УИХ-ын гишүүн Ж.Бат-Эрдэнэ Авто тээврийн тухай хуулийн төсөлтэй холбоотойгоор IToim.mn сайтад тодруулга өгчээ.
УИХ-ын гишүүн Ж.Бат-Эрдэнэ тус хуулийн төслийн ажлын хэсгийн ахлагчаар ажиллаж байсан юм. УИХ хуулийн төслийг хэлэлцээд явж байсан ч ажил гацсан.
Тэгвэл Засгийн газар болон УИХ-аас ажлын хэсгийн ахлагчид хуулийн төслийн хэлэлцүүлгийг дахин сэргээх үүрэг өгчээ.
Тус хуулийн гол өөрчлөлт нь буруу талдаа хүрдтэй авто машиныг халж, зөв хүрдтэй авто машинтай болох. Мэдээж хэдхэн жилийн дотор бүх машинаа зөв хүрдтэй болгож чадахгүй. Тиймээс 2027 оноос буруу талдаа хүрдтэй авто машиныг улсын бүртгэлд бүртгэхгүй байх концевцыг ажлын хэсгийн ахлагч танилцуулж, дэмжигдсэн байна.
Ажлын хэсгийн ахлагч, УИХ-ын Ж.Бат-Эрдэнэ “Манай улс эрт, орой хэзээ нэг цагт буруу талдаа хүрдтэй машинаа халж таарна. Гэхдээ хугацаа өгье. Хуульдаа бол буруу хүрдтэй авто машиныг улсын бүртгэлд бүртгэхгүй гэж байгаа. Бүртгэхгүй гэдэг нь хөдөлгөөнд оролцохгүй гэсэн үг. Хөдөлгөөнд оролцохгүй гэдэг нь хилээр дахиж оруулж ирэхгүй гэсэн үг.
Тиймээс бүртгэхгүй гэдэг заалтыг 3-5 жилээр сунгая гэсэн санал оруулсан. Таван жилээр бодоход 2027 оноос гэсэн үг. Харин одоо байгаа машинууд хөдөлгөөнд хэвийн оролцоод явна. Буруу хүрдтэй машин гэхээр дандаа япон машинууд болчихоод байгаа. Зөв хүрдтэй л бол ямар ч улсад үйлдвэрлэсэн машин оруулж ирж болно шүү дээ” гэв.
