Зам, тээврийн хөгжлийн сайд С.Бямбацогт, Барилга, хот байгуулалтын сайд Б.Мөнхбаатар нар Улаанбаатар-Дархан чиглэлийн авто замын төсөл хэрэгжүүлэгч нэгж, гүйцэтгэгч компанийн төлөөллүүд, Улаанбаатар төмөр зам ХНН, Монцемент Билдинг Материалс ХХК, Мак Цемент ХХК, Налгар Түшиг ХХК, Хөтөлийн Цемент Шохой ТӨХК хамтран цементийн нийлүүлэлтийн асуудлаар өнөөдөр /2022.09.05/ хуралдаж, санал солилцлоо.
2022 оны 9,10 дугаар сард Улаанбаатар-Дархан чиглэлийн авто замын барилгын ажилд 84.700 тонн цемент хэрэгцээтэй байгаа. Өдөрт дунджаар 1400 орчим тонн цементийн хэрэгцээ бий болсон. Тиймээс замын бүтээн байгуулалтын явцад цементийн тасалдал үүсгэхгүй байх нь нэн чухал байгаа юм.
Сайд С.Бямбацогт “Улаанбаатар-Дархан чиглэлийн авто замын хөдөлгөөнийг 2022 онд багтаан нээх үүргийг Засгийн газар, Ерөнхий сайдаас өгсөн.
Хөтөлийн Цемент шохой үйлдвэрийн үйл ажиллагаа түр зогсож, цементийн хомсдолд орох эрсдэл үүссэн учраас авто замын гүйцэтгэгч компаниуд, цемент үйлдвэрлэгч компанийн төлөөлөл, Улаанбаатар төмөр зам ХНН энэхүү хамтарсан уулзалтыг хийж байна. Манай улс урьд нь импортоор ихэнх цементээ хангадаг байсан бол одоо дотооддоо үйлдвэрлэж Улаанбаатар-Дархан чиглэлийн авто замд нийлүүлж ихээхэн дэм болж байна. Тиймээс эдгээр компаниудад талархаж байгаагаа илэрхийлье” гэлээ.
Мөн Сайд С.Бямбацогт хэрэгцээт цементийн тооцоогоо бодитой, замын барилгын ажил тасралтгүй явагдах байдлаар хийж, цемент үйлдвэрлэгч компаниудтай нэгдсэн ойлголтод хүрэхийг даалгав.
Хөтөлийн “Цемент шохой” үйлдвэр ТӨХК-ийн гүйцэтгэх захирал Л.Наранбаатар “Улаанбаатар-Дархан чиглэлийн авто замын IV, V багцыг цементээр бүрэн хангаж байсан. Засвар дуусч,үйл ажиллагаа аравдугаар сарын 1-н гэхэд жигдэрвэл өдөрт 3000 тонн цемент гаргаж чадах урьдчилсан тооцоо бий” гэв.
Монцемент Билдинг Материалс ХХК-ийн төлөөлөл “Манай компани 2020 оноос хойш 17.700 тонн цементийг тус замд нийлүүлсэн. Одоогийн байдлаар хоногт 18-24 вагон ачиж байгаа” талаар мэдээлэв.
Мак Цемент ХХК “2022 оны 5,6,7 дугаар сараас хойш ачаалал өндөрсөж, нийлүүлэлт нэмэгдсэн. Сард 137-140 мянган тонн цемент нийлүүлж, үйлдвэрийн хүчин чадлаас 50 хувиар илүү ажилласан. Цаашдаа өдөрт үйлдвэрлэсэн хэмжээгээрээ цемент нийлүүлэх боломжтой” гэв.
Зам, тээврийн хөгжлийн сайд С.Бямбацогт Хөтөлийн Цемент Шохой үйлдвэр ашиглалтад ортол бусад компаниудыг санхүүгийн эрсдэлд оруулахгүйгээр Дарханы замын барилгын ажилд цемент тасралтгүй нийлүүлж өгөхийг хүслээ. Түүнчлэн нийлүүлэгч, гүйцэтгэгч, тээвэрлэгч гурван тал нягт уялдаатай хамтран ажиллаж, цементийн нийлүүлэлтийг тасалдуулахгүй байх чиглэлээр шуурхай хамтран ажиллахаар тогтов.
