Сангажавын Баярцогт таван зуу нилээд гаруй хоног хоригдсон юм билээ. Арван жил сонссон. Мань хүн орсон өдрөөсөө гар дээрээ сунайгаад эхэлсэн гэнэ лээ. Бараг таван зуу сунайж тогтмолжуулсан юм гэдэг. Бас их уншиж байсан гэдэг. Тэгээд хорихын удирдлагаас саван алчуур, түмпэн гуйсан гэдэг юм билээ. Түмпэндээ ус дүүргэж, саван алчуурыг нийвийдээд, хоригдож буй өрөөгөө шил толь болгосон гэцгээх.

Шүүхийн шийдвэр биелүүлэх чигийн хүмүүсээс хүмүүс сонсоод, энд тэнд, тэнд энд шивэр авир болоод, төдхөнөө бүгд шахам ярьцгааж байхыг сонссон. Өөр байх аливаа зүйл ингэж мэдээлэл нь тархдаг, өөр тэмүүлэл бусдын чихэнд чингэж очдог. Таван зуун хоногт юу эсийг бодов гэж, бүгдийг бодоо биз. Юутай ч, орчиндоо дасах, бясалгах, дотоод өсөлтөө үргэлж тордсон байдал С.Баярцогтод байжээ.

Нөхөр гадаад дотоодын шүүхүүдээр асуудалгүй ээ, хэрэг хийгээгүй гэж цагаатгагдсан байна. Гэтэл түүний араас мөшгөгсөд өдгөө ч түүнийг “тавихгүй” л шүүх үүхийн асуудлаар нь боорлох гээд л байх шиг байна. Энэ бүхэн С.Баярцогтын өсөлт болж байх шиг байна.

Саяхан Ардчилсан намын даргад өрсөлдөөд ялагдав. Их өөр маягийн хүч үйлчлээд ялагдав бололтой. Бас дээр нь С.Баярцогтын нэр хүнд ард түмний дунд багагүй унасан нь ч нөлөөлөв бололтой. Нэр унах хэцүү. Нэр босох хэцүү. Хэцүүг С.Баярцогт давах тэнхэлтэй. С.Баярцогтыг дараад л, дайраад л байхад үндэслэл яриад мэтгээд байдаг. Уурладаггүй, учирлаад л байх. Эгц хараад тайлбарлаад байдаг. Сангийн сайд байхдаа тийм л байсан. Сайдыг нэг бус хийхдээ тийм л байсан.

Их хурлын дэд даргаа өгөхдөө иймэрхүү л байсан санагдах. С.Баярцогт төрийн ордны одоогийн энэ нүүр өргөтлийн ажлыг удирдсан. Төрийн ордны нүүр түмэнд ил. С.Баярцогтын нүүр ч тиймэрхүү ил агуулгатай байх шиг харагддаг. С.Баярцогт Ардчилсан намын даргын сунгаанд ялагдаж байна гэдэг чинь түүнд илүү сунайлт хэрэгтэй, илүү өлчиржих шаардлага байгаагийн л илэрхийлэл.

Түүний бүх мундрааны оньс болсон Оюу толгойн далд уурхай хэдхэн хоногийн дараа үйл ажиллагаагаа эхлэх гэж байна. Оюу толгойн гэрээг үзэглэсэн дөрвөн хүн байдаг. С.Баяр, Л.Гансүх, Д.Зоригт нарын. Д.Зоригтоос бусад нь шоронд суусан.

Нэг нь тухайн үеийн Сангийн сайд С.Баярцогт. Энэ уурхайн нээлт дээр С.Баярцогт, С.Баяр, Л. Гансүх, Д. Зоригт нар очих хэрэгтэй. Б.Ариунсан, Б.Бямбасайхан нар ч очих биз. Ерөнхий сайд мэдээж очиж нээнэ. Ойлгомжтой.

Ерөнхий сайд, төр засаг, Оюу толгойн удирдлагууд нээлтийн тууз хайчлаад үг хэлсний дараа, “Оюу толгой төслийн үйл явцын баатрууд” гэж зогсоод эдгээр хүмүүс мөн алга ташаад мэдээлэл хийх хэрэгтэй. Бидний улс төрийн зовлон жаргал дунд Монгол улсын эдийн засаг энэ төслөөр өөдөлж байна гээд ярих хэрэгтэй. Бид улсынхаа төлөө зовох учиртай, мөн эвлэрэх учиртай гэх агуулгатай үг хэлэлцэж, хойшид хөгжлийн төслийн төлөө бүгд үргэлж хамтрах хэрэгтэй гэж хэлэлцэх хэрэгтэй.

С.Баярцогт үүнд манлайлах учиртай. Өндөр соёл үзүүлж, хилэнцийг орхих том ёс зүйтнээ ойлгуулах хэрэгтэй. С.Баярцогт ингэж чадна. Оюу толгой төсөл бол Монголчуудын амьдралын бүхий л оролцоо, хувь заяа, хэнэггүйтэл, шунал тачаал, үр өгөөж, өндөр хишиг гээд бүх төрлийн шалгарлын их босго юм.

Энэ босгоор бүхий л талаас нь оролцогч, төгөлдөр гэрчийн хувьд Сангажавын Баярцогт улс төрчдөд үлгэр үзүүлэх үгийг энэ уурхайг нээх үйл явдлыг тохиолдуулан хэлэх нь нэн оновчтой үйлдэл болно. Өөрөө хэлсэн шүү дээ. Энэ төслийг эхлүүлсэндээ үргэлж өөртөө, үндэстэндээ талархаж явнаа гэж хэлсэн санагдах.

Ингэвэл С.Баярцогт барианд орж байгаа юм. Байгаа онож байгаа юм. Улс төрийнхөө дэвжээнд илүү сунайж чадахаа үзүүлэх юм.

С.Баярцогт энхрий маягийн дүр төрхтэй хүн, эдүгээ эрс маягийн дүр төрхтэй болсон байна лээ.

Ажиглаарай.

З.БАЯРАА

Амлалт.мн