юм.
“Ажнай”-н Д. Бат-Эрдэнийг хөрөнгө завших хэрэг зохион байгуулсаныг тогтоон, хилийн хориг тавьчихаж. Т. Аюурсайхан огцроё гэж.
Хөгжлийн банкны хэргийн холбогдогч 80 хүн, дөрвөн хуулийн этгээдэд холбогдох хэргийн шүүх хурал нөгөөдөр болохоор зарлагдаж. Эмх цэгц, шударга ёс ингээд бэхжээд, жишигжээд явчих учиртай юм.
Энэ бол улс орон байгаагийн илэрхийлэл. Улс орон дэвжихийн эхний цог. Ерөнхий сайд Л. Оюун-Эрдэнийн шинэ сэргэлтийн бодлогын хүрээнд боомтууд цахимжлаа. Шилэн боллоо. Бүгдийг хянадаг болох нь. Амар шүү дээ. Аймаар далд эдийн засгийн хэргүүд тэр цахимгүй, шилэнгүйгээс үүдэж “ассан”, түймэр болсон. Түймрүүд унтрахын эхлэлийг тавьж байна гэж ард түмэн харж байна. Ерөнхий сайд өөрөө очоод, ялимгүй итгэлийн гал нь асаж байгаа болов уу гэмээр ярьж байна лээ.
Хил гаалийн арчаагүйгээс хэдэн их наядаар бид алдсан юм чинь аргагүй. Юутай ч, Монголын ард түмэн улсынхаа 29 боомт, 115 гаалийн хяналтын бүсээ хараандаа авчээ. Шинэ сэргэлт ингэж л үйлчлэх учиртай.
Одоо шүүх, хуулийнхан төмөр зам, тээвэр ложистикийн нөгөө хэдэн их тэрбум, их наядын хэргүүдийг толгой дараалан ингээд ингээд шийдээд явчих. Ард зондоо итгэл өгөөд. Алтан төрөө өргөөд.
Энэ маягаар шударга ёс тогтон, буруутан гэмтэнүүд залхаагддаг, хүн төрөлхтөнд тогтсон хэм хэмжээт нийгмийн ердийн тогтоц бүрдээд ирэхээр хүссэн хүсээгүй ард түмний нүдэнд оч тодорч, хөдөлмөр бүтээмж нь дээшлээд, улс орон дэвжээд ирэх нь гарцаагүй.
Зүгээр л дор бүрнээ, ажлаа хийгээд, эх орныг тонуулдаггүй болгох, эрх баригчид зөв л ажиллачихбал ард түмэн үргэлж дэмжих нь зүйн явдал.
З.БАЯРАA
Amlalt.mn
