Зурагт асаана, нүдний шилтэй, чухал царайтай нэг нөхөр сууж байна. Өөр нэг суваг руу шилжүүлнэ. Өнөөх сууж байна. Дахиад бас нэг суваг руу тавина. Аанай л мөн нөгөөх сууж байна. Одоо энэ дээр арай үгүй байлгүй дээ гээд бас нэг суваг руу тавина. Мөнхүү товариш сууж л байна. Ажил хэрэг, хууль ёс яриад л.
Байгаль орчин, аялал жуулчлалын сайд болоод арай гайгүй болсон. Алаг цоог гардаг болсон. Хүмүүс хэлээ байлгүй дээ. Хэмжээ дооз гэж нэг юм байдаг гээд. Гэхдээ л мань сайд мордуут хазаар аваад зүтгэдэг хий ихтэй, ойр зуурын омголон морь шиг байх нь түгээмэл.
Нөхөр яаж зүгээр байхав, Цагаан сарын өдрүүдээр Хөшгийн хөндийн онгоцны буудалд ажиллаж байна. Бусад сайдуудыг ажиллахгүй байна гэж хэлж байна. С.Бямбацогтыг цаагуураа “нударч” байх шиг байна. Онгоцны буудал чинь угтаан Зам тээврийн салбарын нэгж санагдах. Онгоц буудал ариун цэвэргүй байна гэж Б.Бат-Эрдэнэ сайд шүүмжлэв. Буруугүй л дээ. Гэхдээ сайдыг олон нийт шүүмжилж байна.
Хамгийн наад зах нь Гандангийн бурхдын тоос тортогийг арилга, жуулчид түүгээр чинь маш их ордог гэлээ. Нийслэлийнхээ гудамжны нус цэрийг цэвэрлэ ээ гэж байна.
Аа, бас Алсын хараа 2050-даа тусгасан аялал жуулчлалыг бүсчилэн хөгжүүлэх зураглал, хөрөнгө оруулалт ямар байх юм,газар зүйн байршил гээд дээд эрэмбийн асуудлууд илүү чухал аа гээд номлоцгоож байна. Энэ зөв. Огтын буруугүй.
Шил дараалан телевизээр гардаг шигээ ингэж асуудлыг шил даран шийд гэж ард түмэн хэлж байна. Байгаль орчны сайд ер нь жаахан бодитой байна байгаа. Өөрийн чинь үйл хөдөлбөрийг хараад байхад хэлбэр шүтсэн “ажнай” харагдаад байх.
Намтар түүхийг чинь сөхөхөөр маш олон ажил хийж. Дунджаар зургаан сараас жилийн настай маш олон ажил хийжээ. Нэг үгээр хэлбэл, цай оочлоод гарч байгаа хүн шиг л салбар, ажлын байр хэсээд явсан харагддаг. Голдуу намын чигийн шошготой.
Одоо та, Монгол Улсын сайд, байгаль орчин гэдэг маш том салбарыг хариуцаж байгаагаа мэддэг биз. Аялал жуулчлалаа, байгаль орчноо үнэхээр бодож байгаа бол Бат-Эрдэнэ минь нийслэлийнхээ байгаа байдлыг сайн хар аа.
Төрийн ордноос хойш нийслэлийн ард түмний ихэнх нь нүхэн жорлондоо бие засаж байна. Одоо хавар болж байна. Агаар орчин, хөрсний бохирдол дээд цэгтээ хүрсэн. Хамгийн наад зах нь эрхэм сайд та, гэр хорооллынхноо био 0-той болгох ажлыг хийж эхэлвэл илүү бодитой юм.
Япончууд манайд Хөшгийн хөндийн буудлыг бариад өгсөн. Менежментийг нь хийж байгаа. Тэдний сэтгэлд юм хийх хэрэггүй. Тэртээ тэргүй дэлхий зөвшөөрсөн гүрэн. Тэр онгоцны буудалд шавхай болгоод байгаа улс чинь бид өөрсдөө, бидний гэр хорооллынхны болоод бидний ахуйгаас улбаатай асуудал. Юмаа жаахан ширхэгээс нь ойлгож асуудалд ханд.
Б.Ганхуяг нөгөө газарт суугаад, тэр тусам аазгай хөдлөөд Эрдэнэтээс Их хурлын гишүүн болох гэсэн дондоо их бүү авт аа.
Ард түмэн харж л байна, өөрийг чинь. Авсаархан, хөнгөхөн пи ар хийсэн жижигхэн шиг эр болохыг чинь. Дархан цаазтай уулыг тойруулж хүрээлсэн эрх мэдэлтнүүдийнхээ газрын асуудлыг цэгцэл. Тэгвэл борви чинь тэнийж буйн илэрхийлэл болно.
Туулын усаа хямгад. Адаглаад цас борооны усаа хуримтлуулдаг бол. Голынхоо савыг гүн болго, өргөн болго. Иймэрхүү түвшний асуудлыг яриад, шийдээд, бүтээх арга замын тухай яриад өдөр бүр телевизээр гар. Хамаа алга. Дэмжье. Тэгэхгүй байж уулгамчлаад гүйх нохойд гүйхгүй нохой саадын үлгэрийг үзүүлээд байвал үтэр түргэн энэ салбараас зайлуулахын түүс болж тун мэдэх.
Оноч цэц болсон үгийн цуглуулга бүхий ном бүтээж Эрдэнэтэд тараана. Өөрийн чинь цэцээс илүү цэцийг энэ ард түмэн зовлонгоороо ойлгочихсон. Эрдэнэт чинь гэхэд Улаанбаатараас дутуугүй утааны голомт болсон. Уугих утаан дунд Бат-Эрдэнэ ном тарааж байна, бэлэг тарааж байна гэж ярилцаж байна, цэцэлж байна, ёжилж байна.
Эрдэнэтдээ “BB” хэмээн хөөрхөн нэршил үүсгээд ажиллаад байх. Юм юм л хийнэ. Олимпиад зохионо. Сав л хийвэл таварган очсон байна. Ерөөсөө л нэг тийм гишүүн болохын төлөөх сэтгэцтэй. Сэтгэцээ илүү бодитой, илүү сайдын түвшинч болго оо, Бат-Өлзийн Бат-Эрдэнэ ээ!
Эс бөгөөс улс төрд улны наадгай өрсөн “Baby” чигээрээ үлдэнэ шүү.
З.БАЯРАА
АМЛАЛТ.МН
